സി.ഐ ക്രിസ്പിൻ സാമിന് ജാമ്യം

കൊച്ചി/പറവൂർ: വരാപ്പുഴയിൽ ശ്രീജിത്ത് കസ്​റ്റഡിയിൽ മരിച്ച സംഭവത്തിൽ നോർത്ത് പറവൂർ സി.​െഎ ക്രിസ്പിൻ സാമിെന അറസ്​റ്റ്​ ചെയ്ത് ജാമ്യത്തിൽവിട്ടു. ചൊവ്വാഴ്ച വൈകീട്ടോടെ അറസ്​റ്റ്​ ചെയ്ത സി.ഐയെ ബുധനാഴ്ച പറവൂർ മജിസ്ട്രേറ്റ് കോടതിയിൽ ഹാജരാക്കി. തുടർന്ന്​ കോടതി ജാമ്യം നൽകി. ആലുവ പൊലീസ് ക്ലബിൽ ഐ.ജി എസ്. ശ്രീജിത്തി​​െൻറ നേതൃത്വത്തിലുള്ള സംഘത്തി​​െൻറ ചോദ്യം ചെയ്യലിന് പിന്നാലെയായിരുന്നു അറസ്​റ്റ്​. അന്യായമായി തടങ്കലിൽ വെക്കൽ, തെറ്റായ രേഖകൾ ചമക്കൽ എന്നിവയാണ് ക്രിസ്പിൻ സാമിനെതിരെ ചുമത്തിയ കുറ്റങ്ങൾ. ഇവ രണ്ടും ജാമ്യം ലഭിക്കാവുന്ന വകുപ്പുകളാണ്. സംഭവം നടന്ന സമയത്ത് സി.ഐ ക്രിസ്പിൻ സാമിനായിരുന്നു​ വരാപ്പുഴ സ്​റ്റേഷ​​​െൻറ ചുമതല.

ശ്രീജിത്ത് കസ്​റ്റഡിയിൽ കൊല്ലപ്പെട്ട സംഭവത്തിൽ സി.ഐക്ക് നേരിട്ട് പങ്കുണ്ടെന്നതിന് തെളിവ് ലഭിച്ചിട്ടില്ലെന്ന് അന്വേഷണ സംഘം കോടതിയിൽ അറിയിച്ചു. സി.ഐയെ കസ്​റ്റഡിയിൽ ചോദ്യംചെയ്യേണ്ട ആവശ്യമില്ലെന്നും  വ്യക്തമാക്കി. അതേസമയം, ജാമ്യാപേക്ഷയെ പ്രോസിക്യൂഷൻ എതിർത്തു. ഉന്നത ബന്ധങ്ങളുള്ള വ്യക്തിയാണെന്നും ജാമ്യം നൽകിയാൽ സാക്ഷികളെ സ്വാധീനിക്കാൻ സാധ്യതയുണ്ടെന്നും അതിനാൽ ജാമ്യം നൽകരുതെന്നും അവർ കോടതിയിൽ അറിയിച്ചു. എന്നാൽ, നിലവിൽ ചുമത്തിയ വകുപ്പുകൾ ജാമ്യം അനുവദിക്കാവുന്നവയാണെന്ന്​ നിരീക്ഷിച്ചാണ്​ കോടതി ജാമ്യം നൽകിയത്. ഒരു ലക്ഷം രൂപയുടെയും രണ്ട്​ ആൾജാമ്യത്തി​​െൻറ ഈടിലുമാണ് ജാമ്യം അനുവദിച്ചത്​. ആവശ്യപ്പെടുമ്പോൾ അന്വേഷണ സംഘത്തിന്​ മുന്നിൽ ഹാജരാകണം. 

കേസിൽ അഞ്ചാം പ്രതിയാണ്​ ക്രിസ്പിൻ സാം. വരാപ്പുഴ സ്​റ്റേഷ​​​െൻറ ചുമതലയുണ്ടായിരുന്ന സി.ഐക്ക് ദേവസ്വംപാടത്തെ ആക്രമണങ്ങളുടെ പശ്ചാത്തലത്തില്‍ പിടികൂടിയ ശ്രീജിത്തി​​െൻറ അറസ്​റ്റ്​ രേഖപ്പെടുത്തിയത്​ ഉള്‍പ്പെടെ കാര്യങ്ങളിലുണ്ടായ മേല്‍നോട്ടപ്പിഴവാണ്​ വിനയായത്. ഏപ്രില്‍ ആറിന്​ രാത്രിയില്‍ കസ്​റ്റഡിയിലെടുത്ത ശ്രീജിത്തിനെ ഏഴിന്​ രാവിലെ വീട്ടില്‍നിന്ന്​ പിടികൂടി അറസ്​റ്റ്​ ചെയ്തുവെന്നാണ്​ രേഖപ്പെടുത്തിയത്. 

അതേസമയം, ആലുവ മുൻ റൂറൽ എസ്.പി എ.വി ജോർജിനെ വരും ദിവസങ്ങളിൽ ചോദ്യം ചെയ്തേക്കുമെന്നാണ് സൂചന. എ.വി. ജോർജി​​െൻറ പ്രത്യേക സ്ക്വാഡായ റൂറൽ ടൈഗർ ഫോഴ്സാണ് ശ്രീജിത്തിനെ വീട്ടിലെത്തി അറസ്​റ്റ്​ ചെയ്തതും ആദ്യം മർദിച്ചതും. ഇതി​​െൻറ അടിസ്ഥാനത്തിൽ ഇദ്ദേഹത്തെ തൃശൂർ പൊലീസ് ട്രെയിനിങ് അക്കാദമിയിലേക്ക് സ്ഥലം മാറ്റിയിരുന്നു. ആർ.ടി.എഫിന് എസ്.പിയുടെ നിർദേശമില്ലാതെ ഇവിടെയെത്തി അറസ്​റ്റ്​ ചെയ്യാൻ കഴിയില്ലെന്നും അതിനാൽ പ്രതിചേർക്കണമെന്നും ആവശ്യമുയർന്നിരുന്നു.  ഡിവൈ.എസ്.പി പ്രഫുല്ലചന്ദ്രനെ ചോദ്യം ചെയ്തതായി സൂചനയുണ്ട്. സംഭവം നടക്കുന്ന സമയത്ത് ആലുവ ഡിവൈ.എസ്.പിയായിരുന്നു എന്നതിനാലാണ് ഇദ്ദേഹത്തെ ചോദ്യം ചെയ്തത്. 
അതേസമയം, നേര​േത്ത അറസ്​റ്റിലായ വരാപ്പുഴ എസ്​.​െഎ. ദീപക്കി​​​െൻറയും മൂന്ന്​ ആർ.ടി.എഫ്​ അംഗങ്ങളുടെയും ജുഡീഷ്യൽ കസ്​റ്റഡി മേയ്​ 15 വരെ നീട്ടി.