ഒടുവിൽ പൊലീസ്​ ഉണർന്നു; സ്ത്രീയെ ആക്രമിച്ച്​ രക്ഷ​പ്പെട്ടയാൾക്കെതിരെ ലൈംഗികാതിക്രമകുറ്റവും

തിരുവനന്തപുരം: മ്യൂസിയത്തിന്​ സമീപം സ്ത്രീയെ ആക്രമിച്ച്​ രക്ഷപ്പെട്ടയാൾക്കെതിരെ ലൈംഗികാതിക്രമകുറ്റവും ചുമത്തി. സംഭവം നടന്ന്​ മൂന്ന്​ ദിവസമായിട്ടും പ്രതിയെ പിടികൂടുന്നതിലും കേസെടുക്കുന്നതിലും മ്യൂസിയം പൊലീസ്​ കാട്ടിയ അലംഭാവം വിവാദമായതിനെ തുടർന്നാണ്​ ലൈംഗികാതിക്രമകുറ്റം ചുമത്തിയത്​. പൊലീസിന്‍റെ വീഴ്ചക്കെതിരെ പരാതിക്കാരി പരസ്യമായി രംഗത്തെത്തി.

ബുധനാഴ്ച പുലർച്ച അഞ്ചോടെ മ്യൂസിയത്തിൽ നടക്കാനെത്തിയ സ്ത്രീക്കുനേരെയാണ് ആക്രമണമുണ്ടായത്. അക്രമിയുടെ സി.സി.ടി.വി ദൃശ്യങ്ങൾ പുറത്തുവന്നു​. അക്രമിയെ പിടികൂടാൻ സ്ത്രീ പിന്നാലെ ഓടുന്നതും നിലത്ത്​ വീഴുന്നതുമെല്ലാം ദൃശ്യങ്ങളില്‍ കാണാം. കാറിലെത്തിയയാളാണ്​ അതിക്രമം കാട്ടിയത്​. എൽ.എം.എസിന്​ സമീപം കാർ പാർക്ക്​ ചെയ്​തശേഷം എത്തിയ അക്രമി സ്ത്രീയെ കടന്നുപിടിക്കുകയായിരുന്നത്രേ.

അവർ ബഹളം വെച്ചതിനെ തുടർന്ന്​ മ്യൂസിയം വളപ്പിലേക്ക്​ ഓടിക്കയറി​. പിന്നാലെ സ്ത്രീയും ഓടി. പിന്നീട്​ മ്യൂസിയത്തെ പൊലീസ്​ എയ്​ഡ്​ പോസ്റ്റിൽ വിവരമറിയിച്ചു. അപ്പോൾതന്നെ പരിശോധന നടത്തിയിരുന്നെങ്കിൽ അക്രമിയെ പിടിക്കാമായിരുന്നു. തുടർന്ന്​ മ്യൂസിയം പൊലീസിൽ പരാതി നൽകി. പൊലീസിൽനിന്ന്​ തണുപ്പൻ സമീപനമാണുണ്ടായത്​. ജാമ്യം ലഭിക്കുന്ന വകുപ്പ്​ ചുമത്തിയാണ്​ കേസെടുത്തത്​.

സി.സി.ടി.വി ദൃശ്യങ്ങൾ പരിശോധിച്ചാൽ കാർ നമ്പർ വെച്ച് പ്രതിയെ കണ്ടെത്താനാകില്ലേ എന്ന് ചോദിച്ചപ്പോൾ മ്യൂസിയത്തിലെ പല കാമറകളും പ്രവർത്തനക്ഷമമല്ലെന്നായിരുന്നു മറുപടി ലഭിച്ചതെന്ന്​ പരാതിക്കാരി പറഞ്ഞു. മൂന്നുവർഷം മുമ്പ്​ ഈ സ്ഥലത്തിന്​ വിളിപ്പാടകലെ മാധ്യമപ്രവർത്തകൻ കെ.എം. ബഷീറിനെ കാറിടിച്ച്​ കൊലപ്പെടുത്തിയപ്പോഴും ഇതേ പല്ലവിയായിരുന്നു മ്യൂസിയം പൊലീസിന്‍റേത്​. പൊലീസിൽനിന്ന്​ നീതി കിട്ടുന്നില്ലെന്നും അവരിലുള്ള വിശ്വാസം നഷ്ടമായെന്നും പരാതിക്കാരി പറഞ്ഞു.