ഓരോ ഫയലും ഓരോ ജീവിതം; പൂർണത നേടാനായി​ല്ലെന്ന്​ മുഖ്യമന്ത്രി

തിരുവനന്തപുരം: ഓരോ ഫയലും ഓരോ ജീവിതമാണെന്ന്​​ കരുതി നടപടിക​ളെടുക്കാനുള്ള നിർദേശം പൂർണതയിൽ എത്തിക്കാനായിട്ടില്ലെന്ന്​ മുഖ്യമന്ത്രി പിണറായി വിജയൻ. എ.കെ.ജി ഹാളിൽ കേരള സെക്രട്ടേറിയറ്റ്‌ എംപ്ലോയീസ്‌ അസോസിയേഷൻ സുവർണ ജൂബിലി സമ്മേളനം ഉദ്​ഘാടനം ചെയ്യുകയായിരുന്നു അദ്ദേഹം. ഓരോ ഫയലും ഓരോ ജീവിതമാണെന്ന്​ 2019ൽ അധികാര​മേറ്റപ്പോൾ പറഞ്ഞിരുന്നു. അത്​ നല്ലതോതിൽ ജീവനക്കാർക്കിടയിൽ പൊതുബോധമായി വന്നു. നല്ല മാറ്റമുണ്ടായി. എന്നാൽ, പൂർണതയിലേക്ക്​ എത്തിയിട്ടില്ല.

ഓരോരുത്തരും പ്രവർത്തിക്കുന്നിടത്ത്​ ശരിയായ രീതിയിൽ കാര്യങ്ങൾ നിറവേറ്റുന്നുണ്ടോയെന്ന്​ സ്വയം പരിശോധിച്ചുപോകണം. ഫയൽ തീർപ്പാക്കൽ നടപടി തുടങ്ങി. നല്ല ഫലമുണ്ടാക്കി. എന്നാൽ, ചിലർ കുറച്ചു പിറകോട്ടുപോയി. ഭരണസിരാകേന്ദ്രമായ സെക്രട്ടേറിയറ്റിൽ എന്താണ്​ അവസ്ഥയെന്ന്​ സ്വയം പരിശോധിച്ച്​ വിലയിരുത്തി കുറവുണ്ടെങ്കിൽ തിരുത്തി മുന്നോട്ടുപോകണം. ആളുകൾക്ക്​ പെട്ടെന്ന്​ കാര്യങ്ങൾ നടന്നുകിട്ടുകയാണ്​ പ്രധാനം. ഭരണനടപടികൾ അതിവേഗത്തിലാകുക എന്നത്​ പ്രധാനമാണ്​.

മതനിരപേക്ഷത സംരക്ഷിക്കാൻ ബാധ്യതയുള്ള കേന്ദ്ര ഭരണകൂടത്തിന്‍റെ നടപടികൾ മതനിരപേക്ഷത തകർക്കുന്നതായി മാറിയെന്ന്​ മുഖ്യമന്ത്രി പറഞ്ഞു. പാഠപുസ്തകങ്ങളിൽ ഗാന്ധിജിയും​ ​മുഗൾ ചരിത്രവുമൊക്കെ വെട്ടിമാറ്റിയത്​ ഒടുവിലത്തെ ഉദാഹരണമാണ്​.

ഗാന്ധിവധത്തിലെ സംഘ്​പരിവാർ ബന്ധം മറച്ചുപിടിക്കാനാണ്​ ഗാന്ധിയെക്കുറിച്ച പാഠങ്ങൾ ഒഴിവാക്കിയത്​. ചരിത്രം ശരിയായ രീതിയിൽ കുട്ടികൾ പഠിക്കുന്നതിനെ സ്വാതന്ത്ര്യസമരത്തിൽ ഒരു പങ്കുമില്ലാത്ത സംഘ്​പരിവാർ ഭയക്കുകയാണെന്നും മുഖ്യമന്ത്രി പറഞ്ഞു.