‘മഴക്കാലത്ത് എന്തുകൊണ്ടായിരിക്കാം മൂക്കടപ്പും കഫക്കെട്ടും വർധിക്കുന്നത്?’ -അറിയാം, കാരണങ്ങളും പരിഹാരങ്ങളും

മഴക്കാലത്ത്​ കണ്ടുവരുന്ന ഏറ്റവും സാധാരണമായ രോഗമാണ്​ ജലദോഷം. മൂക്കടപ്പും തുടർന്ന് ചിലപ്പോഴൊക്കെ കണ്ടുവരുന്ന തൊണ്ടവേദനയും ചെവിവേദനയുമെല്ലാം വിശ്രമത്തിലൂടെയും ചെറിയ രീതിയിലുള്ള മരുന്നുകളിലൂടെയും എളുപ്പത്തിൽ മാറ്റിയെടുക്കാം.

എങ്കിലും ചില സാഹചര്യങ്ങളിൽ ഇത്​ ഗൗരവമേറിയ ആരോഗ്യപ്രശ്നങ്ങളിലേക്ക്​ വഴിമാറാറുണ്ട്​.

എന്തുകൊണ്ട്​ മഴക്കാലം?

● ഈർപ്പം നിറഞ്ഞ അന്തരീക്ഷം ബാക്ടീരിയ, വൈറസ്​ തുടങ്ങിയ രോഗാണുക്കളുടെയും ഫംഗസുകളുടെയും വളർച്ച വേഗത്തിലാക്കുകയും താരതമ്യേന പ്രതിരോധശേഷി കുറഞ്ഞവരി​ൽ അണുബാധക്ക്​ കാരണമാവുകയും ചെയ്യും.

● വീടിനകത്തെ തണുപ്പ്​ പൂപ്പൽ വർധിക്കാൻ ഇടയാക്കുകയും ഇത്​ അലർജി, ആസ്തമ എന്നിവക്ക്​ വഴിയൊരുക്കുകയും ചെയ്യുന്നു.

● താപനിലയിലെ പെട്ടെന്നുള്ള മാറ്റങ്ങൾ ശരീരത്തിൽ സൃഷ്ടിക്കുന്ന പ്രശ്നങ്ങൾ. ചൂടും തണുപ്പും മാറിവരുന്ന കാലാവസ്ഥയിൽ മൂക്കിലെയും തൊണ്ടയിലെയും ശ്ലേഷ്മസ്തരങ്ങളടങ്ങിയ പാളികളിൽ അലർജിമൂലം ചൊറിച്ചിലും അസ്വസ്ഥതയും അനുഭവപ്പെടുകയും ശരീര പ്രതികരണത്തിന്‍റെ ഭാഗമായി കഫം രൂപപ്പെടുകയും ചെയ്യുന്നു.

● മഴക്കാലത്ത്​ അധികസമയവും ആളുകൾ തുറസ്സായ ഭാഗങ്ങളിൽനിന്ന്​ മാറി കെട്ടിടങ്ങൾക്കകത്ത്​ ഒരുമിച്ച്​ കഴിയുന്നതും രോഗം പടരുന്നതിന്​ കാരണമാവും​.

● മഴവെള്ളം കെട്ടിനിൽക്കുന്നതും അത്​ മലിനമാകുന്നതും ബാക്ടീരിയ, വൈറസ്​ തുടങ്ങിയ രോഗാണുക്കളുടെ വ്യാപനത്തിന്​ കാരണമാവുന്നു.

മഴക്കാലവും അലർജിയും

മഴക്കാലം തുടങ്ങുന്നതോടെ അന്തരീക്ഷത്തി​െല ഈർപ്പവും പൂപ്പലും വർധിക്കുകയും അത്​ അലർജിക്ക് കാരണമാകുകയും ചെയ്യുന്നു. ഇതാണ് പലപ്പോഴും​ രോഗങ്ങളുടെ അടിസ്ഥാന കാരണം. ഇതാവട്ടെ തുമ്മൽ, മൂക്കൊലിപ്പ്​, മൂക്കടപ്പ്, പനി, തൊണ്ടവേദന, ശരീരവേദന, ചെവിവേദന തുടങ്ങിയ അസ്വസ്ഥതകളിലേക്ക്​ നയിക്കുന്നു. ചിലരിൽ ഇതോടൊപ്പം ചുമയും പ്രത്യക്ഷപ്പെടാറുണ്ട്​.

ഈർപ്പമുള്ള അന്തരീക്ഷത്തിൽ രോഗാണുക്കൾ പടരാൻ സാധ്യതയേറെയാണ്​. ജലദോഷവും തുമ്മലുമുള്ളവരിൽ എളുപ്പത്തിൽ അണുബാധയുണ്ടാവുകയും തുടർന്ന്​ കഫക്കെട്ടിനും ചുമക്കും കാരണമാകുകയും ചെയ്യുന്നു. തുടക്കത്തിൽതന്നെ ആവശ്യത്തിനുള്ള പരിചരണവും വിശ്രമവും നൽകാതിരുന്നാൽ ശ്വാസകോശത്തിലെ കഫക്കെട്ടിനും മാരകമായേക്കാവുന്ന ന്യുമോണിയക്കുംവരെ കാരണമാകും.

കൂടുതൽ ശ്രദ്ധിക്കേണ്ടവർ

● ചെറിയ കുട്ടികൾ, പ്രതിരോധശേഷി കുറഞ്ഞ പ്രായമേറിയവർ.

● ആസ്തമപോലുള്ള ശ്വാസകോശരോഗങ്ങളുള്ളവർ.

● തണ​​ുപ്പുള്ള, വായുസഞ്ചാരം കുറഞ്ഞ സാഹചര്യത്തിൽ ജീവിക്കുന്നവർ.

അണുബാധയുടെ ലക്ഷണങ്ങൾ

അലർജിയെ തുടർന്നുണ്ടാവുന്ന ജലദോഷവും ചുമയും കാരണം തൊണ്ടയിൽനിന്നും മൂക്കിൽനിന്നും പുറത്തുവരുന്ന കഫം കട്ട​ിയേറിയതും പച്ചകലർന്ന മഞ്ഞനിറത്തോടുകൂടിയതായും കാണപ്പെടുന്നു. ഇത്​ അണുബാധയുടെ ലക്ഷണമാണ്​.

കൂടാതെ​ തൊണ്ടവേദന, ചെവിവേദന, തുടർച്ചയായ ചുമ, മൂക്കിനിരുവശത്തും നെറ്റിയുടെ ഭാഗങ്ങളിലുമുണ്ടാവുന വേദന (സൈനസൈറ്റിസ്​) എന്നിവയും അനുഭവപ്പെടാം. ശ്വാസകോശത്തിലെ അണുബാധമൂലം ശ്വാസം ശക്തിയായി ഉള്ളിലേക്കെടുക്കുമ്പോൾ നെഞ്ചിനകത്തും വേദന അനുഭവപ്പെടാം.

ചെവിവേദനയുടെ​ കാരണങ്ങൾ

മൂക്കിനെയും ഇരുചെവിക​െളയും ബന്ധിപ്പിക്കുന്ന യൂസ്​റ്റേഷ്യൻ ട്യൂബിൽ (Eustachian tube) അലർജികൊണ്ടുണ്ടാവുന്ന സ്രവങ്ങൾ നിറഞ്ഞ്​ അതിന്‍റെ പ്രവർത്തനം തടസ്സപ്പെടുകയും മധ്യകർണത്തിൽ അണുബാധയും മർദവും ഉണ്ടാവുകയും ചെയ്യുന്നു. ഇതുമൂലമാണ്​​ പലപ്പോഴും ചെവിവേദന അനുഭവപ്പെടുന്നത്.

ചെവിയിലെ മധ്യകർണത്തെ മൂക്കും തൊണ്ടയുമായി ബന്ധിപ്പിക്കുന്ന ഇടുങ്ങിയ മാർഗമാണിത്. മധ്യ ചെവിയിലെ മർദം തുല്യമാക്കുകയും സ്രവങ്ങൾ നീക്കം ചെയ്യുകയുമാണ്​ ഈ അവയവത്തിന്‍റെ ജോലി.

അലർജി, ജലദോഷം അല്ലെങ്കിൽ സൈനസ് അണുബാധകൾ കാരണം മൂക്കിനുള്ളിലെ സ്രവത്തിന്‍റെ തോത്​ അധികരിച്ച്​ യൂസ്​റ്റേഷ്യൻ ട്യൂബിലെത്തുകയും അതിന്‍റെ പ്രവർത്തനം തടസ്സപ്പെടുകയും ചെയ്​തേക്കാം. തുടർന്ന്​ ഈ സ്രവം മധ്യചെവിയിൽ അടിഞ്ഞുകൂടുകയും മർദം രൂപപ്പെടുകയും ചെയ്യുന്നു. ഇതാണ്​ ചെവിവേദനയുണ്ടാക്കുന്നത്​.

തൊണ്ടവേദന

ജലദോഷത്തെതുടർന്നുണ്ടാവുന്ന തൊണ്ടയിലെ അണുബാധയാണ്​ തൊണ്ടവേദനക്ക്​ കാരണമാവുന്നത്​. തൊണ്ടവേദനയോടൊപ്പം പനി, ഭക്ഷണം കഴിക്കാനും ഉമിനീരിറക്കാനും വായ തുറക്കാനും ബുദ്ധിമുട്ട്, ശബ്ദത്തിന് വ്യത്യാസം, കഴുത്തിൽ വേദനയോടുകൂടിയ വീർത്ത കഴലകൾ (Lymph nodes) എന്നിവയുണ്ടാവുന്നു.

സൈനസൈറ്റിസ്

തലയോട്ടിയിൽ മൂക്കിന് ചുറ്റുമുള്ള ഭാഗത്തെ വായുനിറഞ്ഞ അറകളെയാണ് ‘സൈനസ്’ എന്നുവിളിക്കുന്നത്​. നെറ്റിയുടെ പിറകിലും കണ്ണുകളുടെ താഴെയും കണ്ണിന്‍റെയും മൂക്കിന്‍റെയും ഇടയിലും മൂക്കിന്‍റെ ഏറ്റവും പിറകിലുമായാണ്​ ഈ അറകളുള്ളത്​.

ഈ അറകളുടെ ഭിത്തിയിൽനിന്ന്​ ഉൽപാദിപ്പിക്കപ്പെടുന്ന കഫം സാധാരണമായി സൈനസിന്‍റെ ചെറിയ ഒരു ദ്വാരം വഴി മൂക്കിലേക്കെത്തി പുറത്തേക്ക്​ പോയ്​ക്കൊണ്ടിരിക്കും. ഏതെങ്കിലും കാരണം മൂലം ഈ ദ്വാരം അടയുകയും സൈനസിലെ കഫം അവിടെത്തന്നെ കെട്ടിക്കിടന്ന് അതിൽ രോഗാണുക്കൾ പെരുകി പഴുപ്പുണ്ടാവുകയും ചെയ്യും. ഇതിനെയാണ് സൈനസൈറ്റിസ് എന്ന് പറയുന്നത്.

ഈ ലക്ഷണങ്ങൾ ശ്രദ്ധിക്കാം

നാലോ അഞ്ചോ ദിവസത്തിലധികം നീണ്ടുനിൽക്കുന്ന മൂക്കടപ്പ്, മഞ്ഞകലർന്ന പച്ചനിറത്തിലുള്ള കഫം, കഠിന ​െതാണ്ടവേദന, ചെവിവേദന, ചെവിയിൽനിന്ന്​ പഴുപ്പ്​ പുറത്തേക്ക്​ വരുക, പനി, കടുത്ത ക്ഷീണം എന്നിവയുണ്ടെങ്കിൽ ഉടൻ വൈദ്യസഹായം തേടേണ്ടതാണ്​.

ജാഗ്രതയോടെ പ്രതിരോധിക്കാം

● വ്യക്തിശുചിത്വം, കൈകൾ കഴുകൽ തുടങ്ങിയ കാര്യങ്ങളിൽ കൂടുതൽ ശ്രദ്ധ നൽകുകയാണ് മഴക്കാലത്ത്​​ ചെയ്യേണ്ട പ്രധാന പ്രതിരോധ പ്രവർത്തനം.

● വീടിനകവും പരിസരവും വൃത്തിയായും ഈർപ്പമില്ലാതെയും സൂക്ഷിക്കുക.

● മുറികൾക്കുള്ളി​ലെ ഈർപ്പം നിറഞ്ഞ അന്തരീക്ഷത്തിൽ പൂപ്പൽ അടിഞ്ഞുകൂടുന്നത് ഒഴിവാക്കാൻ ജനാലകൾ ചെറുതായി തുറന്നിടാം.

● കർട്ടനുകൾ പതിവായി അലക്കുകയും എ.സിയുള്ള വീടുകളിൽ അതിന്‍റെ ഫിൽട്ടറുകൾ വൃത്തിയാക്കുകയും വേണം.

● നനവുള്ള വസ്​ത്രങ്ങൾ ഒഴിവാക്കി ഉണങ്ങിയ കോട്ടൺ വസ്​ത്രങ്ങൾ ധരിക്കാം.

● കുളിക്കാൻ ഇളം ചൂടുവെള്ളം ഉപയോഗിക്കാം

● ആളുകൾ കൂടുതലുള്ള സ്ഥലങ്ങളിൽ മാസ്ക് ധരിക്കുകയോ രോഗമുള്ളവരുമായി സമ്പർക്കം ഒഴിവാക്കുകയോ വേണം.

പ്രാഥമിക ചികിത്സകൾ

ജലദോഷം പിടിപെട്ടാൽ വിശ്രമമാണ്​ പ്രധാന പ്രാഥമിക ചികിത്സ. കഫം അയവുള്ളതാക്കാനും സൈനസിലെ ദ്വാരം തുറക്കാനും ആവി ശ്വസിക്കൽ നല്ല ഫലം നൽകും. ദഹിക്കാൻ എളുപ്പമുള്ള ചൂടുള്ള ആഹാരം മാത്രം കഴിക്കുകയും ആവശ്യത്തിന്​ ഉറങ്ങുകയും വേണം.

ഒരിക്കലും സ്വയം ചികിത്സക്ക്​ മുതിരരുത്​. ഡോക്ടറുടെ നിർദേശപ്രകാരം മാത്രമാണ്​ മരുന്നുകൾ കഴിക്കേണ്ടത്​.

ഭക്ഷണത്തിലും ശ്രദ്ധിക്കാം

രോഗപ്രതിരോധശേഷി വർധിപ്പിക്കുന്ന ഭക്ഷണം കഴിക്കുകയും ശരീരത്തിൽ ജലാംശം നിലനിർത്തുകയും വേണം. ഇതിന്‍റെ ഭാഗമായി ചൂടുള്ള സമീകൃത ആഹാരമാണ്​ കഴിക്കേണ്ടത്​. പഴവർഗങ്ങളും പച്ചക്കറികളും ഭക്ഷണത്തിൽ കൂടുതലായി ഉൾപ്പെടുത്തണം.

കുത്തല്ലേ കൊതുകേ... പ്രതിരോധം പ്രധാനം

ഒട്ടേറെ രോഗങ്ങളാണ് കൊതുകുകള്‍ പരത്തുന്നത്. പൂർണമായ നശീകരണം സാധ്യമല്ലെങ്കിലും ജാഗ്രതയോടെയുള്ള ശുചിത്വശീലങ്ങൾ കൈക്കൊണ്ടാൽ കൊതുക് വ്യാപനം കുറക്കാം. അതിനുള്ള വഴികളിതാ...

● കൊതുകുകളെ നിയന്ത്രിക്കുകയാണ് ഏറ്റവും പ്രധാനം. വീടും സ്ഥാപനങ്ങളും പരിസരങ്ങളും പൊതുസ്ഥലങ്ങളും വൃത്തിയായി സൂക്ഷിക്കുക.

● വീടിന് ചുറ്റും കെട്ടിടങ്ങളുടെ അകത്തും മേൽക്കൂരകളിലും സൺഷേഡിലും കുഴികളിലും വെള്ളം കെട്ടിനിൽക്കാതെ നോക്കാം. ഉറവിട നശീകരണ പ്രവർത്തനങ്ങൾ നടത്താം.

● ആഴ്ചയിലൊരു ദിവസം ഡ്രൈഡേ നടത്തുക.

● ഉപയോഗിക്കാത്ത ടോയ്‌ലറ്റുകൾ ഇടക്കിടെ ഫ്ലഷ് ചെയ്യുക.

● ചെറുകുളങ്ങളിലും ടാങ്കുകളിലും കൂത്താടി ഭോജി മത്സ്യങ്ങളായ ഗപ്പി, ഗംബൂസിയ, മാനത്തുകണ്ണി എന്നിവയെ വളർത്തുന്നത് ഉചിതമാണ്.

● വെള്ളം കെട്ടിനില്‍ക്കുന്ന ഏത് വസ്തുവിലും കൊതുക് മുട്ടയിടുമെന്നതിനാല്‍ സാധനങ്ങള്‍ പുറത്തേക്ക് വലിച്ചെറിയരുത്.

● വീട്ടുമുറ്റത്തും പുരയിടത്തിലും തള്ളിയ പാത്രങ്ങള്‍, ചിരട്ടകള്‍, തൊണ്ട്, ടയര്‍, മുട്ടത്തോട്, ടിന്നുകള്‍, ആക്രി സാധനങ്ങള്‍ തുടങ്ങിയവ സംസ്‌കരിക്കുകയോ വെള്ളം കെട്ടിനില്‍ക്കാതെ കമഴ്ത്തിവെക്കുകയോ ചെയ്യുക.

● വീടിനുള്ളില്‍ പൂച്ചട്ടികള്‍ക്ക് താഴെ വെള്ളം കെട്ടിനില്‍ക്കുന്നത് ഒഴിവാക്കുക. ഫ്രിഡ്ജിനടിയിലെ ട്രേ ആഴ്ചയിലൊരിക്കല്‍ വൃത്തിയാക്കുക.

● സെപ്റ്റിക് ടാങ്കിന്റെയും സ്ലാബുകളുടെയും ഇടകളിലും വശങ്ങളിലുമുള്ള വിടവുകള്‍ സിമന്റ് ഉപയോഗിച്ച് അടക്കുക.

● കിണർ, വാട്ടര്‍ ടാങ്ക്, വെള്ളം സൂക്ഷിക്കുന്ന സംഭരണികള്‍ എല്ലാം അടച്ചുവെക്കുക.

● കെട്ടിക്കിടക്കുന്ന വെള്ളത്തില്‍ ഡീസല്‍, മണ്ണെണ്ണ എന്നിവ ഒഴിക്കാം.

● കൊതുകുകടി തടയാന്‍ കൊതുകുവല ഉപയോഗിക്കുന്നതാണ് ആരോഗ്യത്തിന് ഏറ്റവും നല്ലത്. വീടിന്റെ വാതിൽ, ജനല്‍, വെന്റിലേറ്റര്‍ എന്നിവയില്‍ നെറ്റ് ഇടാം. കൊതുകുതിരി, വേപ്പറൈസര്‍ എന്നിവയിലെ രാസപദാർഥങ്ങള്‍ ആരോഗ്യത്തിന് ഹാനികരമാണ്.

● വീടിനുള്ളില്‍ കുന്തിരിക്കം, അഷ്ടഗന്ധം, രാമച്ചം, സാമ്പ്രാണി തുടങ്ങിയവ പുകക്കുന്നത് കൊതുകുകളെ അകറ്റിനിര്‍ത്തും. ആരോഗ്യത്തിന് ദോഷകരവുമല്ല.

● കുഞ്ഞുങ്ങളെ നിര്‍ബന്ധമായും കൊതുകുവലക്കുള്ളില്‍തന്നെ കിടത്തണം. തുറസ്സായ സ്ഥലങ്ങളില്‍ കിടന്നുറങ്ങാതിരിക്കുക.

● കൊതുക് കടിയില്‍നിന്ന് രക്ഷനേടാന്‍ കൈകളും കാലുകളും നന്നായി മൂടുന്ന വസ്ത്രങ്ങള്‍ ധരിക്കുക.

● കൊതുകുതിരികള്‍, തൊലിപ്പുറത്ത് പുരട്ടുന്ന ലേപനങ്ങള്‍ എന്നിവയെല്ലാം കൊതുക് കടിയില്‍നിന്ന് ഒരു പരിധിവരെ സംരക്ഷണം നല്‍കും.

● കൊതുകുകള്‍ ഏറ്റവുമധികം വ്യാപരിക്കുന്ന രാവിലെയും വൈകുന്നേരവുമുള്ള സമയത്ത് വീടിന് ഉള്‍ഭാഗം പുകച്ചശേഷം ജനലും വാതിലും അടച്ചിടുന്നത് കൊതുക് ശല്യം കുറക്കാന്‍ ഉപകരിക്കും.