സന്ദീപിനെയും കാമുകിയെയും കോടതിയിൽ ഹാജരാക്കി; ബന്ധുക്കൾക്കൊപ്പം വിട്ടു

പന്തീരാങ്കാവ് (കോഴിക്കോട്​): മുംബൈയിൽനിന്ന് പൊലീസ് പിടികൂടി കോഴിക്കോട്ടെത്തിച്ച പാലാഴി ഹൈലൈറ്റ് മാളിലെ സ്വകാര്യ കമ്പനി മാർക്കറ്റിങ്​ മാനേജർ കുറ്റ്യാടി മൊകേരി സ്വദേശി എസ്. സന്ദീപിനേയും കാമുകിയേയും കോടതിയിൽ ഹാജരാ ക്കി ബന്ധുക്കൾക്കൊപ്പം വിട്ടു. ബൈക്ക് യാത്രക്കിടെ കർണാടകയിലെ ശൃംഗേരിയിൽ വെച്ച് കാണാതായെന്ന ബന്ധുക്കളുടെ പരാ തിയെത്തുടർന്ന്​ നല്ലളം പൊലീസ് നടത്തിയ അന്വേഷണത്തിലാണ്​ ഇരുവരേയും കഴിഞ്ഞദിവസം മുംബൈയിൽ വെച്ച് പൊലീസ് കണ്ടെത്തിയത്. സൗത്ത് അസി. കമീഷണർ കെ.പി. അബ്​ദുൽ റസാഖി​​​െൻറ നേതൃത്വത്തിൽ രൂപവത്​കരിച്ച സംഘമാണ് ഇവരെ പിടികൂടിയത്.

സംഭവത്തെക്കുറിച്ച് പൊലീസ് പറയുന്നത് ഇങ്ങ​െന. നവംബർ 25ന് ശൃംഗേരിക്ക് സമീപം ബൈക്ക് ഉപേക്ഷിച്ച സന്ദീപ് അന്വേഷണം വഴിതിരിച്ചുവിടാനാണ് വാച്ചി​​​െൻറ സ്ട്രാപ് പൊട്ടിച്ച് ഉപേക്ഷിച്ചത്. തുടർന്ന് മംഗളൂരുവിലും ഗോവയിലും മുംബൈയിലും താമസിച്ചു. സന്ദീപ് ഒളിവിൽപോയി 15 ദിവസത്തിന് ശേഷമാണ് പൊറ്റമ്മൽ സ്വദേശിനിയായ പെൺകുട്ടിയെ കാണാതായത്. ഗോവയിൽനിന്ന്​ ഇരുവരും ഒന്നിച്ച് മുംബൈയിലെത്തി.

പെൺകുട്ടി മെസഞ്ചർ വഴി മറ്റൊരു സുഹൃത്തിൽനിന്ന് വിവരങ്ങൾ തേടിയതാണ് കേസിലെ വഴിത്തിരിവുകളിലൊന്ന്. തുടർന്ന് സന്ദീപി​​​െൻറ താമസസ്ഥലം മനസ്സിലാക്കിയ പൊലീസ് മുംബൈയിലെത്തിയെങ്കിലും ഇയാൾ പഞ്ചാബിലേക്ക് പോയിരുന്നു. ദിവസങ്ങൾക്കുശേഷം തിരിച്ചെത്തിയപ്പോഴാണ് മുംബൈ പൊലീസി​​​െൻറ സഹായത്തോടെ പിടികൂടിയത്. ഓൺലൈൻ വഴി പരിചയപ്പെട്ട ട്രാൻസ്ജെൻഡർ സുഹൃത്തി​​​െൻറ വീട്ടിലാണ് ഇവർ താമസിച്ചിരുന്നത്. നല്ലളം സ്​റ്റേഷനിലെ എസ്.ഐ കെ. രാമകൃഷ്ണൻ, ഒ. മോഹൻദാസ്, കെ. അബ്​ദുറഹ്​മാൻ, രമേഷ് ബാബു, മനോജ്, റൻവീർ, സുജിത്, ഷാഫി തുടങ്ങിയവരടങ്ങിയ സംഘമാണ് ഇവരെ പിടികൂടിയത്.