മാനന്തവാടിയിലേതിന്​ സമാനം; ഈ വർഷം രണ്ടാമത്തെ മരണം

മ​ല​പ്പു​റം: മലപ്പുറം: ജനുവരിയിൽ മാനന്തവാടി പഞ്ചാരക്കൊല്ലിയിലുണ്ടായതിന്​ സമാനമാണ് ​കാളികാവ്​ അടക്കാക്കുണ്ടിൽ ടാപ്പിങ് തൊഴിലാളിക്ക്​ നേരെയുണ്ടായ കടുവയുടെ ​ആ​ക്രമണം. റാവുത്തൻകാട്​ എസ്​റ്റേറ്റിൽ ടാപ്പിങ്ങിനിടെ യുവാവിന്‍റെ കഴുത്തിന്​ കടിച്ച കടുവ കാട്ടിനുള്ളിലേക്ക് വലിച്ചിഴച്ച് കൊണ്ടുപോകുകയായിരുന്നു. 500 മീറ്ററോളം അകലെയാണ്​ മൃതദേഹം കിടന്നിരുന്നത്​. ജനുവരി 24ന് മാനന്തവാടി പഞ്ചാരക്കൊല്ലി പ്രിയദർശനി എസ്റ്റേറ്റിന് സമീപത്ത് രാധ എന്ന തോട്ടം തൊഴിലാളിയെയും കടുവ ആക്രമിച്ചത്​ സമാനരീതിയിലായിരുന്നു. തോട്ടത്തിൽ കാപ്പിക്കുരു പറിക്കുന്നതിനിടെയായിരുന്നു ആക്രമണം. കഴുത്തിൽ കടിച്ച കടുവ 100 മീറ്ററോളം വലിച്ചിഴച്ച് കൊണ്ടുപോയി. ജനരോഷത്തെതുടർന്ന് കടുവയെ കൊല്ലാൻ അന്ന്​ വയനാട്​ ജില്ല ഭരണകൂടം ഉത്തരവിറക്കി.

കടുവയുടെ ആ​ക്രമണത്തിൽ സമീപകാലത്ത്​ ഏറ്റവുമധികം ജീവഹാനിയുണ്ടായത്​ വയനാട്​ ജില്ലയിലാണ്​​. 2015ൽ മാത്രം വയനാട്ടിൽ മൂന്ന്​ പേരാണ്​ കടുവയുടെ ആക്രമണത്തിന്​ ഇരകളായത്​​. ഫെബ്രുവരിയിൽ നൂൽപ്പുഴ സ്വദേശിയാണ് ആദ്യം കൊല്ലപ്പെട്ടത്. ജൂലൈയിൽ കുറിച്യാട് സ്വദേശിയും നവംബറിൽ തോൽപ്പെട്ടി റേഞ്ചിലെ ഫോറസ്റ്റ്​ വാച്ചറും മരിച്ചു. ഔദ്യോഗിക കണക്ക് പ്രകാരം 2016നും 2025നുമിടയിൽ സംസ്ഥാനത്തുണ്ടായ ആറ് മരണങ്ങളിൽ അഞ്ചും വയനാട്ടിലാണ്​. 2023ൽ മാത്രം രണ്ട്​ പേർക്കാണ്​ വയനാട്ടിൽ കടുവ ആക്രമണത്തിൽ ജീവഹാനി സംഭവിച്ചത്​. പത്ത് വർഷത്തിനിടെ, സംസ്ഥാനത്ത്​ പത്ത്​ പേർക്ക്​ കടുവ ആക്രമണത്തിൽ പരിക്കേറ്റു. നിലമ്പൂർ വനമേഖലയിൽ കടുവയുടെ ആക്രമണത്തിൽ ജീവഹാനി സംഭവിക്കുന്നത്​ ഇതാദ്യമാണ്​. വയനാട്ടിലെ രാധയുടെ മരണശേഷം സംസ്ഥാനത്ത്​ അഞ്ച്​ മാസത്തിനിടെയുണ്ടായ രണ്ടാമത്തെ കടുവ ആക്രമണമാണ്​ അടക്കാകുണ്ടിലേത്​.