തൂ​വെ​ള്ള ഖ​ദ​റു​പോ​ൽ... വിടവാങ്ങി തെന്നല

തി​രു​വ​ന​ന്ത​പു​രം: കോ​ൺ​ഗ്ര​സ് രാ​ഷ്ട്രീ​യ​ത്തി​ലെ ത​ർ​ക്ക​കാലങ്ങളിലെ കൊ​ടു​ങ്കാ​റ്റു​ക​ൾ​ക്ക് ന​ടു​വി​ൽ എ​ന്നും സ​മ​ന്വ​യ​ത്തി​ന്റെ​യും ഒ​ത്തു​തീ​ർ​പ്പി​ന്റെ​യും കു​ളി​ർ തെ​ന്ന​ലാ​യിരുന്ന തെ​ന്ന​ല വീ​ട്ടി​ൽ ബാ​ല​കൃ​ഷ്ണ​പി​ള്ള വിടവാങ്ങിയിരിക്കുന്നു. പ്ര​ശ്ന​ഘ​ട്ട​ങ്ങ​ളി​​ൽ അദ്ദേഹം പ​രി​ഹാ​രം നി​ർ​ദേ​ശി​ക്കും, ചി​ല​പ്പോ​ൾ സ്വ​യം പ​രി​ഹാ​ര​മാ​യും മാ​റും. ഗ്രൂ​പ്​ വ്യാ​ധിയിൽ മ​രു​ന്നു​ക​ളെ​ല്ലാം പ​രാ​ജ​യ​പ്പെ​ടു​മ്പോൾ തെ​ന്ന​ല​യെ​ന്ന പ്ര​ത്യേ​ക ചി​കി​ത്സ വി​ധി കോ​ൺ​ഗ്ര​സി​ൽ പ​രീ​ക്ഷി​ക്ക​പ്പെ​ട്ടു.

1989ൽ ത​ദ്ദേ​ശ തെ​ര​ഞ്ഞെ​ടു​പ്പി​നെ ചൊ​ല്ലി​യു​ണ്ടാ​യ ത​ർ​ക്ക​ത്തി​ലും കെ.​പി.​സി.​സി അ​ധ്യ​ക്ഷ തെ​ര​ഞ്ഞെ​ടു​പ്പി​ലും 1992ലെ ​സം​ഘ​ട​ന തെ​ര​ഞ്ഞെ​ടു​പ്പി​ൽ ഗ്രൂ​പ്പു​ക​ൾ കൊ​മ്പു​കോ​ർ​ത്ത​പ്പോ​ഴും 96ൽ ​വീ​ണ്ടും ത​ദ്ദേ​ശ തെ​ര​ഞ്ഞെ​ടു​പ്പി​നെ​ച്ചൊ​ല്ലി ത​ർ​ക്ക​മു​ണ്ടാ​യ​പ്പോ​ഴു​മെ​ല്ലാം ‘ക്രൈ​സി​സ്​ മാ​നേ​ജ​റാ​യ’ തെ​ന്ന​ല എ​ഴു​​ന്നേ​റ്റു​നി​ന്നു. പാ​ർ​ട്ടി​യു​ടെ ത​ള​ർ​ച്ച ഘ​ട്ട​ങ്ങ​ളി​ൽ പി​ടി​ച്ചു​കൊ​ണ്ടു​വ​ന്ന്​ ചു​മ​ത​ല​യേ​ൽ​പി​ക്കു​മെ​ങ്കി​ലും അ​ധി​കാ​ര​ത്തി​ന്‍റെ സ​മൃ​ദ്ധി​കാ​ല​ങ്ങ​ളി​ൽ കൈ​വി​ട്ട​തി​ന്‍റെ ക​റു​ത്ത അ​ധ്യാ​യ​ങ്ങ​ളും തെ​ന്ന​ല​യു​ടെ ജീ​വി​ത​ത്തി​ലു​ണ്ട്.

ഇ​ത്ത​രം ഇ​റ​ക്കി​വി​ട​ലു​ക​ളി​​ലെ​ല്ലാം സ​മാ​ശ്വാ​സ വാ​ക്കു​ക​ൾ​ക്ക്​ ചെ​വി​കൊ​ടു​ക്കാ​തെ തോ​ള​ത്തു​നി​ന്ന് തോ​ർ​ത്തു​മു​ണ്ട്​ ഊ​രി വീ​ണ ലാ​ഘ​വ​ത്തോ​ടെ ഒ​രു പ​രി​ഭ​വ​വും പ​റ​യാ​തെ അ​ദ്ദേ​ഹം ന​ട​ന്നു​നീ​ങ്ങി. ഊ​ർ​ജ​ത​ന്ത്ര​ത്തി​ലും ഗ​ണി​ത​ത്തി​ലു​മാ​യി​രു​ന്നു ബി​രു​ദ​മെ​ങ്കി​ലും കോ​ൺ​ഗ്ര​സി​ലെ ദു​ർ​ഗ്ര​ഹ​മാ​യ സ​മ​വാ​ക്യ​ങ്ങ​ളി​ൽ അ​​ദ്ദേ​ഹം മികച്ച കണക്കുകൂട്ടലുാകാരനായി. കോ​ൺ​ഗ്ര​സ് ക​ന​ത്ത പ​രാ​ജ​യം ഏ​റ്റു​വാ​ങ്ങി​യ നി​യ​മ​സ​ഭ തെ​ര​ഞ്ഞെ​ടു​പ്പു​ക​ൾ പ​ല​തി​ലും കാ​ലു​വാ​ര​ലു​ക​ൾ അ​ന്വേ​ഷി​ക്കാ​ൻ നി​യോ​ഗി​ക്ക​പ്പെ​ട്ട​ത് തെ​ന്ന​ല​യെ​യാ​ണ്. കെ. ​ക​രു​ണാ​ക​ര​ൻ ലോ​ക്സ​ഭ തെ​ര​ഞ്ഞെ​ടു​പ്പി​ൽ പ​രാ​ജ​യ​പ്പെ​ട്ട​പ്പോ​ഴും ക​ണ്ണൂ​ർ ഡി.​ഐ.​ജി ഓ​ഫി​സ് മാ​ർ​ച്ചി​ൽ കോ​ൺ​ഗ്ര​സു​കാ​ർ പ​ര​സ്പ​രം ത​ല്ലി​യ​പ്പോ​ഴു​മെ​ല്ലാം അ​ന്വേ​ഷ​ണ ക​മീ​ഷ​ൻ ന​യി​ച്ച് തെ​ന്ന​ല​യെ​ത്തി.

മാ​ത്സ​ര്യ​മി​ല്ലാ​ത്ത മ​നോ​ഭാ​വം

പ​ര​മ്പ​രാ​ഗ​ത​മാ​യി വ​ലി​യ പ്ര​മാ​ണി​മാ​രാ​യി​രു​ന്നു കു​ടും​ബം. സ​മീ​പ​ത്തെ മ​ണ​പ്പ​ള്ളി മി​ഡി​ൽ സ്കൂ​ളി​ലാ​യി​രു​ന്നു സ്കൂ​ൾ വി​ദ്യാ​ഭ്യാ​സം. മി​ഡി​ൽ സ്കൂ​ൾ ക​ഴി​ഞ്ഞ്​ തു​ട​ർ വി​ദ്യാ​ഭ്യാ​സ​ത്തി​നാ​യി തി​രു​വ​ന​ന്ത​പു​ര​ത്ത്. പെ​രു​ന്താ​ന്നി​യി​ലെ കോ​ള​ജി​ലാ​യി​രു​ന്നു (ഇന്നത്തെ എം.ജി കോളജ്) കാ​മ്പ​സി​ൽ വി​ദ്യാ​ർ​ഥി കോ​ൺ​ഗ്ര​സി​ന്റെ ചെ​റി​യൊ​രു പ്ര​വ​ർ​ത്ത​ക​ൻ മാ​ത്രം. പഠനാനന്തരം, നേ​ര​ത്തെ ത​ന്നെ കോ​ൺ​ഗ്ര​സ് മെം​ബ​ർ ആ​യി​രു​ന്ന തെ​ന്ന​ല പാ​ർ​ട്ടി​യു​ടെ വാ​ർ​ഡ് ക​മ്മി​റ്റി പ്ര​സി​ഡ​ന്‍റാ​യി. പി​ന്നാ​ലെ ബ്ലോ​ക്ക്​ പ്ര​സി​ഡ​ന്‍റും ഡി.​സി.​സി-​കെ.​പി.​സി.​സി ഭാ​ര​വാ​ഹി​ത്വ​വും. ഒ​രു മ​ത്സ​ര​ത്തി​നും മു​തി​ർ​ന്നി​ല്ല. ചു​മ​ത​ല​ക​ളി​ലേ​ക്ക്​ പി​ടി​ച്ചു​ക​യ​റ്റു​ക​യാ​യി​രു​ന്നു എ​ന്ന​താ​യി​രു​ന്നു വാ​സ്ത​വം.

സത്യപ്രതിജ്ഞ വരെ മാത്രം അധ്യക്ഷൻ

1998ൽ ​കെ.​പി.​സി.​സി അ​ധ്യ​ക്ഷ​ച​ർ​ച്ച​ക​ളെ​ല്ലാം ​ഗ്രൂ​പ്​ ത​ർ​ക്ക​ത്തി​ൽ ത​ക​ർ​ന്ന​ടി​യു​ന്ന ഘ​ട്ടം. ഐ ​വി​ഭാ​ഗ​ത്തി​ന്റെ നോ​മി​നി എ​ന്ന നി​ല​യി​ൽ കെ. ​മു​ര​ളീ​ധ​ര​നെ ത​ന്നെ കെ.​പി.​സി.​സി അ​ധ്യ​ക്ഷ​നാ​ക്ക​ണം എ​ന്നാ​യി​രു​ന്നു ക​രു​ണാ​ക​ര​ന്റെ ക​ടും​പി​ടു​ത്തം. പാ​ന​ലി​ൽ മു​ര​ളി ഒ​ഴി​കെ 12ഓ​ളം പേ​രു​ക​ളി​ൽ ആ​രെ വേ​ണ​മെ​ങ്കി​ലും അം​ഗീ​ക​രി​ക്കാം എ​ന്നാ​യി എ ​വി​ഭാ​ഗം. ‘മു​ര​ളി അ​ല്ലെ​ങ്കി​ൽ തെ​ര​ഞ്ഞെ​ടു​പ്പ്’ എ​ന്ന​താ​യി​രു​ന്നു ക​രു​ണാ​ക​ര നി​ല​പാ​ട്. അ​ങ്ങ​നെ​യാ​ണ് സ​മ​വാ​യ പ്ര​സി​ഡ​ന്‍റാ​യി തെ​ന്ന​ല​യെ​ത്തു​ന്ന​ത്.

2001ലെ ​നി​യ​മ​സ​ഭ തെ​ര​ഞ്ഞെ​ടു​പ്പി​ൽ 101 സീ​റ്റ് നേ​ടി കോ​ൺ​ഗ്ര​സ്​ അ​ധി​കാ​ര​ത്തി​ലെ​ത്തു​ന്ന​ത്​ ഈ ​ഘ​ട്ട​ത്തി​ലാ​ണ്. സത്യ​ത്രിജ്ഞാചടങ്ങിന്റെ ആരവം ​കഴിയുംമുമ്പേ ആ ​പ​ദ​വി​യി​ൽ​നി​ന്ന്​ തെ​ന്ന​ല​ക്ക്​ ഇ​റ​ങ്ങേ​ണ്ടി​വ​ന്നു. കോ​ൺ​ഗ്ര​സി​ന് ഭൂ​രി​പ​ക്ഷം കി​ട്ടി​യാ​ൽ എ.​കെ. ആ​ൻ​റ​ണി മു​ഖ്യ​മ​ന്ത്രി​യാ​കും, പ​ക​രം കെ.​പി.​സി.​സി പ്ര​സി​ഡ​ന്‍റ്​ സ്ഥാ​നം കെ. ​മു​ര​ളീ​ധ​ര​ന്​ ന​ൽ​ക​ണം എ​ന്ന​താ​യി​രു​ന്നു ഗ്രൂ​പ്പു​ക​ളു​ടെ ധാ​ര​ണ. തൈ​ക്കാ​ട് ഗെ​സ്റ്റ്ഹൗ​സി​ലേ​ക്ക്​ തെ​ന്ന​ല​യെ വി​ളി​പ്പി​ച്ച ഹൈ​ക​മാ​ൻ​ഡ് പ്ര​തി​നി​ധി ഗു​ലാം​ന​ബി ആ​സാ​ദ്​ രാ​ജി ആ​വ​ശ്യ​പ്പെ​ട്ടു. തെ​ന്ന​ല കൊ​ടു​ങ്കാ​റ്റാ​കു​മോ എ​ന്ന്​ പേ​ടി​ച്ച നേ​താ​ക്ക​​​ളോ​ട്​ എ​പ്പോ​ൾ രാ​ജി​വെ​ക്ക​ണ​മെ​ന്നാ​യി​രു​ന്നു അ​ദ്ദേ​ഹ​ത്തി​ന്‍റെ ചോ​ദ്യം.

‘പാ​ൽ ന​ല്ല​താ​ണ്, പ​ക്ഷേ പാ​ത്രം മോ​ശ​മെ​ങ്കി​ലോ’

1965ലെ ​നി​യ​മ​സ​ഭ തെ​​ര​ഞ്ഞെ​ടു​പ്പി​ൽ കീ​റാ​മു​ട്ടി​യാ​യി​രു​ന്നു സ്ഥാ​നാ​ർ​ഥി നി​ർ​ണ​യം. കു​ന്ന​ത്തൂ​ർ താ​ലൂ​ക്കി​ൽ അ​ന്ന് ര​ണ്ടു മ​ണ്ഡ​ല​മാ​ണ്, കു​ന്ന​ത്തൂ​രും അ​ടൂ​രും. കു​ന്ന​ത്തൂ​ർ സം​വ​ര​ണ മ​ണ്ഡ​ല​വും അ​ടൂ​ർ ജ​ന​റ​ലും. അ​ടൂ​ർ പി​ടി​ക്കാ​ൻ കോ​ൺ​ഗ്ര​സ് ക​ണ്ടെ​ത്തി​യ​ത് തെ​ന്ന​ല​യെ​യാ​ണ്. എ​ന്നാ​ൽ ത​ന്നേ​ക്കാ​ൾ ത​ല​യെ​ടു​പ്പു​ള്ള നേ​താ​വും പി​താ​വി​ന്‍റെ സു​ഹൃ​ത്തു​മാ​യ കെ.​എ​സ്. പ​ര​മേ​ശ്വ​ര​പി​ള്ള​ക്ക്​ സീ​റ്റി​ൽ ക​ണ്ണു​ള്ള​ത് മ​ന​സ്സി​ലാ​ക്കി, തെ​ന്ന​ല നേ​രെ കൊ​ല്ല​ത്ത് ഡി.​സി.​സി സെ​ക്ര​ട്ട​റി സി.​എം. സ്​​റ്റീ​ഫ​നെ കാ​ണാ​നെ​ത്തി.

ത​ന്നെ ഒ​ഴി​വാ​ക്കി പ​ര​മേ​ശ്വ​ര​ൻ​പി​ള്ള​യെ മ​ത്സ​രി​പ്പി​ക്ക​ണ​മെ​ന്നാ​യി​രു​ന്നു ആ​വ​ശ്യം. പാ​ർ​ട്ടി സ്ഥാ​നാ​ർ​ഥി​യെ മാ​റ്റാ​നാ​വി​ല്ല എ​ന്ന്​ സ്റ്റീ​ഫ​നും വാ​ശി​പി​ടി​ച്ചു. ഒ​ടു​വി​ൽ തെ​ന്ന​ല പ​തി​വു​പോ​ലെ അ​യ​ഞ്ഞു. 1967ലെ ​തെ​ര​ഞ്ഞെ​ടു​പ്പി​ൽ കോ​ൺ​ഗ്ര​സ് ഒ​റ്റ​ക്കാ​ണ് മ​ത്സ​രി​ച്ച​ത്. എ​തി​ർ​പ​ക്ഷ​ത്ത് സ​പ്ത​ക​ക്ഷി മു​ന്ന​ണി​യും. പോ​രാ​ത്ത​തി​ന് സ്വ​ത​ന്ത്ര​നാ​യി മു​ൻ എ.​ഐ.​സി.​സി അം​ഗം പു​ഷ്പ​ത്ത​ടം രാ​ഘ​വ​നും. ‘പാ​ൽ ആ​രോ​ഗ്യ​ത്തി​ന് ന​ല്ല​താ​ണ്, പ​ക്ഷേ അ​ത് മോ​ശം പാ​ത്ര​ത്തി​ൽ ന​ൽ​കി​യാ​ലോ’ എ​ന്നാ​യി​രു​ന്നു രാ​ഘ​വ​ൻ അ​ന്ന് തെ​ന്ന​ല​യെ പ​റ്റി പ​റ​ഞ്ഞ​ത്.

കു​ടും​ബ ഓ​ഹ​രി വി​റ്റ്​ രാ​ഷ്ട്രീ​യ ക​ടം​വീ​ട്ട​ൽ

1967ലെ ​തെ​ര​ഞ്ഞെ​ടു​പ്പി​ൽ തോ​റ്റ​പ്പോ​ഴും പ​രി​ഭ​വം ഉ​ണ്ടാ​യി​ല്ല. തെ​ര​ഞ്ഞെ​ടു​പ്പി​നാ​യി പാ​ർ​ട്ടി ന​ൽ​കി​യ​ത് 6000 രൂ​പ. സം​ഭാ​വ​ന​യാ​യി കി​ട്ടി​യ​ത് 100 രൂ​പ​യും. തെ​ര​ഞ്ഞെ​ടു​പ്പി​ൽ തോ​റ്റു എ​ന്ന​ത്​ മാ​ത്ര​മ​ല്ല വ​ലി​യ ക​ട​ക്കെ​ണി​യും തെ​ന്ന​ല​യെ വ​ല​ച്ചു. പി​താ​വി​ൽ നി​ന്നും ഓ​ഹ​രി​യാ​യി കി​ട്ടി​യ തു​ക വി​റ്റാ​ണ് ക​ടം വീ​ട്ടി​യ​ത്. രാ​ഷ്ട്രീ​യ ക​ട​ങ്ങ​ൾ വീ​ട്ടാ​ൻ 1967 കാ​ല​ത്ത്​ വി​ൽ​ക്കേ​ണ്ടി​വ​ന്ന​ത് 30,000 രൂ​പ​യു​ടെ വ​സ്തു​ക്ക​ളാ​ണ്.

അ​താ​ക​ട്ടെ പാ​ർ​ട്ടി തെ​ര​ഞ്ഞെ​ടു​പ്പ്​ ചെ​ല​വി​നാ​യി ന​ൽ​കി​യ​തി​ന്‍റെ ആ​റി​ര​ട്ടി വ​രും. 1970ൽ ​പി​ന്നെ​യും മ​ത്സ​രി​ക്കാ​ൻ ഊ​ഴം കി​ട്ടി​യെ​ങ്കി​ലും സി.​പി.​ഐ​യി​ലെ തെ​ങ്ങ​മം ബാ​ല​കൃ​ഷ്ണ​നാ​യി വി​ട്ടു​കൊ​ടു​ത്തു. തെ​ങ്ങ​മം ജ​യി​ച്ചു ക​യ​റി. 1977 ആ​യി​രു​ന്നു അ​ടു​ത്ത ഊ​ഴം. 8000 വോ​ട്ടി​ന്റെ ഭൂ​രി​പ​ക്ഷ​ത്തി​ൽ ആ​ദ്യ​മാ​യി നി​യ​മ​സ​ഭ​യി​ൽ. 1980ലെ ​തെ​ര​ഞ്ഞെ​ടു​പ്പി​ൽ പ​രാ​ജ​യം. 82ൽ ​വി​ജ​യം. ഇ​തി​നി​ടെ രാ​ജ്യ​സ​ഭ​യി​ലേ​ക്കും തെ​ര​ഞ്ഞെ​ടു​ക്ക​പ്പെ​ട്ടു.