മഴക്കാലത്ത് ​ആരോഗ്യം നിലനിർത്താനുള്ള ആയുർവേദ വഴികൾ

നൂറ്റാണ്ടുകളായി ആരോഗ്യസംരക്ഷണ രംഗത്ത്​ പ്രധാന പങ്കുവഹിച്ചുകൊണ്ടിരിക്കുന്ന ആയുർവേദം​ രോഗചികിത്സയിൽ മാത്രമല്ല, രോഗപ്രതിരോധത്തിലും ആരോഗ്യസംരക്ഷണത്തിലും ഫലപ്രദമായ നിരവധി മാർഗങ്ങളാണ്​ നിർദേശിക്കുന്നത്​.

ഒരു വ്യക്​തിയുടെ ആരോഗ്യത്തിന്‍റെ അടിസ്ഥാനം പലപ്പോഴും ആ വ്യക്​തി പുലർത്തുന്ന ദിനചര്യകൾക്കനുസൃതമായിരിക്കും. ആരോഗ്യകരമായ ദിനചര്യ സ്ഥിരമായി പിന്തുടരുകവഴി വ്യക്​തിയുടെ ശരീരത്തിന്‍റെ മാത്രമല്ല മനസ്സിന്‍റെയും ആരോഗ്യത്തെ മെച്ചപ്പെടുത്താനാവും.

ഭക്ഷണം കഴിക്കുന്നതിനും ഉറങ്ങുന്നതിനും ഉണരുന്നതിനും വ്യായാമം ചെയ്യുന്നതിനുമെല്ലാം എല്ലാ ദിവസവും കൃത്യമായ സമയക്രമം പാലിക്കുന്നത്​ ശരീരത്തിന്‍റെ മൊത്തത്തിലുള്ള ആരോഗ്യം മെച്ചപ്പെടുത്താൻ സഹായിക്കും.

ദിനചര്യകൾ

● അതിരാവിലെ സൂര്യോദയത്തിനുമുമ്പ് എഴുന്നേൽക്കുന്നതിലൂടെ ശുദ്ധവും ഓക്​സിജൻ നിറഞ്ഞതുമായ വായു ശ്വസിക്കാൻ കഴിയുകയും അതുവഴി ദിവസം മുഴുവൻ ശരീരത്തിന്‍റെ ഊർജം നിലനിർത്താൻ സഹായിക്കുകയും ചെയ്യും.

● ദിവസേനയുള്ള സുഗമമായ വിസർജനങ്ങളും ആരോഗ്യത്തിന്‍റെ ലക്ഷണമാണ്​. പതിവായ സമയത്ത്​ നടക്കുന്ന തൃപ്തികരമായ മല-മൂത്ര വിസർജനം വളരെ പ്രധാനപ്പെട്ടതാണ്​.

● ഉറക്കമുണർന്നയുടൻ വായ വൃത്തിയാക്കണം. പല്ല്, നാക്ക്​ എന്നിവ പ്രകൃതിദത്ത മാർഗങ്ങളുപയോഗിച്ച്​ വൃത്തിയാക്കുകവഴി വായ്ക്കുള്ളിലെ ദോഷകരമായ രോഗാണുക്കളെ ഇല്ലാതാക്കാനാകും.

● വായ ശുചിയാക്കിയശേഷം വായ്ക്കുള്ളിൽ അൽപനേരം നല്ലെണ്ണ നിറച്ചു​വെച്ച്​ പുറത്തേക്ക്​ തുപ്പിക്കളയുന്നതും രോഗാണുക്കളെ പ്രതിരോധിക്കാനും പല്ലിന്‍റെ​യും മോണയുടെയും ആരോഗ്യത്തെ മെച്ചപ്പെടുത്താനും സഹായിക്കുന്നു.

ആയുർവേദത്തിൽ ‘കബള’, ‘ഗണ്ഡൂഷ’ എന്നീ പേരുകളുള്ള ഈ ചികിത്സ രോഗപ്രതിരോധശേഷി കൂടുന്നതിനും ദഹനം മെച്ചപ്പെടുത്തുന്നതിനും സഹായിക്കും.

● ശരീര ശുചിത്വത്തിന്‍റെ ഭാഗമായി രാവിലെത്തന്നെ കുളിക്കുന്നത് നല്ലതാണ്. ആരോഗ്യമുള്ളവർക്ക്​ ഇതിന്​ പു​റമെ വൈകുന്നേരവും കുളിക്കാം. അസുഖമൊന്നും ഇല്ലെങ്കിൽ തണുത്തതോ ചൂടുള്ളതോ അല്ലാത്ത മിതശീതോഷ്ണ വെള്ളത്തിൽ കുളിക്കുന്നതാണ്​ നല്ലത്​.

പ്രായമായവരും ആരോഗ്യപ്രശ്നങ്ങളുള്ളവരും ചെറുചൂടുവെള്ളത്തിലാണ്​ കുളിക്കേണ്ടത്​. ദിവസവും അതിന്​ കഴിയാത്തവർ ആഴ്ചയിൽ രണ്ട്​ ദിവസമെങ്കിലും എണ്ണതേച്ച്​ കുളിക്കാനും ആയുർവേദം നിഷ്കർഷിക്കുന്നുണ്ട്​.

● രാവിലെ എഴുന്നേറ്റയുടൻ ചായ, കാപ്പി തുടങ്ങിയ ഉത്തേജനഘടകങ്ങളടങ്ങിയ പാനീയങ്ങൾക്ക്​ പകരം ചെറുചൂടുവെള്ളം കുടിക്കാം​. ഇത്​ ശരീരത്തിലെ നിർജലീകരണം തടയുന്നു എന്ന്​ മാത്രമല്ല, ദഹനപ്രക്രിയയെ വേഗത്തിലാക്കുകയും ചെയ്യും.

● ശരീരത്തിന്​ ദോഷകരമല്ലാത്ത മികച്ച ഊർജ സന്തുലിതാവസ്ഥ സൃഷ്ടിക്കുന്നതും ദഹനം എളുപ്പമാക്കുന്നതുമായ ഭക്ഷണമാണ്​ കഴിക്കേണ്ടത്​. കാലാവസ്ഥ, വ്യക്​തിയുടെ ആരോഗ്യം, പ്രായം തുടങ്ങിയവ പരിഗണിച്ചായിരിക്കണം ഭക്ഷണത്തിന്‍റെ സ്വഭാവം തീരുമാനിക്കേണ്ടത്​. വേനലിൽ പഴങ്ങളും പച്ചക്കറികളും ധാരാളം കഴിക്കുകയും ആവശ്യത്തിന്​ ശുദ്ധജലം കുടിക്കുകയും വേണം. അതേസമയം, തണുപ്പ്​ കാലത്തും മഴക്കാലത്തും ശരീരത്തിൽ ഊഷ്മാവ്​ ക്രമീകരിക്കുന്ന ചൂടുള്ള സൂപ്പുകൾ പോലുള്ളവയായിരിക്കണം കൂടുതലായി കഴിക്കേണ്ടത്​.

● പതിവായ വ്യായാമവും ദിനചര്യയുടെ ഭാഗമാക്കണം. നടത്തം, ശാരീരിക അധ്വാനമുള്ള ജോലികൾ എന്നിവയിൽ ഏർപ്പെടാത്തവർ പ്രത്യേകം വ്യായാമം ചെയ്യേണ്ടതാണ്​.

● രാവിലെയോ വൈകുന്നേരമോ യോഗ, പ്രാണായാമം പോലുള്ള ശ്വസന വ്യായാമങ്ങൾ, ധ്യാനം, ഇസ്​ലാംമത വിശ്വാസികളുടെ നമസ്കാരം എന്നിവ മനസ്സിനും ശരീരത്തിനും ഒരുപോലെ ഗുണംചെയ്യുന്ന ദിനചര്യകളാണ്​.

● എല്ലാ ദിവസവും ഒരേ സമയം ഉറങ്ങുകയും ഉണരുകയും ചെയ്യുന്നത് ശരീരത്തിന്​ ആവശ്യമായ വിശ്രമം നൽകാനും ഉന്മേഷം നിലനിർത്താനും സഹായിക്കുന്നു. കൂടാതെ ശരീരകോശങ്ങളുടെ പുനരുജ്ജീവനത്തിനും ശരിയായ രീതിയിലുള്ള ഉപാപചയ പ്രവർത്തനങ്ങൾ നടക്കാനും സഹായിക്കുന്നു.

വിശ്രമവും സാമൂഹിക ജീവിതവും

പ്രതിരോധശേഷിയും ശരീരത്തിലെ ഓജസ്സും വർധിപ്പിക്കാൻ​​ ദിനചര്യ ക്രമപ്പെടുത്തുന്നതിനുപുറമെ ശാരീരികവും മാനസികവുമായ ആരോഗ്യത്തിനാവശ്യമായ സാമൂഹികജീവിതവും ജീവിതശൈലിയുമെല്ലാം ആയുർവേദം നിഷ്കർഷിക്കുന്നുണ്ട്​. ഇതിൽ പ്രധാനപ്പെട്ട രണ്ടെണ്ണമാണ്​ വിശ്രമവും സാമൂഹിക ജീവിതവും.

● വിശ്രമമില്ലാത്ത അമിത ജോലിയും അതുമായി ബന്ധപ്പെട്ട സമ്മർദങ്ങളും ശരീരത്തെ അനാരോഗ്യത്തിലേക്ക് നയിക്കുമെന്നും ഇത് ശാരീരികവും മാനസികവുമായ ആരോഗ്യ പ്രശ്‌നങ്ങൾക്ക് കാരണമാകുമെന്നും ആയുർവേദം മുന്നറിയിപ്പ്​ നൽകുന്നു​.

അതിനാൽ ജോലിയോടൊപ്പം വിശ്രമത്തിനും സമയം കണ്ടെത്തേണ്ടതുണ്ട്​. വ്യക്​തിയുടെ പ്രായത്തിനും ആരോഗ്യാവസ്ഥക്കും അനുസരിച്ച്​ ജോലിയുടെ സമയം ക്രമീകരിക്കണം. ജോലിക്കിടയിൽ ക്ഷീണം അനുഭവപ്പെട്ടാൽ ആവശ്യത്തിന്​ വിശ്രമിച്ച ശേഷം ജോലിയിൽ മുഴുകണം. ജോലിക്ക്​ ശേഷവും വിശ്രമം ആവശ്യമാണ്​. ​

● മാനസികവും വൈകാരികവുമായ ക്ഷേമത്തിന് പോസിറ്റിവ് ബന്ധങ്ങളുടെ പ്രാധാന്യം ആയുർവേദം തിരിച്ചറിയുന്നു. ശക്തമായ സാമൂഹിക ബന്ധങ്ങൾ സമ്മർദം കുറക്കാനും മാനസികാവസ്ഥ മെച്ചപ്പെടുത്താനും അതുവഴി ദീർഘായുസ്സ് പ്രദാനം ചെയ്യാനും സഹായിക്കും. ഇതിന് കുടുംബവുമായും സുഹൃത്തുക്കളുമായും സമൂഹവുമായുമുള്ള ബന്ധങ്ങൾക്കുവേണ്ടി സമയം ചെലവഴിക്കണം.

ഉറക്കം അനിവാര്യം

ശരീരത്തിന്​ യഥാർഥ വിശ്രമം ലഭിക്കുന്നത്​ ഉറക്കത്തിലാണ്​. നേരത്തേ ഉറങ്ങുകയും ചെയ്യണം. ശാരീരികവും മാനസികവുമായ ആരോഗ്യം നിലനിർത്താനും കേടുപാട്​ സംഭവിച്ച കോശങ്ങൾ പുനർനിർമിക്കാനും ഗുണനിലവാരമുള്ള ഉറക്കം അത്യാവശ്യമാണ്. സ്ഥിരമായ ഉറക്കത്തിന്‍റെ കുറവ് നിരവധി ആരോഗ്യ പ്രശ്‌നങ്ങൾക്കും കാരണമാകും.

എല്ലാ ദിവസവും സ്ഥിരമായ സമയത്ത്​ ഉറങ്ങാൻ ശ്രമിക്കണം. ഉറങ്ങുന്നതിന് മണിക്കൂറുകൾക്കുമുമ്പ് ദഹിക്കാൻ എളുപ്പമുള്ള ഭക്ഷണങ്ങളാണ്​ കഴിക്കേണ്ടത്​. ഒരിക്കലും ഉറക്കത്തിന്​ തൊട്ടു​മുമ്പ്​ വയറുനിറയെ ഭക്ഷണം കഴിക്കരുത്​. രാത്രിയിൽ ചെറുചൂടുവെള്ളത്തിൽ കുളിക്കുന്നതും ചൂടുള്ള പാൽ കുടിക്കുന്നതും​ ഉറക്കത്തെ സഹായിക്കും.

ഔഷധങ്ങൾ

രോഗപ്രതിരോധത്തിനും ആരോഗ്യ സംരക്ഷണത്തിനുമായി നിരവധി ഔഷധങ്ങളും ചികിത്സാവിധികളും തലമുറകളായി ആയുർവേദം പിന്തുടർന്നുവരുന്നുണ്ട്​. പ്രതിരോധശേഷി വർധിപ്പിക്കാനും ശരീരത്തിന്‍റെ ചൈതന്യം മെച്ചപ്പെടുത്താനും മൊത്തത്തിലുള്ള ആരോഗ്യം വർധിപ്പിക്കാനും കഴിയുന്ന പ്രധാന ഔഷധസസ്യങ്ങൾ പരിചയപ്പെടാം...

● അശ്വഗന്ധ: ഈ ഔഷധം മനസ്സിന്‍റെ സമ്മർദം കുറക്കുകയും കോർട്ടിസോളിന്‍റെ അളവ് സന്തുലിതമാക്കുകയും ചെയ്യും. ശരീരത്തിന്‍റെ ഊർജം വർധിപ്പിക്കുകയും ഉറക്കത്തിന്‍റെ ഗുണനിലവാരം മെച്ചപ്പെടുത്തുകയും രോഗപ്രതിരോധശേഷി വർധിപ്പിക്കുകയും ചെയ്യുന്നു.

● നെല്ലിക്ക: ജീവകം-സി, ആന്‍റി ഓക്‌സിഡന്‍റുകൾ എന്നിവയടങ്ങിയതിനാൽ പ്രതിരോധശേഷി വർധിപ്പിക്കുകയും ദഹനത്തെ പിന്തുണക്കുകയും ചർമത്തിന്‍റെ ആരോഗ്യം മെച്ചപ്പെടുത്തുകയും ചെയ്യുന്നു. യൗവനം നിലനിർത്താൻ ഉപയോഗിച്ചുവരുന്ന ച്യവനപ്രാശം പോലുള്ള ഔഷധങ്ങളിൽ നെല്ലിക്ക കൂടുതലായി അടങ്ങിയിട്ടുണ്ട്​.

● തുളസി: ഫലപ്രദമായ അണുനാശിനി കൂടിയാണ്​ തുളസി. ബാക്ടീരിയ, വൈറസ് തുടങ്ങിയവയെ ചെറുക്കാനുള്ള ശേഷിക്കുപുറമെ ​ആന്‍റി-ഇൻഫ്ലമേറ്ററി ഗുണങ്ങളുമുണ്ട്. ശ്വാസകോശ​ത്തിന്‍റെ ആരോഗ്യം വർധിപ്പിക്കുകയും ശരീരത്തെ വിഷവിമുക്തമാക്കുകയും ചെയ്യുന്നു.

● മഞ്ഞൾ: നല്ലൊരു ആന്‍റിഓക്‌സിഡന്‍റ്​ കൂടിയായ ഈ ഔഷധം രോഗപ്രതിരോധ ശേഷി വർധിപ്പിക്കാനും ശരീരത്തെ വിഷവിമുക്തമാക്കാനും സഹായിക്കുന്നു. ഇതിലടങ്ങിയ കുർക്കുമിൻ എന്ന രാസവസ്തു നീർക്കെട്ട്​ ഇല്ലാതാക്കാനും സഹായിക്കും.

● ചിറ്റമൃത്: രോഗപ്രതിരോധ സംവിധാനത്തെ പുനരുജ്ജീവിപ്പിക്കുകയും രക്തം ശുദ്ധീകരിക്കുകയും അണുബാധകളെ ചെറുക്കുകയും ചെയ്യും.

● വേപ്പ്: ശരീരത്തെ വിഷവിമുക്തമാക്കുകയും ചർമാരോഗ്യം വർധിപ്പിക്കുകയും ചെയ്യുന്ന വേപ്പ്​ ഫലപ്രദ അണുനാശിനി കൂടിയാണ്​.

● ശതാവരി: ആയുർവേദത്തിലെ പ്രധാനപ്പെട്ട ഈ ഔഷധം ശരീരത്തിലെ ഹോർമോണുകളെ സന്തുലിതമാക്കുകയും പ്രത്യുൽപാദന ശേഷിയും രോഗപ്രതിരോധ ശേഷിയും വർധിപ്പിക്കുകയും ചെയ്യുന്നു.

● ത്രിഫല: കടുക്ക, നെല്ലിക്ക, താന്നി എന്നിവ ചേർന്ന ഈ ഔഷധം ശരീരത്തെ വിഷവിമുക്തമാക്കാനും ദഹനശേഷിയും പ്രതിരോധശേഷിയും വർധിപ്പിക്കാനും സഹായിക്കുന്നു.

● വെളുത്തുള്ളി: ഹൃദയാരോഗ്യവും രോഗപ്രതിരോധ പ്രവർത്തനവും വർധിപ്പിക്കുകയും ചെയ്യുന്നതിനുപുറമെ മികച്ച രോഗാണുനാശിനി കൂടിയാണ്​.

● ഇഞ്ചി: ശരീരത്തിലെ നീര്, വീക്കം എന്നിവ ഇല്ലാതാക്കാനും ദഹനം സുഗമമാക്കാനും രോഗപ്രതിരോധ ശേഷി മെച്ചപ്പെടുത്താനും സഹായിക്കും.

വിഷവിമുക്തമാക്കാൻ പഞ്ചകർമ

തെറ്റായ ഭക്ഷണക്രമം, മാനസിക സമ്മർദം, മലിനമായ പാരിസ്ഥിതിക ഘടകങ്ങൾ എന്നിവയുടെ ഭാഗമായി അടിഞ്ഞുകൂടിയ വിഷവസ്തുക്കളിൽനിന്ന്​ ശരീരത്തെ ശുദ്ധീകരിക്കാൻ സഹായിക്കുന്ന പരമ്പരാഗത ആയുർവേദ ചികിത്സാപദ്ധതിയാണ്​ പഞ്ചകർമ. വാമന, വിരേചന, വസ്തി, നസ്യ, രക്തമോക്ഷ തുടങ്ങിയ ചികിത്സകൾ ഇതിൽ ഉൾപ്പെടുന്നു. കൃത്യമായ പഥ്യത്തോടെ ഒരാഴ്ചത്തെ ചികിത്സയാണിത്​.

രോഗികൾക്കും രോഗമില്ലാത്തവർക്കും പഞ്ചകർമ ചികിത്സ ചെയ്യാം. ആരോഗ്യമുള്ളവർക്ക്​ ഇത്​ സുഖചികിത്സയായാണ് നടത്തുക. ആരോഗ്യം നിലനിർത്തുന്നതോടൊപ്പം രോഗപ്രതിരോധശക്തി നിലനിർത്താനും ആയുർവേദത്തിലെ ഏറ്റവും മികച്ച ചികിത്സാവിധിയാണിത്​. മഴക്കാലത്തെ കർക്കടക ചികിത്സയും ആരോഗ്യവും പ്രതിരോധശേഷിയും മെച്ചപ്പെടുത്താൻ ലക്ഷ്യമിട്ടുകൊണ്ടുള്ളതാണ്​.