പരീക്ഷ ഹാളിൽ നിന്ന്​ ഇറക്കിവിട്ട വിദ്യാർഥിനി ട്രെയിനിന്​ മുന്നിൽ ചാടി മരിച്ചു

കൊല്ലം: കോപ്പിയടിച്ചതായി ആരോപിച്ച്​ പരീക്ഷഹാളിൽനിന്ന്​ ഇറക്കിവിട്ട വിദ്യാർഥിനി ട്രെയിനിന്​ മുന്നിൽ ചാടി മരിച്ചു. കൊല്ലം ഫാത്തിമ മാത നാഷനൽ കോളജിലെ ബി.എ ഇംഗ്ലീഷ്​ ഒന്നാം വർഷ വിദ്യാർഥിനി ഇരവിപുരം കൂട്ടിക്കട രാഖിഭവനിൽ രാഖികൃഷ്​ണയാണ്​ മരിച്ചത്​. ഉച്ചക്ക്​ 12.30ഓടെ തിരുവനന്തപുരത്തുനിന്ന്​ കൊല്ലത്തേക്ക്​ വന്ന കേരള എക്​സ്​പ്രസിന്​ മുന്നിലാണ്​ ചാടിയത്​. തൽക്ഷണം മരിച്ചു. എ.ആർ ക്യാമ്പിന്​ സമീപത്തെ ട്രാക്കിലാണ്​ അപകടം​.

സംഭവത്തെക്കുറിച്ച്​ വിദ്യാർഥികൾ പറയുന്നത്​: ഒന്നാം സെമസ്​റ്റർ പരീക്ഷ തുടങ്ങി മുക്കാൽ മണിക്കൂർ കഴിഞ്ഞപ്പോൾ രാഖിയുടെ ചുരിദാറി​​​​െൻറ ടോപ്പിൽ എ​േന്താ എഴുതിയിരിക്കുന്നത്​ അധ്യാപികയുടെ ശ്രദ്ധയിൽപെട്ടു. തുടർന്ന്​ രാഖിയെ എഴുന്നേൽപിച്ചു നിർത്തുകയും ശാസിക്കുകയും ചെയ്തു. പരീക്ഷ സ്ക്വാഡ്​ അംഗം ചുരിദാറി​ൽ എഴുതിയ ഭാഗം ഫോ​േട്ടായെടുക്കുകയും ഡീബാർ ചെയ്യുമെന്ന്​ മുന്നറിയിപ്പ്​ നൽകുകയും ചെയ്​തു. തുടർന്ന്, രാഖിയെയും കൂട്ടി സ്​റ്റാഫ്​ റൂമിലേക്ക്​ പോയി. കോളജിൽനിന്ന് വീട്ടിലേക്ക് വിളിച്ച് ആരെങ്കിലും ഉടൻ വരാൻ ആവശ്യപ്പെട്ടു. കുറച്ചുനേരം സ്​റ്റാഫ്​ റൂമിലിരുന്ന രാഖി ഇറങ്ങിപ്പോയി. കോളജ്​ അധികൃതർ തിരച്ചിൽ നടത്തിയെങ്കിലും കണ്ടെത്താനായില്ല. ഉച്ചക്ക് ഒന്നോടെയാണ് രാഖി ട്രെയിൻ തട്ടി മരിച്ച വിവരം കോളജിൽ അറിഞ്ഞത്.

രാഖിയുടെ ചുരിദാറിൽ എഴുതിയിരുന്നത്​ ബുധനാഴ്ചത്തെ പരീക്ഷയുമായി ബന്ധമില്ലാത്തതാണെന്ന് സഹപാഠികൾ പറഞ്ഞു. അധ്യാപികയുടെ പെരുമാറ്റമാണ്​ പഠിക്കാൻ മിടുക്കിയായ രാഖിയുടെ ആത്മഹത്യക്കുകാരണമെന്നും അവർ ആ​േരാപിച്ചു. അപകടം നടന്ന സ്ഥലത്തേക്ക് കോളജിൽനിന്ന്​ ഒന്നര കിലോമീറ്ററിലധികം ദൂരമുണ്ട്​​. ഇത്രദൂരം വിദ്യാർഥിനി പോകുന്നതിനിടെ കോളജ്​ അധികൃതർ ​ പൊലീസിനെയോ മറ്റു വിദ്യാർഥികളെയോ അറിയിച്ചില്ലെന്നും ആരോപണമുണ്ട്​. സംഭവത്തിൽ വിദ്യാർഥികൾ പ്രിൻസിപ്പലിനെ തടഞ്ഞുവെച്ചു. യുവജനകമീഷൻ സ്വമേധയാ കേസെടുത്തു. മൃതദേഹം ജില്ല ആശുപത്രി മോർച്ചറിയിൽ.

സംഭവത്തിൽ അധ്യാപകർക്ക് പങ്കുണ്ടെങ്കിൽ നടപടിയെടുക്കുമെന്ന് ഫാത്തിമ മാത നാഷനൽ കോളജ് വൈസ് പ്രിൻസിപ്പൽ ഡോ. ഷെല്ലി അറിയിച്ചു. അന്വേഷണത്തിന്​ ആഭ്യന്തര അന്വേഷണ കമീഷനെ നിയോഗിക്കുമെന്നും അവർ പറഞ്ഞു.