നഗരം നിറഞ്ഞു

തൃശൂർ: നഗരത്തിലെ ലോഡ്ജുകളിലും ഹോട്ടലുകളിലും മുറി കിട്ടാനില്ല. രക്ഷിതാക്കളോടൊപ്പമെത്തുന്ന വിദ്യാർഥികളും അധ്യാപകരും കലോത്സവം കാണാനെത്തുന്നവരും എല്ലാ മുറികളും കൈക്കലാക്കി. മത്സരാർഥികൾക്ക് വേദികളോട് ചേർന്നുള്ള 21 സ്കൂളുകളിലാണ് താമസ സൗകര്യം ഏർപ്പെടുത്തിയത്. പൊലീസി​​െൻറ കർശന സുരക്ഷയിൽ ഭയാശങ്ക കൂടാതെ താമസിക്കാൻ എല്ലാ സജ്ജീകരണങ്ങളും ഒരുക്കിയിട്ടുണ്ട്. 

പ്രധാന വേദിയുടെ എട്ട്​ കി.മീ ചുറ്റളവിലാണ് താമസിക്കാനുള്ള സ്കൂളുകൾ. 10 സ്കൂളുകൾ ആൺകുട്ടികൾക്കും 11 സ്കൂളുകൾ പെൺകുട്ടികൾക്കുമായാണ് അനുവദിച്ചത്. സ്കൂളുകളിൽ നിന്ന്​ മത്സരവേദികളിലേക്കുള്ള വാഹനങ്ങളും തയാറാണ്. നിലവിലെ ജേതാക്കളായ കോഴിക്കോട് ജില്ലയിലെ ആൺകുട്ടികൾക്കും വയനാട്ടിലെ ആൺകുട്ടികൾക്കും പൂങ്കുന്നം എച്ച്.എസ്.എസിലാണ് താമസ സൗകര്യം. കോഴിക്കോട് നിന്നുള്ള പെൺകുട്ടികൾക്ക് മാർതോമ സ്കൂളാണ് നൽകിയത്. പാലക്കാട്ടെ ആൺകുട്ടികൾക്ക്​ ജെ.പി.ഇ എച്ച്.എസ്.എസും പെൺകുട്ടികൾക്ക്​ തൃശൂര്‍ സ​​െൻറ് ജോസഫ്സ് സ്കൂളിലുമാണ് സൗകര്യമൊരുക്കിയത്​.

തിരുവനന്തപുരത്തെയും കൊല്ലത്തെയും ആൺകുട്ടികൾക്ക്​ കാൽഡിയൻ സിറിയൻ സ്കൂൾ, പത്തനംതിട്ട, കോട്ടയം ജില്ലകളിലെ ആൺകുട്ടികൾക്ക്​പുറനാട്ടുകര എസ്.ആർ.കെ ജി.വി.എം എച്ച്.എസ്.എസ്, എറണാകുളം, ആലപ്പുഴ ജില്ലകളിലെ ആൺകുട്ടികൾക്ക്​ പടിഞ്ഞാറെക്കോട്ട എൻ.എസ്.എസ് എച്ച്.എസ്.എസ്, ആതിഥേയ ജില്ലയിലെ മിടുക്കന്മാർക്ക് അയ്യന്തോൾ ജി.വി.എച്ച്.എസ്.എസ് എന്നിവിടങ്ങളിലാണ് താമസ സൗകര്യം. ഒല്ലൂർ വൈലോപ്പിള്ളി സ്കൂൾ കണിമംഗലം എസ്.എൻ ബി.എച്ച്.എസ്.എസ് എന്നിവ ആൺകുട്ടികൾക്കും ഒല്ലൂർ സ​​െൻറ് റാഫേൽ സ്കൂൾ, കണിമംഗലം എസ്.എൻ ജി.എച്ച്.എസ് എന്നിവ പെൺകുട്ടികൾക്കുമായി താമസത്തിന്​ സജ്ജമാക്കിയിട്ടുണ്ട്.