പാർട്ടി ഓഫിസിൽ പൊതുദർശനം വേണ്ടെന്ന്​ പി. രാജുവിന്‍റെ കുടുംബം

പറവൂർ: അന്തരിച്ച സി.പി.ഐ നേതാവും മുൻ എം.എൽ.എയുമായ പി. രാജുവിന്‍റെ സംസ്കാര ചടങ്ങുകളിൽ സി.പി.ഐ ജില്ല നേതാക്കൾ പങ്കെടുക്കുന്നതിൽ അതൃപ്തി പ്രകടിപ്പിച്ച്​ കുടുംബം. പാർട്ടിയിൽനിന്ന്​ രാജുവിന്​ നീതി കിട്ടിയില്ലെന്നാണ്​ ഇവരുടെ പരാതി.

വെള്ളിയാഴ്ച രാവിലെ എട്ടിന് എറണാകുളത്തെ മോർച്ചറിയിൽനിന്ന്​ പറവൂരിലെത്തിക്കുന്ന മൃതദേഹം രാവിലെ ഒമ്പതിന്​ നഗരസഭയുടെ ഉടമസ്ഥതയിലുള്ള മുനിസിപ്പൽ ടൗൺ ഹാളിലാണ്​ പൊതുദർശനത്തിന് വെക്കുന്നത്​. എന്നാൽ, തൊട്ടടുത്ത സി.പി.ഐ താലൂക്ക് ആസ്ഥാനമായ എൻ. ശിവൻപിള്ള സ്മാരകത്തിൽ പൊതുദർശനവും പാർട്ടി പതാക പുതപ്പിക്കലും വേണ്ടെന്നാണ്​ പാർട്ടി നേതൃത്വത്തെ രാജുവിന്‍റെ കുടുംബം അറിയിച്ചിരിക്കുന്നത്​.

ജില്ല നേതൃത്വത്തിലുള്ളവരെ അടുപ്പിക്കാൻ കഴിയില്ലെന്നും വേണമെങ്കിൽ താലൂക്ക് നേതാക്കളായ മൂന്നുപേർക്ക് പാർട്ടി പതാക ചാർത്താൻ അനുമതി നൽകാമെന്നുമാണ്​ ഇവരുടെ നിലപാട്​.

ജില്ല സെക്രട്ടറി സ്ഥാനത്തുനിന്ന്​ മാറിയശേഷം സംസ്ഥാന- ജില്ല നേതൃത്വങ്ങൾ അദ്ദേഹത്തെ വേട്ടയാടി മാനസികമായി തളർത്തിയതാണ്​ ഇത്തരമൊരു തീരുമാനമെടുക്കാൻ കാരണമായി പറയുന്നത്​. അതേസമയം, സംസ്ഥാന സെക്രട്ടറി ബിനോയ് വിശ്വത്തിന്‍റെ നേതൃത്വത്തിലുള്ള സംഘം കുടുംബവുമായി ചർച്ച നടത്തുന്നുണ്ട്​. രാജുവിനോട് ജില്ലാ നേതൃത്വം പുലർത്തിയ ശത്രുതാ മനോഭാവത്തിൽ പറവൂരിലെ പാർട്ടി പ്രവർത്തകരിൽ വലിയ അമർഷമുണ്ട്.

രാജുവിനെതിരെ ഉയർന്ന ആരോപണങ്ങൾ അടിസ്ഥാനരഹിതമാണെന്ന്​ കൺ​ട്രോൾ കമീഷൻ കണ്ടെത്തിയിട്ടും അദ്ദേഹത്തിന്​ നേതൃത്വത്തിലേക്ക്​ തിരിച്ചുവരാനുള്ള അവസരം ചിലർ ബോധപൂർവം ഇല്ലാതാക്കിയെന്ന പരാതിയും കുടുംബത്തിനുണ്ട്​. ഇല്ലാത്ത പ്രശ്നങ്ങളുടെ പേരിൽ വ്യക്തിഹത്യ നടത്താനുള്ള ശ്രമം രാജുവിന്​ ആഘാതമായെന്ന്​ മുതിർന്ന സി.പി.ഐ നേതാവ്​ കെ.ഇ. ഇസ്മായിൽ സമൂഹമാധ്യമത്തിൽ കുറിച്ചു.