കാറ്റാടിയന്ത്രങ്ങൾ വാടകക്ക്​; തട്ടിപ്പിൽ പണം നഷ്ടപ്പെട്ട് നിരവധി പേർ

തിരുവനന്തപുരം: വിദേശ കാറ്റാടിയന്ത്ര ടർബൈൻ നിർമാണ കമ്പനിയുടെ പേരിൽ സംസ്ഥാന വ്യാപകമായി പുതിയ സൈബർ തട്ടിപ്പ്​. കാറ്റാടിയന്ത്ര ടര്‍ബൈന്‍ നിർമാണ കമ്പനിയായ സീമെൻസ്​ ഗമേസ റിന്യൂവബ്​ൾ എനർജി ലിമിറ്റഡിന്‍റെ​ (എസ്​.ജി.ആർ.ഇ) പേരിലാണ്​ തട്ടിപ്പ്​.

മൂന്ന്​ മാസത്തേക്ക്​ കാറ്റാടി യന്ത്രം വാടകക്ക്​ എന്ന പേരിൽ നിക്ഷേപം സ്വീകരിച്ചാണ്​ തട്ടിപ്പ്​. സംസ്ഥാന വ്യാപകമായി 150ലധികം പരാതിയാണ്​ ലഭിച്ചത്​. കേസ് രജിസ്റ്റർ ചെയ്തിട്ടില്ല. തൃശൂർ റൂറൽ പൊലീസ്​ ജില്ലയിലാണ്​ കൂടുതൽ പരാതിക്കാർ. ഒരു കോടി രൂപയോളം തട്ടിപ്പ്​ സംഘം കൈക്കലാക്കിയതായാണ്​ പ്രാഥമിക നിഗമനം.

നിക്ഷേപ തുകക്കനുസരിച്ച്​ യന്ത്രങ്ങൾ വാടകക്കെടുത്താൽ​ കൂടുതൽ പണം നേടാമെന്നാണ്​ പറയുന്നത്​. ഈ പണം മറ്റ്​ മൾട്ടി നാഷനൽ കമ്പനികളിൽ നിക്ഷേപിച്ച്​​ അതിൽനിന്നുള്ള ലാഭവിഹിതമാണ്​ അംഗങ്ങൾക്ക്​ നൽകുന്നതെന്നാണ്​ തട്ടിപ്പുസംഘത്തിന്‍റെ വിശദീകരണം.

വാട്​സ്​ആപ്​​ ഗ്രൂപ്പുകളിൽ ചേർത്താണ്​ തട്ടിപ്പിന്‍റെ തുടക്കം. ഗ്രൂപ്പിലേക്ക് ക്ഷണിച്ച് സുഹൃത്തുക്കളില്‍ നിന്നോ കുടുംബാംഗങ്ങളില്‍ നിന്നോ ​ലഭിക്കുന്ന ലിങ്കില്‍ ( http://www.sgrein.shop/) ക്ലിക്ക് ചെയ്ത് വെബ്സൈറ്റില്‍ രജിസ്റ്റര്‍ ചെയ്യുന്നതോടെയാണ്​ തട്ടിപ്പ് ആരംഭിക്കുന്നത്. ഗ്രൂപ്പിൽ ചേർന്നാൽ കാറ്റാടി കമ്പനിയുടേതെന്ന് അവകാശപ്പെടുന്ന വ്യാജ ആപ്​ ഇന്‍സ്റ്റാള്‍ ചെയ്യാന്‍ ആവശ്യപ്പെടും. മൂന്ന്​ ദിവസത്തേക്ക്​ 42,000 രൂപ നിക്ഷേപിച്ച്​ കാറ്റാടിയന്ത്രം വാടകക്ക്​ എടുത്താൽ മൂന്ന്​ ദിവസംകൊണ്ട്​ 33600 രൂപ ലാഭവിഹിതം ലഭിക്കുമെന്നാണ്​ ഒരു ​പ്രചാരണം. ഇതുപോലെ വിവിധ പദ്ധതികളിലൂടെ വലിയ തോതിൽ ധനം ശേഖരിച്ചാണ്​ തട്ടിപ്പ്​.

തുടക്കത്തിൽ ചെറിയ തുക ലാഭവിഹിതവും കൂടുതൽ പേരെ ചേർക്കുന്നതിനനുസരിച്ച്​ മണിചെയിൻ മാതൃകയിൽ അധികതുകയും നൽകി​ തട്ടിപ്പുകാർ നിക്ഷേപകരുടെ വിശ്വാസമാർജിക്കും​. പിന്നീട്,​ നിക്ഷേപമോ ലാഭവിഹിതമോ തിരികെ ചോദിക്കുമ്പോഴാണ്​ തട്ടിപ്പാണെന്ന്​ തിരിച്ചറിയുന്നത്​.

കൂടുതൽ പരാതികൾ ലഭിച്ച സാഹചര്യത്തിൽ അടുത്ത ദിവസം മുതൽ ജില്ലകൾ തോറും കേസ്​ രജിസ്റ്റർ ചെയ്ത്​ നടപടി ആരംഭിക്കുമെന്ന്​ പൊലീസ്​ ആസ്ഥാനത്തെ സൈബർ വിഭാഗം അറിയിച്ചു.