ആരോഗ്യം, ഉന്നതവിദ്യാഭ്യാസം, വന്യജീവി ആക്രമണം; തെ​രഞ്ഞെടുപ്പ്​ അജണ്ട നിശ്ചയിച്ച്​ യു.ഡി.എഫ്​

തിരുവനന്തപുരം: സംരംഭക രം​ഗത്തെ മികവ്​ ഭരണനേട്ടമായി അവതരിപ്പിച്ച്​ തെരഞ്ഞെടുപ്പിനൊരുങ്ങുന്ന ഇടതുപ​ക്ഷത്തെ നേരിടാൻ​ പിണറായി സർക്കാറിലെ ആരോഗ്യ, ഉന്നത വിദ്യാഭ്യാസ മേഖലകളിലുണ്ടായ വീഴ്ചകൾ ആയുധമാക്കാൻ പ്രതിപക്ഷം.

തദ്ദേശ തെരഞ്ഞെടുപ്പിലും പിന്നാലെയെത്തുന്ന നിയമസഭ തെരഞ്ഞെടുപ്പിലും ജനങ്ങളെ നേരിട്ട് ബാധിക്കുന്ന ഈ വിഷയങ്ങൾ മുൻനിർത്തി​ പ്രചാരണം കടുപ്പിക്കാനാണ് യു.ഡി.എഫ്​ തീരുമാനം. പത്ത്​ വർഷം​കൊണ്ട്​ ആരോഗ്യ-ഉന്നത വിദ്യാഭ്യാസ മേഖലകൾ കുത്തഴിഞ്ഞെത്​ സ്​ഥാപിക്കാനാണ്​ ശ്രമം. രണ്ട്​ വിഷയങ്ങളിലും കോൺക്ലേവ്​ സംഘടിപ്പിച്ചാണ്​ പ്രതിപക്ഷത്തിന്‍റെ തയാറെടുപ്പുകൾ.

സർക്കാർ ആതുരാലയങ്ങളിലെ മരുന്നുക്ഷാമവും അടിസ്ഥാന സൗകര്യങ്ങളുടെ അപര്യാപ്​തതയും കെടുകാര്യസ്​ഥതയുമടക്കം പ്രതിപക്ഷം സർക്കാറിനെതിരായ കുറ്റപത്രമായി അവതരിപ്പിക്കും. തിരുവനന്തപുരം മെഡിക്കൽ കോളജിലെ ഡോ. ഹാരിസ്​ ചിറയ്ക്കലിന്‍റെ തുറന്നുപറച്ചിലും പിന്നാലെ കോട്ടയം മെഡിക്കൽ കോളജി​ലെ ദാരുണ അപകടവും ആരോപണങ്ങൾക്ക് ബലംനൽകുന്നതാണ്​.

പ്രതിപക്ഷം ​ഹെൽത്ത്​ കമീഷനെ നിയോഗിച്ചാണ്​ വിവരങ്ങൾ സമാഹരിക്കുന്നത്​. രോഗികളുടെ എണ്ണം കൂടിയതാണ്​ പരിമിതികൾക്ക്​ കാരണമെന്ന സർക്കാർ വ്യഖ്യാനങ്ങളെ തുറന്നുകാട്ടാനും തീരുമാനിച്ചു​. വസ്​തുതകൾ തുറന്നുപറഞ്ഞതിന്‍റെ പേരിൽ ഡോ. ഹാരിസിനെ സർക്കാർ വേട്ടയാടാൻ ശ്രമിക്കുന്നത്​ രാഷ്ട്രീയ വിഷയമായി ഉയർത്തും.

ഉന്നത വിദ്യാഭ്യാസ മേഖല സ്തംഭനാവസ്ഥയിലായത്​ ചൂണ്ടിക്കാട്ടിയും ഇതിൽ സർക്കാറിന്‍റെ റോൾ അടിവരയിട്ടുമാണ്​ രണ്ടാമത്തെ നീക്കം. എൻജിനീയറിങ്​ കോളജുകളിലടക്കം പഠിക്കാൻ കുട്ടികളില്ലാത്തതും വിദ്യാർഥികളുടെ വിദേശ കുടിയേറ്റവും ചർച്ചയാക്കും. സർവകലാശാലകളെ രാഷ്ട്രീയ പോരാട്ടവേദികളാക്കിയതും പ്രശ്നവത്​കരിക്കും. മനുഷ്യ-വന്യജീവി സംഘർഷമാണ്​ മറ്റൊരു അജണ്ട.