സുപ്രീംകോടതി ഉത്തരവ്​ അടിച്ചമർത്താൻ ശ്രമിച്ചവർക്കുള്ള തിരിച്ചടി -ശ്രീധരൻപിള്ള

എര​ുമേലി: ശബരിമലയിലെ സ്​ത്രീ പ്രവേശനവുമായി ബന്ധപ്പെട്ട സുപ്രീംകോടതി ഉത്തരവ് സ്വാഗതാര്‍ഹമാണെന്നും അടിച്ചമർത്താൻ ശ്രമിച്ചവർക്കുള്ള തിരിച്ചടിയാ​ണിതെന്നും ബി.ജെ.പി സംസ്ഥാന പ്രസിഡൻറ്​ പി.എസ്​. ശ്രീധരൻപിള്ള. സ്​ത്രീ പ്രവേശനവുമായി ബന്ധ​െപ്പട്ട പുനഃപരിശോധന ഹരജികൾ തുറന്ന കോടതിയിൽ കേൾക്കുമെന്ന ​സുപ്രീംകോടതി ഉത്തരവിനോട്​ പ്രതികരിക്കുകയായിരുന്നു അദ്ദേഹം.

കേരളത്തെ കലാപഭൂമിയാക്കി മാറ്റിയ മുഖ്യമന്ത്രിയും സി.പി.എം നേതാക്കളും പരസ്യമായി മാപ്പുപറഞ്ഞ് കളങ്കത്തില്‍നിന്ന്​ കേരളത്തെ രക്ഷിക്കണം. വിധി പകര്‍പ്പ് ലഭിക്കും മുമ്പ് അത്​ നടപ്പാക്കുമെന്ന് പറഞ്ഞ് ശബരിമലയിൽ സംഘര്‍ഷഭരിതമായ അന്തരീക്ഷം ഉണ്ടാക്കിയ ഇടതുപക്ഷം വിവാദം ഇരന്നുവാങ്ങുകയായിരുന്നു. സുപ്രീംകോടതി തീരുമാനം നല്ല ചുവടുവെപ്പാണ്​. പുനഃപരിശോധന ഹരജികൾ അപൂർവങ്ങളിൽ അപൂർവമായി മാത്രമേ പരിഗണിക്കുകയുള്ളൂ. അന്തിമ തീരുമാനം വരുന്നതുവരെ വിധി നടപ്പാക്കുന്നതിൽനിന്ന്​ സർക്കാർ വിട്ടുനിൽക്കണം.

ഇത്രയും കാലം വിശ്വാസികൾ പറഞ്ഞ കാര്യം ശരിയാണെന്ന് തെളിഞ്ഞു. ജനങ്ങളുടെ വികാരം കോടതിയില്‍ ബോധിപ്പിക്കേണ്ടവര്‍ കുറ്റകരമായ മൗനമാണ് പാലിച്ചത്.ജനഹിതമെന്താണെന്ന് അറിയിക്കാനുള്ള ധാർമികവും നിയമപരവുമായ ചുമതല സംസ്ഥാന​െത്ത ഭരണകൂടത്തിനും ദേവസ്വം ബോര്‍ഡിനുമുണ്ട്. ഇത്​ ചെയ്യാതെ ഒഴിഞ്ഞുമാറിയതിലൂടെ അവർ വിശ്വാസികളെ ചതിക്കുകയായിരുന്നു. സുപ്രീംകോടതി ഉത്തരവ്​ വിശ്വാസികൾ നേടിയ വിജയമാണ്​. സത്യത്തിനും ധർമത്തിനുമായി എൻ.ഡി.എ നടത്തുന്ന സമരത്തിന് അനുകൂലമായി കിട്ടിയ അനുഗ്രഹമായാണ് കാണുന്നതെന്നും അദ്ദേഹം പറഞ്ഞു.