അങ്കമാലിയിൽ മൂന്ന്മാസം പ്രായമായ ആണ്‍കുഞ്ഞിനെ കൊന്ന് കുഴിച്ച്മൂടിയതായി പരാതി

അങ്കമാലി: പൊലീസ് സ്​റ്റേഷ​​​​െൻറ അധീനതയിലെ കാട്മൂടിയ പറമ്പില്‍ തമിഴ്​ നാടോടി ദമ്പതികളുടെ മൂന്ന്മാസം പ്രായമായ ആണ്‍കുഞ്ഞിനെ കൊന്ന് കുഴിച്ച്മൂടിയതായി പരാതി. ഭര്‍ത്താവ് മണികണ്ഠനാണ് കുഞ്ഞിനെ കൊന്ന് കാട്ടില്‍ കുഴിച്ചിട്ടതെന്ന പരാതിയുമായി ഭാര്യ സേലം സ്വദേശിനി സുധയാണ് ഞായറാഴ്ച ഉച്ചക്ക്ശേഷം അങ്കമാലി സ്​റ്റേഷനിലെത്തിയത്. വാവിട്ട് കരഞ്ഞാണ് മദ്യലഹരിയിലായിരുന്ന സുധ പരാതിയുമായെത്തിയത്.

ശനിയാഴ്ച രാത്രി 10 ഓടെ മണികണ്ഠന്‍ കുഞ്ഞിനെ കഴുത്ത് ഞെരിച്ച് കൊല്ലുകയും കുറ്റിക്കാട്ടില്‍ കുഴിച്ചിടുകയുമായിരുന്നുവെന്നായിരുന്നു സുധ പറഞ്ഞത്. അതോടെ റെയിൽവേ സ്​റ്റേഷന്‍ പരിസരത്തുനിന്ന്​ മണികണ്ഠനെ പൊലീസ് കസ്​റ്റഡിയിലെടുത്തു.  പൊലീസി​​​െൻറ ചോദ്യം ചെയ്യലില്‍ മദ്യലഹരിയില്‍ ലക്കുകെട്ട ഇരുവരും പരസ്പര വിരുദ്ധമായാണ് മൊഴി നല്‍കിയത്. സുധ കുഞ്ഞിനെ നിലത്തെറിഞ്ഞ് കൊന്നുവെന്നാണ്​ മണികണ്ഠന്‍ പറഞ്ഞത്. അതിനിടെ കുഞ്ഞിന്​ മുലപ്പാല്‍ കൊടുത്തപ്പോള്‍ ശിരസ്സില്‍ കയറി ശ്വാസം മുട്ടിയാണ് മരിച്ചതെന്നും ഇരുവരും പറഞ്ഞു.

മണിക്കൂറുകളോളം എസ്.ഐ അനൂപ് പലവിധത്തില്‍ ചോദ്യം ചെയ്തെങ്കിലും മദ്യലഹരിയില്‍ പരസ്​പര വിരുദ്ധമായിരുന്നു ഇരുവരുടെയും മറുപടി. വ്യക്തമായ മറുപടി ലഭിക്കാതെ വന്നതോടെ പൊലീസ് ക്ലേശിച്ചു. അതിനിടെ പഴയ സി.ഐ ഓഫിസിന് പിറകിൽ കസ്​റ്റഡിയിലെടുത്ത വാഹനങ്ങള്‍ സൂക്ഷിക്കുന്ന കാട്ടിലാണ് കുഞ്ഞിനെ കുഴിച്ചിട്ടതെന്ന കാര്യം സുധ വെളിപ്പെടുത്തുകയും, സ്ഥലം കാട്ടിക്കൊടുക്കുകയും ചെയ്തു. പൊലീസ് കാവല്‍ഏര്‍പ്പെടുത്തി.

സംഭവമറിഞ്ഞ് ആലുവ ഡിവൈ.എസ്.പി പ്രഫുല്ലചന്ദ്രനും, പിന്നീട്  ജില്ല റൂറല്‍ എസ്.പി രാഹുല്‍.ആര്‍.നായരും അങ്കമാലി സ്​റ്റേഷനിലെത്തി ദമ്പതികളെ ചോദ്യം ചെയ്​തിട്ടും ഫലമുണ്ടായില്ല. വൈകുന്നേരത്തോടെ ഫോര്‍ട്ട്കൊച്ചി ആര്‍.ഡി.ഒയുടെ സാന്നിധ്യത്തില്‍ കുഞ്ഞി​​​െൻറ മൃതദേഹം പുറത്തെടുത്ത് പോസ്​റ്റ്​മോര്‍ട്ടത്തിന്​ എറണാകുളം ജനറല്‍ ആശുപത്രിയിലേക്ക് മാറ്റി. തിങ്കളാഴ്ചത്തെ പോസ്​റ്റ്​മോര്‍ട്ടത്തിന്​ ശേഷമേ മരണകാരണം വ്യക്​തമാകൂ.

മണികണ്ഠന്‍ മലയാളിയാണ്. ഉറ്റവരും ഉടയവരുമില്ലെന്നാണ് പറയുന്നത്. വര്‍ഷങ്ങള്‍ക്ക് മുമ്പെ അങ്കമാലിയിലെത്തിയതാണ്​.  ഇരുവരും മദ്യപിച്ച് ബഹളമുണ്ടാക്കുന്നതും, വഴക്കിടുന്നതും, കുഞ്ഞിനെ പൊരിവെയിലത്ത് കിടത്തുന്നതും പതിവായിരുന്നു. ഇ​തേത്തുടര്‍ന്ന് മൂന്ന് മാസം മുമ്പ് സുധയേയും കുഞ്ഞിനെയും പൊലീസ് കസ്​റ്റഡിയിലെടുത്ത് അഭയകേന്ദ്രത്തി​ലെത്തിച്ചെങ്കിലും ദിവസങ്ങള്‍ക്കകം അമ്മയും കുഞ്ഞും പുറത്ത് കടക്കുകയായിരുന്നു.