പൊലീസി​െൻറ വീഴ്​ച യു.ഡി.എഫ്​ കാലത്തെ ഹാങ്​ ഒാവർ കാരണം -മുഖ്യമന്ത്രി

തിരുവനന്തപുരം: എൽ.ഡി.എഫ് സർക്കാരിന്‍റെ കാലത്ത് പൊലീസിന്​ വീഴ്​​ച പറ്റിയിട്ടുണ്ടെങ്കിൽ അത്​ യു.ഡി.എഫ്​ ഭരണ കാലത്തെ ഹാങ്​ ഒാവർ കാരണമാണെന്ന്​ മുഖ്യമന്ത്രി പിണറായി വിജയൻ. നടക്കാൻ പാടില്ലാത്ത പല സംഭവങ്ങളും പോലീസി​​െൻറ ഭാഗത്തു നിന്നുണ്ടായി. എൽ.ഡി.എഫ് നയം ചില പോലീസ് ഉദ്യോഗസ്ഥര്‍ ഉള്‍ക്കൊള്ളാത്തതാണ് ഇതിന് കാരണം. അത്തരക്കാര്‍ക്കെതിരെ ശക്തമായ നടപടിയുണ്ടാകുമെന്നും മുഖ്യമന്ത്രി നിയമസഭയില്‍ പറഞ്ഞു.

അസാധരണമായ കുറ്റങ്ങൾക്ക് മാത്രമേ യു.എ.പി.എ ചുമത്താവൂ എന്ന് ​പൊലീസിന് നിർദേശം നൽകിയിട്ടുണ്ട്. രമൺ ശ്രീവാസ്തവയെ ഉപദേശകനാക്കിയതിൽ തെറ്റില്ല. എൽ.ഡി.എഫ്, യു.ഡി.എഫ് സർക്കാരുകളുടെ കാലത്ത് അദ്ദേഹം ഡി.ജി.പിയായി പ്രവർത്തിച്ചിട്ടുള്ളതിനാൽ പിന്നെ ഉപദേശകനാക്കുന്നതിൽ എന്താണ് തെറ്റെന്നും മുഖ്യമന്ത്രി ചോദിച്ചു.

 രാഷ്ട്രീയ പാർട്ടി നേതാക്കൾക്കെതിരേ കാപ്പ നിയമം ചുമത്തരുത്​. മൂന്നാം മുറ പാടില്ല. പരാതിയുമായി വരുന്ന ജനങ്ങളോട് പോലീസുകാർ മോശമായി പെരുമാറരുതെന്ന്​ നിർദേശം നൽകിയിട്ടുണ്ട്​. ഇതര സംസ്ഥാന തൊഴിലാളികളെ ഉൾപ്പെടുത്തി പോലീസ് ഡാറ്റാ ബാങ്ക് എത്രയും വേഗത്തിൽ തയാറാക്കും. ഭീകര സംഘടനകളിൽ മലയാളികൾ ചേർന്ന സംഭവവുമായി ബന്ധപ്പെട്ട്​ കാണാതായവരെക്കുറിച്ച് അന്വേഷിക്കാൻ പ്രത്യേക സംഘത്തെയും നിയോഗിക്കുമെന്നും മുഖ്യമന്ത്രി കൂട്ടിച്ചേർത്തു.