അൻവർ സമാന്തര ഭരണസംവിധാനമായി പ്രവർത്തിക്കുകയായി​രുന്നോ ​?; എന്തുകൊണ്ട് കേസെടുത്തില്ല, രൂക്ഷമായി വിമർശിച്ച് ഹൈകോടതി

കൊച്ചി: മുൻ എം.എൽ.എ പി.വി. അൻവർ ഫോൺ ചോർത്തി​യതുമായി ബന്ധപ്പെട്ട അന്വേഷണം അവസാനിപ്പിച്ചതെന്തിനെന്ന്​ സർക്കാറിനോട്​ ഹൈകോടതി. ജനപ്രതിനിധിയായിരിക്കെ സമാന്തര ഭരണസംവിധാനമായി പ്രവർത്തിക്കുകയായിരുന്നോ. ഇത്തരം പ്രവർത്തനങ്ങൾക്ക്​ ആരെയും അനുവദിക്കാനാവില്ലെന്നും സർക്കാറിനെ വിമർശിച്ച്​​ ജസ്റ്റിസ്​ പി.വി. കുഞ്ഞികൃഷ്ണൻ വ്യക്തമാക്കി. ഫോൺ ചോർത്തലിൽ സി.ബി.ഐ അന്വേഷണം ആവശ്യപ്പെട്ട് കൊല്ലം സ്വദേശിയും പ്ലാന്ററും വ്യവസായിയുമായ മുരുഗേഷ് നരേന്ദ്രൻ നൽകിയ ഹരജി തീർപ്പാക്കിയാണ്​ ഉത്തരവ്​.

നിയമവിരുദ്ധമായി ഫോണ്‍ ചോര്‍ത്തിയെന്ന് കഴിഞ്ഞ സെപ്​റ്റംബര്‍ ഒന്നിന് മലപ്പുറത്ത് നടത്തിയ വാര്‍ത്തസമ്മേളനത്തില്‍ പി.വി. അന്‍വര്‍ പരസ്യമായി പ്രഖ്യാപിച്ചതിനെത്തുടർന്ന്​ ഇക്കാര്യത്തില്‍ അന്വേഷണമാവശ്യപ്പെട്ട് മലപ്പുറം എസ്.പിക്കും ഡി.ജി.പിക്കും പരാതി നൽകിയിട്ടും നടപടിയുണ്ടായില്ലെന്ന്​ ചൂണ്ടിക്കാട്ടിയാണ്​ മുരുഗേഷ് നരേന്ദ്രന്‍ കോടതിയെ സമീപിച്ചത്​. ചീഫ് സെക്രട്ടറിക്ക് നൽകിയ നിവേദനത്തിനും നടപടിയുണ്ടായില്ലെന്ന്​ ആരോപിച്ചിരുന്നു.

ഉദ്യോഗസ്ഥരുടെയടക്കം ഫോൺ ചോർത്തിയതുമായി ബന്ധപ്പെട്ട് പൊലീസിന് നേരിട്ട് കേസെടുക്കാനുള്ള വസ്തുതകളില്ലെന്നാണ്​ സർക്കാർ കോടതിയെ അറിയിച്ചത്​. തെളിവുകൾ ലഭിച്ചില്ലെന്ന സർക്കാർ നിലപാട് അംഗീകരിക്കാനാവില്ലെന്ന്​ കോടതി ചൂണ്ടിക്കാട്ടി. തെളിവുകൾ കണ്ടെത്തേണ്ടത്​ സർക്കാറല്ലേ. ജനപ്രതിനിധിയായിരിക്കെതന്നെ നിരന്തരം വാർത്തസമ്മേളനങ്ങൾ വിളിച്ച് അൻവർ ഇത്തരം കാര്യങ്ങൾ പറയുന്നുണ്ട്​. ഐ.പി.എസ് ഉദ്യോഗസ്ഥരുടെ ഫോൺ ചോർത്തിയെന്ന വെളിപ്പെടുത്തൽ ഗൗരവമുള്ളതാണ്​. അതിനാൽ, ഡി.ജി.പിക്ക്​ നൽകിയ നിവേദനം പരിഗണിച്ച്​ ഉചിതമായ തീരുമാനമെടുക്കാൻ നിർദേശിച്ച കോടതി ഹരജി തീർപ്പാക്കി.