സമരം നിർത്തണമെന്ന്​ പ്രീത ഷാജിയോട്​ ഹൈകോടതി

കൊച്ചി: വായ്പാ കുടിശ്ശികയുടെ പേരിൽ ജപ്തി നടപടികൾ നേരിട്ട്​ കുടി​യൊഴിയേണ്ടി വന്ന ഇടപ്പള്ളി പത്തടിപ്പാലം സ്വദേശി പ്രീത ഷാജിയും സംഘടനകളും സമരത്തില്‍നിന്ന് പിന്മാറണമെന്ന് ഹൈകോടതി. ജപ്തി ചോദ്യം ചെയ്ത് സമര്‍പ്പിച്ച ഹരജികള്‍ പരിഗണിക്കാനിരിക്കുന്ന പശ്ചാത്തലത്തില്‍, പ്രീത ഒഴിഞ്ഞുകൊടുത്ത വീട്ടിലോ പുറത്തോ പരിസരത്തോ സമരം പാടില്ലെന്നാണ്​ ഡിവിഷന്‍ ബെഞ്ച് വാക്കാൽ വ്യക്​തമാക്കിയത്​. കിടപ്പാടം ലേലത്തില്‍ വിറ്റതു സംബന്ധിച്ച ഡെബ്റ്റ് റിക്കവറി ട്രൈബ്യൂണല്‍ (ഡി.ആർ.ടി) നടപടികളെ ചോദ്യം ചെയ്ത് ​പ്രീത ഷാജി സമര്‍പ്പിച്ച അപ്പീലാണ്​ കോടതിയുടെ പരിഗണനയിലുള്ളത്​.

ഹരജി നല്‍കിയതിനൊപ്പം സമരം നടത്തുന്നത് അംഗീകരിക്കാനാവില്ല. ഇത്​ വെള്ളിരിക്ക പട്ടണമല്ലെന്നും കോടതി ചൂണ്ടിക്കാട്ടി​. തനിക്ക്​ പിന്തുണ നൽകുന്ന സമിതിയുടെ നേതൃത്വത്തിലാണ്​ സമരമെന്ന്​ ഹരജിക്കാരുടെ അഭിഭാഷകൻ കോടതിയെ അറിയിച്ചു. സാമ്പത്തിക തട്ടിപ്പിനിരയായ ആളുകള്‍ തെരുവിലേക്ക് വലിച്ചെറിയപ്പെടുന്നതിനെതിരായ സമരമാണ് നടക്കുന്നത്. ഇത് അതീവ ഗൗരവകരമായ വിഷയമാണെന്നും അഭിഭാഷകന്‍ ചൂണ്ടിക്കാട്ടി.