സൗദിയിൽ മൂന്നു പതിറ്റാണ്ട് കുതിര ജീവിതം. ഇന്ന് കുതിരകളുടെ മെയിൻ അസിസ്​റ്റന്‍റ്​ ട്രെയിനർ. സംഭവബഹുലമാണ് ഈ മലയാളിയുടെ ജീവിതം

പ്രശസ്​ത ക്ലാർനെറ്റ്​ വാദക​ന്‍റെ മകൻ, ചിത്രകലയിൽ നല്ല വരപാടവം, നാട്ടിൽ ആർട്ട്​ സ്​റ്റുഡിയോ നടത്തിയ പരിചയം. എന്നിട്ടും സൗദി അറേബ്യയിൽ രാജു ഫ്രാൻസിസിനെ കാത്തിരുന്നത്​ കുതിര ജീവിതമായിരുന്നു. രണ്ടുവർഷം അനുഭവിച്ച ദുരിതത്തിനും​ കുടിച്ച കണ്ണീരിനും കണക്കില്ല.

നാട്ടിൽ നിറയെ കടമാണ്. കൂടെപ്പിറപ്പുകളെ വിവാഹം കഴിപ്പിച്ചപ്പോൾ ഉള്ള കിടപ്പാടം വിറ്റുപോയി. രോഗാതുരനായ അച്ഛനും അമ്മയുമടങ്ങുന്ന കുടുംബം വാടക വീട്ടിലാണ്. നിത്യജീവിതം കഴിഞ്ഞുപോകണം. നാട്ടിൽ ബോർഡ്​ എഴുതിയും ചിത്രം വരച്ചും കുറെ നോക്കി, ദൈനംദിന ജീവിതചി​ത്രം ഒന്ന്​ പൂർത്തിയാക്കാൻ.

പക്ഷേ, നടന്നില്ല. അതുകൊണ്ടാണ്​ പലരിൽനിന്ന്​ കടമായി അരലക്ഷം രൂപ സ്വരൂപിച്ച്​ ഏജന്‍റിന്​ കൊടുത്ത്​ സൗദിയിലേക്ക്​ വിസ ഒപ്പിച്ചത്​. ബ്രഷും മോഹങ്ങളുമെല്ലാം വീട്ടിൽ വെച്ചിട്ടാണ്​ വിമാനം കയറിയത്.

തൊഴിലാളികളെ വാടകക്ക്​ കൊടുക്കുന്ന സൗദി കരാറുകാര​ന്‍റെ വിസയിലാണ്​ വന്നത്. 1994ലായിരുന്നു അത്​. കൂടെ കുറെയാളുകളുമുണ്ടായിരുന്നു. റിയാദ്​ നസീമിലെ ​പൊലീസ്​ ട്രെയിനിങ്​ കോളജിലെ കുതിരപ്പടയുടെ ലയത്തിലായിരുന്നു ജോലി.

450 റിയാലായിരുന്നു ശമ്പളം. 50 റിയാൽ ഇഖാമ (റെസിഡന്‍റ്​ പെർമിറ്റ്​) ഫീസ്​ കഫീൽ കുറക്കും. ആഹാരത്തിനും മറ്റുമുള്ള ചെലവ്​ കഴിച്ചാൽ തുച്ഛമായ പണം ബാക്കിയുണ്ടാവും. അതാണ്​ നാട്ടിലേക്ക്​ അയക്കുക. അതുപോലും വലിയ ആശ്വാസമായിരുന്നു നാട്ടിൽ കുടുംബത്തിന്​.

അതിനിടയിലാണ്​ അലർജിയും അസുഖങ്ങളും വന്നത്. ഒട്ടും ജോലിയിൽ തുടരാനാവാത്ത സ്ഥിതി. മനസ്സലിഞ്ഞ കോളജ്​ അധികൃതർ കരാറുകാരനെ വിളിപ്പിച്ച് രാ​ജുവിനെ കൊണ്ടുപോയി ചികിത്സ നൽകി ഭേദമാക്കിയശേഷം വേറെ ജോലിയിലാക്കാൻ നിർദേശിച്ചു.

ശരീരമാകെ പഴുത്തുപൊന്തിയും നീരൊലിച്ചും വികൃതമായ സ്ഥിതിയിലായിരുന്നു. ​കഫീലി​ന്‍റെ ഗോഡൗണിലേക്കാണ്​ കൊണ്ടുപോയത്​. ആ സമയത്ത്​ വിദേശത്ത്​ യാത്രയിലായിരുന്ന കഫീൽ തിരിച്ചെത്തി. ആശുപത്രിയിൽ കൊണ്ടുപോയി. കുറച്ചുകാലത്തെ ചികിത്സകൊണ്ട്​ അസുഖം ഭേദമായി.

പുതിയ ലയത്തിൽ

പുതിയൊരു കുതിരലയത്തിലേക്കാണ് കഫീൽ പിന്നീട് കൊണ്ടുപോയത്​. സൗദി മുൻ ഭരണാധികാരി ഖാലിദ് രാജാവി​ന്‍റെ മകനും അബഹ മുൻ ഗവർണറും നിലവിൽ രാജാവി​ന്‍റെ ഉപദേഷ്​ടാക്കളിൽ ഒരാളുമായ ഫൈസൽ ബിൻ ഖാലിദ്​ രാജകുമാര​ന്‍റെ ഉടമസ്ഥതയിലുള്ള ​റേസിങ്​ സ്​റ്റെബിളിൽ. റേസിങ്​ കുതിരകളെ പരിപാലിക്കുന്ന സ്ഥലമാണ്​ സ്​റ്റെബിൾ (കുതിരപ്പന്തി). അന്ന്​ റിയാദിലെ പ്രധാന റേസ്​കോഴ്​സ്​ നഗരഹൃദയമായ മലസിലായിരുന്നു.

പഴയ കഫീലി​ന്‍റെ ഭാര്യാപിതാവ് മുഷ്​രിഫ്​ അവിടെ കുതിര പരിശീലകനായിരുന്നു. അദ്ദേഹത്തി​ന്‍റെ ശിപാർശയിലായിരുന്നു ഈ ജോലി. അവിടെയും ലയത്തി​ന്‍റെ ശുചീകരണമായിരുന്നു. എന്നാൽ, പിന്നീട്​ അലർജിയോ മറ്റ്​ അസുഖങ്ങളോ ഉണ്ടായില്ല. ശരീരം അതിനോട്​ ഇണങ്ങിക്കഴിഞ്ഞിരുന്നു.

കുതിരക്ക്​ ലാടമടി​ക്കാൻ അവിടെയുണ്ടായിരുന്നത്​ ന്യൂയോർക്കുകാരനായ ടോമായിരുന്നു. ഇംഗ്ലീഷ്​ സംസാരിക്കാൻ പഠിക്കണമെന്നത്​ പണ്ടുമുതലേയുള്ള കൊതിയായിരുന്നു. അതുകൊണ്ട്​ കിട്ടുന്ന സമയമെല്ലാം ടോമി​ന്‍റെ അടുത്തുപോകും. അങ്ങനെ കുറേശ്ശെ ഇംഗ്ലീഷ്​ വശമായി.

ആയിട​ക്ക്​ മുഷ്​രിഫ്​ സ്​റ്റെബിളി​ന്‍റെ മുഴുവൻ ചുമതലക്കാരനായി ജോലിയിൽ ഉയർന്നു. അയാളുമായും നല്ല അടുപ്പമായിരുന്നു. മുഷ്​രിഫി​ന്‍റെ ഒഴിവിലേക്ക്​ അമേരിക്കക്കാരനായ പുതിയൊരു പരിശീലകൻ വന്നു, ജോസഫ്​ ഹെനൈസി​. സ്​റ്റെബിൾ വിട്ടുപോയ ടോമി​ന്‍റെ മരുമകനായിരുന്നു അയാൾ. ആ സമയത്ത്​ സ്​റ്റെബിളിൽ ഇംഗ്ലീഷ്​ സംസാരിക്കുന്ന വേ​റെ ആരുമില്ലായിരുന്നു.

അവിടെയുണ്ടായിരുന്ന 25 ജോലിക്കാരിൽ കുറച്ച്​ ഇംഗ്ലീഷ്​ അറിയുന്നയാൾ രാജു മാത്രമായിരുന്നു. ജോസഫ്​ ​ഹൈനൈസിക്ക്​ രാജുവിനെ ഇഷ്​ടമായി. അദ്ദേഹത്തിന്‍റെ അസിസ്​റ്റന്‍റാക്കി. കുതിര ചാണകം വാരി ലയം വൃത്തിയാക്കുന്ന പണിയിൽനിന്ന്​ കുതിരയെ പരിശീലിപ്പിക്കുന്നയാളുടെ സഹായിയുടെ റോളിലേക്കുള്ള ഉയർച്ച​ അങ്ങനെയാണുണ്ടായത്​.

കുതിര പരിശീലകൻ

ജീവിതത്തിലെ വഴിത്തിരിവായിരുന്നു അത്​. ജീവിതത്തെ മാറ്റിമറിച്ച പ്രമോഷൻ. വിദഗ്​ധനായ ഒരു കുതിര പരിശീലക​ന്‍റെ അസിസ്​റ്റന്‍റാകുക, സ്വപ്​നംപോലും കാണാൻ കഴിയാത്തതായിരുന്നു​. രണ്ടു വർഷം കൊണ്ട് റേസിങ്​ കുതിരയുടെ നല്ലൊരു അസിസ്​റ്റന്‍റ് ട്രെയിനറായി മാറി​. ഇതിനിടെ സ്​റ്റെബിൾ ഇൻ ചാർജ് ചുമതലയും കിട്ടി​.

രണ്ടു വർഷം കഴിഞ്ഞപ്പോൾ ജോസഫും കൂടെയുള്ളവരും നാട്ടിലേക്ക്​ മടങ്ങി. അപ്പോൾ പുതിയ ടീം വന്നു. മുഷ്​രിഫി​ന്‍റെ മകൻ അബ്​ദുല്ല മുഷ്​രിഫ്​ ചീഫ്​ ട്രെയിനറായി. ഇതിനിടെ ട്രെയിനർമാർ മാറിവന്നു. ഇപ്പോൾ ന്യൂയോർക്കുകാരൻ ജിമ്മി ജർക്കൻസാണ്​ മെയിൻ ട്രെയിനർ. ഇവരുടെയെല്ലാം അസിസ്​റ്റന്‍റായി 30 വർഷമായി രാജു കുതിരജീവിതം തുടരുന്നു, ദുഷ്​കരമായിട്ടല്ല, സന്തോഷത്തോടെ, സംതൃപ്​തിയോടെ.

ഇപ്പോൾ പദവിയുടെ പേര്​ മെയിൻ അസിസ്​റ്റന്‍റ്​ ട്രെയിനർ എന്നാണ്​. മെയിൻ ട്രെയിനറാവാൻ വേണ്ട എല്ലാ യോഗ്യതയും ഇന്നുണ്ട്​. എന്നാൽ, അത്​ വേണ്ടെന്ന നിലപാടിലാണ് രാജു. ലോകത്ത്​ പല ഭാഗങ്ങളിൽ കുതിരയോട്ട മത്സരങ്ങളിൽ പ​ങ്കെടുക്കുന്ന കുതിരകളാണ്​. എന്തെങ്കിലും നോട്ടപ്പിഴവ്​ സംഭവിച്ചാൽ ആയിരക്കണക്കിന്​ ഡോളറി​ന്‍റെ പിഴകളാവും​ തലയിൽ വന്ന്​ പതിക്കുക.

കുതിരകളുടെ ലോകം

മലസിലുണ്ടായിരുന്ന കിങ്​ അബ്​ദുൽ അസീസ്​ റേസ്​ കോഴ്​സ്​ ഇന്ന്​ തുമാമയി​ലാണ്. റിയാദിൽനിന്ന്​ 50 കിലോമീറ്റർ അകലെ വടക്കുകിഴക്ക്​ വിശാലമായ മരുഭൂപ്രദേശമാണ്​ തുമാമ. 1999ലാണ്​ അങ്ങോട്ട്​ മാറ്റുന്നത്​. അവിടെ അമേരിക്കക്കാരനായ ജിമ്മി ജർക്കൻസി​ന്‍റെ മെയിൻ അസിസ്​റ്റന്‍റാണ്​ ഇന്ന്​ രാജു.

ലോകോത്തര കുതിരകളുമായാണ് രാജു ഇടപഴകുന്നത്. അമേരിക്ക, ഇംഗ്ലണ്ട്​, ജർമനി, ദക്ഷിണാഫ്രിക്ക, അർജന്‍റീന എന്നിവിടങ്ങളിൽനിന്ന്​ ലേലത്തിൽ പിടിച്ചുകൊണ്ടുവരുന്ന അതിവേഗതയാർന്നതും സൗന്ദര്യതികവാർന്നതുമായ കുതിരകൾ​. മോഹ വിലയാണ്. 10 ലക്ഷം ഡോളർ മുതലാണ്​ വില തുടങ്ങുന്നത്​.

തോറോ ബ്രീഡ് എന്ന​ ഇനത്തിൽപെട്ട കുതിരകളെയാണ്​ റേസിങ്ങിന്​ ഉപയോഗിക്കുന്നത്​. അതുപോലെ അറേബ്യൻ ബ്രീഡ്​ ഇനത്തിലുള്ളതും. എന്നാൽ, രണ്ടിനങ്ങളും ഇടകലർത്തി മത്സരത്തിന്​ ഉപയോഗിക്കാറില്ല.

മത്സരങ്ങൾക്ക്​ വേണ്ടി കുതിരയെ പരിശീലിപ്പിച്ചെടുക്കണം. മെയിൻ പരിശീലകൻ, മെയിൻ അസിസ്​റ്റന്‍റ്​, അതിന്​ കീഴിലൊരു അസിസ്​റ്റന്‍റ് എന്നിവരടങ്ങിയതാണ്​​ കുതിരയെ പരിശീലിപ്പിക്കുന്ന ടീം​. കുതിര പരിപാലനത്തി​ന്‍റെ പ്രധാന ചുമതല വഹിക്കുന്നയാളാണ്​ ‘കുതിരക്കാരൻ’ (ഗ്രൂം)​. ഒരു ​ഗ്രൂമിന്​ രണ്ട്​ കുതിരകൾ എന്ന നിലയിലാണ്​ ജോലിയുടെ ക്രമീകരണം. 160 കുതിരക്കാരാണ്​ രാജുവി​ന്‍റെ സ്​റ്റെബിളിലുള്ളത്. ആരോഗ്യ ശുശ്രൂഷക്ക്​ വെറ്ററിനറി ക്ലിനിക്കുണ്ട്​. അതിൽ മൂന്ന്​ ഡോക്​ടർമാരും​.

റേസിങ്ങിൽ കുതിരയെ ഓടിക്കാൻ ലൈസൻസുള്ളയാളാണ്​ ജോക്കി. അത്തരത്തിൽ ലോകപ്രശസ്​തരായ നിരവധി ജോക്കികളുണ്ട്​. അവരാണ്​ മത്സരങ്ങളിൽ കുതിരയെ ഓടിക്കുന്നത്​. റിയാദിൽ മത്സരിക്കാനെത്തുന്നത്​ ലോകത്തെ ചാമ്പ്യന്മാരായ ജോക്കികളാണ്​​.

പരിശീലനം വിവിധ ഘട്ടങ്ങളായാണ്​ നടത്തുക. കുതിരയുടെ പുറത്ത്​ ആളിരുന്ന് അതിനെ​ നടത്തുന്നതിനെ ‘ടാക്​ വാക്ക്​’ (Tack Walk) എന്നാണ്​​ പറയുക. ഇത്​ ഒരു പരിശീലന ഘട്ടമാണ്​. അതുപോലെ അനങ്ങിയനങ്ങി ഓടുന്നതിനെ ട്രോട്ടിങ്​ (Trotting) എന്നും​ പറയും. അടുത്ത ഘട്ടമാണ്​ ‘കന്‍റെർ’. കുതിരകൾ ചാടി ചാടി ഓടിപ്പോകുന്നതിനെയാണ്​ ഇങ്ങനെ പറയുന്നത്​.

സൗദി കപ്പ്​

ലോകത്തെ ഏറ്റവും സമ്പന്ന കുതിരയോട്ട മത്സരം സൗദി കപ്പിന്​ വേണ്ടിയുള്ളതാണ്. 20 മില്യൺ ഡോളർ സമ്മാനമുള്ള മത്സരം. റിയാദ്​ തുമാമയിലെ കിങ്​ അബ്​ദുൽ അസീസ്​ റേസ്​കോഴ്​സിൽ എല്ലാ വർഷവും തുടക്കത്തിലാണ്​ മത്സരം. ലോകത്തെ ഏറ്റവും മികച്ച തോറോ ബ്രീഡ്​ ഇനം കുതിരകൾക്കും ജോക്കികൾക്കും മത്സരിക്കാനുള്ള വേദി.

ഒക്​ടോബർ മുതൽ മാർച്ച്​ വരെയുള്ള തണുപ്പുകാലമാണ്​ കുതിരയോട്ട മത്സരങ്ങളുടെ റിയാദ്​ സീസൺ. ഈ സമയത്ത്​ എല്ലാ വാരാന്ത്യങ്ങളിലും പ്രാദേശിക മത്സരങ്ങളും കിങ്​ അബ്​ദുൽ അസീസ്​ റേസ്​കോഴ്​സിൽ നടക്കുന്നുണ്ട്. ലക്ഷം റിയാലാണ്​ അതിൽ പോലും സമ്മാനത്തുക. അതിലും തുമാമയിലെ എല്ലാ പന്തികളിലുംനിന്നുള്ള കുതിരകൾ മത്സരിക്കുന്നുണ്ടാവും.

കുതിരപ്രിയനായ രാജകുമാരൻ

ഒരു ജോക്കിയോ കുതിരസവാരിക്കാ​രനോ അല്ല ഫൈസൽ ബിൻ ഖാലിദ്​ രാജകുമാരൻ. എന്നാൽ, അദ്ദേഹത്തി​ന്‍റെ കുതിരകളോടുള്ള പ്രണയം വിശ്രുതമാണ്​.

കുതിരകളോടും ജോക്കികളോടും മാത്രമല്ല, കുതിരകളെ പരിപാലിക്കുന്ന സാധാരണ തൊഴിലാളികളോടും വളരെ അടുപ്പവും ഇഷ്​ടവും പുലർത്തുന്ന തൊഴിലുടമ കൂടിയാണ്​ അദ്ദേഹം. ​ത​ന്‍റെ കുതിരപ്പന്തിയിൽ ശുചീകരണ തൊഴിലാളിയായി തുടങ്ങി കുതിര പരിശീലകനായി വളർന്ന്​ മൂന്ന്​ പതിറ്റാണ്ടിലേറെയായി സേവനം തുടരുന്ന രാജു ഫ്രാൻസിസിനോട്​ അദ്ദേഹത്തിന് പ്രത്യേക ഇഷ്​ടം തന്നെയുണ്ട്.

അദ്ദേഹം സ്​റ്റെബിൾ വിസിറ്റിങ്ങിന്​ വരു​മ്പോൾ തന്നെ വിളിച്ച്​ പ്രത്യേകം കാര്യങ്ങൾ അന്വേഷിക്കാറുണ്ടെന്നും ത​ന്‍റെ ഇളയ​ മകളെ ബന്ദരി എന്ന്​ പേര്​ ചൊല്ലിവിളിച്ചത് അദ്ദേഹമാണെന്നും​​ രാജു അഭിമാനത്തോടെ പറയും. അദ്ദേഹത്തി​ന്‍റെ​ സഹോദരിയുടെ പേരാണത്​.

പ്രാണന്​ തുല്യം ചിത്രകല

തൃശൂരിലെ കുരുതുകുളങ്ങര കുടുംബാംഗമാണ്​​ രാജു ഫ്രാൻസിസ്​. അച്ഛൻ കെ.എ. ഫ്രാൻസിസ്​. തൃശൂർ മധു എന്ന പേരിൽ കേരളത്തിലുടനീളം അറിയപ്പെട്ടിരുന്ന പ്രമുഖ ക്ലാർനെറ്റ്​ മാസ്​റ്റർ. പ്രശസ്​ത കാഥികൻ വി. സാംബശിവ​ന്‍റെ പിന്നണിയിൽ ക്ലാർനെറ്റ്​ വാദകനായി ചേർന്നതോടെ താമസം കൊല്ലത്തേക്ക്​ മാറ്റി.

കൊട്ടാരക്കര മൈലത്ത്​ സ്വന്തമായി വസ്​തു വാങ്ങി അതിലുള്ള ഒരു ചെറിയ വീട്ടിൽ താമസം തുടങ്ങി. രാജുവി​ന്‍റെ അമ്മ ആഗ്​നസ് നാടകനടിയായിരുന്നു. ഇവരുടെ മൂന്ന് മക്കളിൽ ഇളയ ആളാണ്​ രാജു. വളർന്നതും പഠിച്ചതുമെല്ലാം കൊട്ടാരക്കരയിലാണ്​.

രാജുവിന്​ കുട്ടിക്കാലം മുതലേ ചിത്രരചനയിൽ താൽപര്യമുണ്ടായിരുന്നു. കൊട്ടാരക്കരയിലെ രവിവർമ ഇൻസ്​റ്റിറ്റ്യൂട്ടിലാണ്​ ചിത്രരചന അഭ്യസിച്ചത്. ശേഷം കൊട്ടാരക്കര ചന്തമുക്കിൽ ആർട്ട്​ സ്​റ്റുഡിയോ തുടങ്ങി. ചിത്രം വരച്ചും ബോർഡുകൾ എഴുതിയും ​ജീവിക്കാൻ പരിശ്രമിച്ചു. എന്നാൽ,​ ദൈനംദിന ജീവിതചിത്രം പൂർത്തിയാക്കാൻ ബ്രഷിനും നിറക്കൂട്ടുകൾക്കും കഴിയില്ലെന്ന്​ വേദനയോടെ തിരിച്ചറിഞ്ഞ് എല്ലാം ഉപേക്ഷിച്ച്​ കിട്ടിയ വിസയിൽ സൗദിയിലേക്ക്​ വിമാനം കയറുകയായിരുന്നു.

ആദ്യകാല ദുരിതങ്ങൾക്ക്​ ശേഷം കുതിര ജീവിതത്തിൽനിന്ന് രക്ഷപ്പെട്ടപ്പോൾ മാറ്റിവെച്ച ബ്രഷുകൾ തിരിച്ചെടുത്തു. ചിത്രംവര പുനരാരംഭിച്ചു. ചിത്രകലയിലെ പുതുപരീക്ഷണങ്ങളിൽ ഒരു കൈ നോക്കാൻ തുടങ്ങി. പുതിയ മീഡിയങ്ങളും സ​ങ്കേതങ്ങളും പരിചയിച്ചു.

മനസ്സിൽ കാണുന്നത്​ മരത്തിൽ വരക്കുന്ന കരവിരുതിലാണ്​ ഇപ്പോൾ രാജു ഞെട്ടിക്കുന്നത്​. മരത്തി​ന്‍റെ ഫലകങ്ങളിൽ ചൂടാക്കിയ കൂർത്ത സൂചിമുന കൊണ്ട്​ ചിത്രം കൊത്തുന്ന പണി. പൈൻ മരത്തി​ന്‍റെ തടിയിൽ സോൾഡറിങ്​ അയൺ പോലുള്ള ഇലക്​ട്രോണിക്​ ഡിവൈസ്​ കൊണ്ട്​ ചിത്രം വര​ക്കുന്ന ഈ ചിത്രകലാരീതി ‘പൈറോഗ്രഫി’ എന്നാണ്​ അറിയപ്പെടുന്നത്​. ചൂടാവുന്ന സൂചിമുന തടിപ്രതലത്തെ കരിച്ച്​ ആഴ്​ന്നിറങ്ങി ചിത്രങ്ങൾ വരയും.

ഇത്തരത്തിൽ നിരവധി ചിത്രങ്ങൾ രാജുവി​ന്‍റെ ശേഖരത്തിലായിക്കഴിഞ്ഞു. യേശുവി​ന്‍റെ മുതൽ ഏതാണ്ട്​ എല്ലാ വിശ്വവിഖ്യാതരുടെയും മലയാള സിനിമാരംഗത്തെ പ്രമുഖരുടെയും ചിത്രങ്ങൾ​ ശേഖരത്തിലുണ്ട്​.​

നോവുകൾ നോവലായി

സൗദിയിൽ പ്രവാസിയായ എഴുത്തുകാരി സബീന എം. സാലിയെ പരിചയപ്പെടാനിടയായത്​ ഇതിനിടെ രാജുവിനെ നോവൽ കഥാപാത്രവുമാക്കി. ഡി.സി ബുക്​സ് പ്രസിദ്ധീകരിച്ച സബീനയുടെ ‘ലായം’ എന്ന നോവലിൽ രാജുവി​ന്‍റെ ജീവിത നോവുകളാണുള്ളത്​. അതിലെ നായകൻ രാജു, രാജു ഫ്രാൻസിസാണ്​. അദ്ദേഹത്തിന്‍റെ ജീവിതമാണ്​ അതിൽ നിറയെ. നോവൽ കുറഞ്ഞകാലം കൊണ്ട്​ മൂന്നാം പതിപ്പിലെത്തി.

കുടുംബം

തുമാമയിലെ സ്​റ്റെബിൾ കോമ്പൗണ്ടിനുള്ളിൽ രാജു ഫ്രാൻസിസ്​ സകുടുംബമായാണ്​ കഴിയുന്നത്​. ലിൻസയാണ്​ ഭാര്യ. മകൻ ഏബൽ റിയാദ്​ ഇന്ത്യൻ ഇന്‍റർനാഷനൽ സ്​കൂളിൽ പ്ലസ്​ടു വിദ്യാർഥി. മകൾ അലോന റിയാദ്​ മോഡേൺ മിഡിൽ ഈസ്​റ്റ്​ സ്​കൂളിൽ പത്താം ക്ലാസ്​ വിദ്യാർഥിനി.

തുമാമയിലെ വീട്ടിൽ കുടുംബാംഗങ്ങളായി ഇവർ മാത്രമല്ല, മലയാളം സംസാരിക്കുന്ന മൈന, രണ്ട്​ പൂച്ചകൾ, ലൗ ബേഡ്​സ്​, ആ​ഫ്രിക്കൻ ലൗ ബേഡ്​സ്​ എന്നിവ കൂടിയുണ്ട്​.