ഖത്തർ വിസ ഇളവ്​: കേരളം അറിഞ്ഞില്ല

കൊണ്ടോട്ടി: വിസയി​ല്ലാതെ ഖത്തറിലേക്ക്​ പോകുന്നതിനുളള അനുമതിയായെങ്കിലും അനിശ്​ചിതത്വം തുടരുന്നു. ഇന്ത്യയടക്കം 80 രാജ്യങ്ങളിൽ നിന്നുളളവർക്ക്​ വിസയില്ലാതെ രാജ്യത്തേക്ക്​ വരാൻ ആഗസ്​റ്റ്​ ഒമ്പതിനാണ്​ ഖത്തർ അനുമതി നൽകിയത്​. പുതിയ നിർദേശം പ്രാബല്യത്തിൽ വന്നെങ്കിൽ കേരളത്തിൽ നിന്നുളള വിമാനത്താവളങ്ങളിൽ ഇത്​ വരെ നടപ്പായില്ല. 

വിസയില്ലാതെ യാത്ര അനുമതി നൽകുന്നതുമായി ബന്ധപ്പെട്ട്​ ഇതുവരെ തങ്ങൾക്ക് ​ യാതൊരു നിർദേശവും  ലഭിച്ചിട്ടില്ലെന്നാണ്​ ഇമിഗ്രേഷൻ അധികൃതർ വ്യക്​തമാക്കുന്നത്​. എന്നാൽ, കഴിഞ്ഞ ദിവസം കൊച്ചി, കോഴിക്കോട്​ വിമാനത്താവളങ്ങളിൽ നിന്നായി മൂന്ന്​ പേർ പുതിയ സംവിധാനത്തി​ലൂടെ യാത്ര ചെയ്​തിട്ടുണ്ട്​. ഇമിഗ്രേഷൻ അധികൃതർ ആദ്യം അനുമതി നിഷേധിച്ചെങ്കിലും പിന്നീട്​ പുതിയ സംവിധാനത്തെ പറ്റി പറഞ്ഞപ്പോൾ ഏറെ നേരത്തിന്​ ശേഷം അനുമതി നൽകുകയായിരുന്നു.

വിസയില്ലാതെ ഖത്തറിലേക്ക്​ പോകുന്നതിന്​ അനുമതി ലഭിച്ചതിനെ തുടർന്ന്​ ട്രാവൽ ഏജൻസികളിലടക്കം നിരവധി പേരാണ്​ അന്വേഷിച്ച്​ എത്തുന്നത്​. ഇന്ത്യയുൾപ്പെടെ 47 രാജ്യങ്ങളിൽ നിന്നുളളവർക്ക്​ 30 ദിവസത്തേക്കാണ്​ അനുമതി നൽകുക. ആവശ്യമെങ്കിൽ 30 ദിവസത്തേക്ക്​ കൂടി നീട്ടിനൽകും. ബാക്കി 33 രാജ്യങ്ങളിൽ നിന്നുളളവർക്ക്​ 90 ദിവസത്തേക്കാണ്​ അനുമതി നൽകുക. പാസ്​പോർട്ടിന്​ ചുരുങ്ങിയത്​ ആറ്​ മാസത്തെ കാലാവധിയും മടക്കയാത്രക്കുളള ടിക്കറ്റും ഹാജരാക്കിയാ​ൽ പ്രവേശനാനുമതി ലഭിക്കുമെന്നായിരുന്നു നി​ർദേശം.