ഗവർണറുടെ വിരുന്നിൽ മുഖ്യമന്ത്രി പങ്കെടുക്കും

തിരുവനന്തപുരം: റിപ്പബ്ലിക് ദിനത്തോടനുബന്ധിച്ച് ഗവർണർ ആരിഫ് മുഹമ്മദ് ഖാൻ സംഘടിപ്പിക്കുന്ന വിരുന്നിൽ മുഖ്യമന്ത്രി പിണറായി വിജയൻ പങ്കെടുക്കും. അറ്റ് ഹോം എന്ന പേരിലുള്ള സൽക്കാരം വ്യാഴാഴ്ച വൈകീട്ടാണ്. നേരത്തേ ഗവർണർ വിളിച്ച ക്രിസ്മസ് വിരുന്നിൽ നിന്ന് മുഖ്യമന്ത്രിയും മന്ത്രിമാരും വിട്ടുനിന്നിരുന്നു. ഗവർണറും സർക്കാറും തമ്മിലെ ബന്ധം വഷളായ സാഹചര്യത്തിലായിരുന്നു അത്.

സമീപ കാലത്ത് ഗവർണറും സർക്കാറുമായുള്ള ബന്ധം മെച്ചപ്പെട്ടു. കഴിഞ്ഞ നിയമസഭ സമ്മേളന തുടർച്ചയായി ബജറ്റ് അവതരിപ്പിക്കാൻ സർക്കാർ ആദ്യം ആലോചിച്ചിരുന്നു. പിന്നീട്, അത് മാറ്റുകയും നയപ്രഖ്യാപനത്തോടെ പുതിയ സമ്മേളനം ആരംഭിക്കുകയും ചെയ്തു. സർക്കാർ തയാറാക്കിയ പ്രസംഗം അതേപടി ഗവർണർ വായിക്കുകയും ചെയ്തു. കഴിഞ്ഞ തവണ അറ്റ് ഹോം പരിപാടി ഗവർണർ നടത്തിയിരുന്നില്ല.