മാർ ഈവാനിയോസ് കോളജിൽ ആർ.എസ്​.എസ്​ ആയുധ പരിശീലനം; പ്രതിഷേധവുമായി വിദ്യാർഥി സംഘടനകൾ

തിരുവനന്തപുരം: മാർ ഈവാനിയോസ് കോളജ് ഗ്രൗണ്ട്​ ആർ.എസ്.​എസ്​ പരിശീലനത്തിന്​ വിട്ടുനൽകിയതിനെതിരെ എസ്.​എഫ്.​ഐയും കെ.എസ്.​യുവും. വിദ്യാഭ്യാസ സ്ഥാപനങ്ങളെയും ആരാധനാലയങ്ങളെയും ആയുധപരിശീലനത്തിന് ഉപയോഗിക്കുന്ന ആർ.എസ്.​എസിന്റെ പ്രവൃത്തികൾ തികച്ചും അപലപനീയവും ഭരണഘടനവിരുദ്ധവുമാണെന്ന്​ എസ്.​എഫ്.​ഐ തിരുവനന്തപുരം ജില്ല കമ്മിറ്റി പ്രസ്താവനയിൽ വ്യക്തമാക്കി.

മാർ ഈവാനിയോസ് കോളജ്​ ഗ്രൗണ്ട് ആയുധ പരിശീലനത്തിന് വിട്ടുനൽകിയ നടപടി തീർത്തും വർഗീയതയും അക്രമവാഴ്ചയെ പ്രോത്സാഹിപ്പിക്കുന്നതുമായതിനാൽ ആയുധപരിശീലനം അവസാനിപ്പിക്കാൻ വേണ്ട നടപടി സ്വീകരിക്കണമെന്നും എസ്​.എഫ്.​ഐ ആവശ്യപ്പെട്ടു.

മാർ ഈവാനിയോസ്​ കോളജ്​ ഗ്രൗണ്ട്​ വർഷങ്ങളായി രാഷ്​ട്രീയ പരിപാടികൾക്കോ വിദ്യാർഥി രാഷ്​ട്രീയ സംഘടനകൾക്കോ ഉപയോഗിക്കാൻ അനുമതി നിഷേധിച്ചിരുന്ന കോളജ്​ മാനേജ്​മെന്‍റ്​ ഒരു സുപ്രഭാതത്തിൽ ആർ.എസ്.​എസിന്​ തീറെഴുതിക്കൊടുത്ത നിലപാട്​ പ്രതിഷേധാർഹമാണെന്ന്​ കെ.എസ്.​യു കോളജ്​ യൂനിറ്റ്​ കമ്മിറ്റി അറിയിച്ചു.

ഏപ്രിൽ 18 മുതൽ മേയ്​ രണ്ടു​ വരെ ആർ.എസ്.​എസ്​ പരിശീലനത്തിന്​ ഗ്രൗണ്ട്​ വിട്ടുനൽകിയപ്പോൾ ദുഃഖ വെള്ളിയാഴ്​ച ആർ.എസ്.​എസ്​ ക്യാമ്പ്​ നടക്കു​മ്പോൾ ജയിൽ മോചിതനായ മഹേന്ദ്ര ഹെംബ്രാം ആരായിരുന്നു എന്നുകൂടി കോളജ്​ മാനേജ്​മെന്‍റ്​​ ഓർക്കുന്നത്​ നല്ലതായിരിക്കുമെന്നും കെ.എസ്​.യു ചൂണ്ടിക്കാട്ടി.