തുടരും, ബിസിനസും സംഗീതവും

ഉപ്പ മൊയ്തുണ്ണി ബാവ 1984ലാണ്​ ഇന്ന്​ ആർ.എഫ്​ കമ്പെയ്​ൻ എന്ന വലിയ സ്ഥാപനമായി വളർന്ന​ കമ്പനിക്ക്​ തുടക്കമിടുന്നത്​. 1986ൽ റോസ്​ ഫ്ലവർ എന്ന ബ്രാൻഡിന്​ തുടക്കമിട്ടു. റോസ്​ ഫ്ലവറിന്‍റെ ചുരുക്കമാണ്​ ആർ.എഫ്​

സംഭവം '90കളിലാണ്​. മലപ്പുറം ജില്ലയിലെ എടപ്പാളിലെ പ്രശസ്തമായ കുളങ്കര ഭഗവതി ക്ഷേത്രത്തിൽ നവരാത്രി സംഗീതോൽസവം ആഘോഷിക്കുകയാണ്​. ഒമ്പത്​ ദിവസം നീളുന്ന പരിപാടികളുടെ ഭാഗമായി പ്രദേശത്തെ സംഗീത സ്ഥാപനത്തിലെ കുട്ടികളുടെ അരങ്ങേറ്റമാണ്​ സ്​റ്റേജിൽ ഇനി നടക്കേണ്ടത്​. കുട്ടികൾ ഓരോരുത്തരായി വേദിയിലേക്ക്​ കയറിത്തുറങ്ങി. ക്ഷേത്ര മുറ്റത്തെ അരങ്ങേറ്റത്തിന്​ യോജിച്ച, ആചാരപ്രകാരമുള്ള രീതിയിൽ വസ്ത്രങ്ങളണിഞ്ഞാണ്​ കുട്ടികൾ സ്​റ്റേജിൽ കയറുന്നത്​. അതിനിടയിൽ ഒരുകുട്ടി മാത്രം ടീഷർട്ടും പാൻറുമിട്ട് വേദിയിൽ നിൽക്കുന്നു. കുട്ടിയുടെ പേര്​ ഫസലുറഹ്​മാൻ. ആ നിൽപ്പിലോ ആ പേരിലോ ആർക്കും അലോസരമില്ല. അന്ന്​ നാട്​ അങ്ങനെയായിരുന്നു. സദസ്സ്​ നിശബ്​ദമായിരുന്ന്​ സംഗീതം ആസ്വദിച്ചു. കുട്ടികളുടെ കഴിവിന്​ കരഘോഷം മുഴക്കി ആർപ്പുവിളിച്ചു. സംഗീതോൽസവം കഴിഞ്ഞ്​ എല്ലാവരും സന്തോഷത്തോടെ വീട്ടിലേക്ക്​ മടങ്ങി.

ഒരുപക്ഷേ രണ്ടോ മൂന്നോ പതിറ്റാണ്ട്​ മുമ്പ്​, കേരളത്തിലെ ഏതൊരു ഗ്രാമത്തിലും സംഭവ്യമായ സാധാരണക്കാര്യമാണിത്​. എന്നാൽ തന്‍റെ ബാല്യകാലത്തെ മധുരസ്മരണ പങ്കുവെക്കുന്നയാൾ ഇന്ന്​​ ദുബൈ ആസ്ഥാനമായി പ്രവർത്തിക്കുന്ന ഒരു ബഹുരാ​ഷ്ട്ര കമ്പനിയുടെ സി.ഇ.ഒയാണ്​. മറ്റാരുമല്ല, മലയാളികൾക്ക്​ പ്രിയപ്പെട്ട നിരവധി ഭക്ഷ്യ ബ്രാൻഡുകളുടെ അമരക്കാരായ ആർ.എഫ്​ കമ്പെയ്​ന്‍റെ സി.ഇ.ഒ ഫസലുറഹ്​മാൻ. ബിസിനസി​ൽ വലിയ ഉയരങ്ങളിലേക്ക്​ എത്തിയപ്പോഴും വീട്ടുകാരറിയാതെ പഠിച്ച സംഗീതം അദ്ദേഹത്തെ വീണ്ടും മാടിവിളിക്കുകയാണ്​. ആദ്യം സുഹൃത്തുകൾക്കിയിലും, പിന്നീട്​ സാമൂഹിക മാധ്യമങ്ങളിലും പാടിത്തുടങ്ങി. പലരുമിപ്പോൾ ബിസിനസിനെ കുറിച്ച്​ ചോദിക്കുന്നത്​ പോലെ പാട്ടിനെ കുറിച്ചും ചോദിക്കുന്നുണ്ട്​. ആർ.എഫ്​ കമ്പെയ്​ന്‍റെ തലപ്പത്ത്​ രണ്ട്​ ദശാബ്​ദം പൂർത്തീകരിക്കുന്ന സന്ദർഭത്തിൽ സംഗീതവും ബിസിനസും ഇഴചേർന്ന സ്വപ്നസഞ്ചാരം ‘ഗൾഫ്​ മാധ്യമ’വുമായി പങ്കുവെക്കുകയാണ്​ അദ്ദേഹം.

ബിസിനസിനെ കുറിച്ച്​ സംസാരിക്കുന്നതിന്​ മുമ്പ്​ സംഗീതത്തെ കുറിച്ച്​ ചോദിക്കട്ടെ. എങ്ങനെയാണ്​ സംഗീതത്തിന്‍റെ സുഹൃത്തായത്​

സംഗീതം രക്​തത്തിലുള്ളതാണ്​. ജന്മനാ തന്നെ പാടാനുള്ള ഒരു കഴിവുണ്ട്​. ചെറുപ്പത്തിൽ എന്നും റേഡിയോയിൽ പാട്ടുകൾ കേൾക്കുമായിരുന്നു. ശാസ്ത്രീയ സംഗീതം കേട്ടുകേട്ട് പഠിക്കാനുള്ള മോഹമുദിച്ചു. എട്ടാം ക്ലാസിൽ പഠിക്കുമ്പോൾ എടപ്പാളിലെ ഒരു സംഗീത സ്ഥാപനത്തിൽ ചേർന്നാണ്​ പഠിച്ചത്​. വീട്ടിലെ ആരും അറിഞ്ഞിരുന്നില്ല. ട്യൂഷന്​ പോകുന്നുവെന്ന്​ പറഞ്ഞാണ്​ പോയിരുന്നത്​. മണികണ്​ഠൻ മാഷ്​ എന്നയാളാണ്​ സംഗീതം പഠിപ്പിച്ചിരുന്നത്​. രണ്ട്​ വർഷമാണ്​ പഠിച്ചത്​. പിന്നീട്​ സ്കൂൾ, കോളേജ്​ കലോൽസവങ്ങളിലൊക്കെ ഗാനാലപനത്തിനും പദ്യംചൊല്ലലുമൊക്കെ പ​ങ്കെടുത്ത്​ ജില്ലാ തലത്തിൽ വരെ മൽസരിച്ചിട്ടുണ്ട്​. സംഗീതം പഠിക്കുക മാത്രമല്ല, സംഗീതോൽസവത്തിൽ അരങ്ങേറ്റവും കുറിച്ചു. എല്ലാവരും മുണ്ടുടുത്ത്​ അരങ്ങേറ്റത്തിന്​ കയറിയപ്പോൾ പാന്‍ററുടുത്താണ്​ കയറിയത്​​. അന്ന്​ ചിട്ടവട്ടങ്ങളൊന്നും അറിയില്ലായിരുന്നു. ഇപ്പോഴും പാട്ടാണ്​ ഹോബി. ഇപ്പോൾ ചിലപ്പോൾ മീറ്റിങിൽ ഒക്കെ പാടും. ചില പാട്ടുകൾ സാമൂഹിക മാധ്യമങ്ങളിൽ പങ്കുവെച്ചിട്ടുണ്ട്​. ബിസിനസിനൊപ്പം സംഗീതവുമാണ്​ ജീവിതം.

പാട്ടുപാടി നടന്നിരുന്നയാൾ ബിസിനസിലെത്തിയത്​ എങ്ങനെയായിരുന്നു? സ്വന്തം തെരഞ്ഞെടുപ്പായിരുന്നോ അത്​

2005മേയിലാണ്​ ദുബൈയിൽ പിതാവ്​ ആരംഭിച്ച ബിസിനസിൽ വന്നുചേരുന്നത്. കോളേജ്​ വിദ്യാഭ്യാസം ചെന്നൈയിലായിരുന്നു. എൻജിനീയറിങ്​ ഐ.ടി ഫീൽഡ്​ ആയിരുന്നു പഠനം. എന്നാൽ പഠന ശേഷം നേരെ ബിസിനസിൽ ചേരാനായിരുന്നു മാതാപിതാക്കളുടെ നിർദേശം. അത്​ അനുസരിക്കുകയായിരുന്നു. ഉപ്പ മൊയ്തുണ്ണി ബാവ 1984ലാണ്​ ഇന്ന്​ ആർ.എഫ്​ കമ്പെയ്​ൻ എന്ന വലിയ സ്ഥാപനമായി വളർന്ന​ കമ്പനിക്ക്​ തുടക്കമിടുന്നത്​. 1986ൽ റോസ്​ ഫ്ലവർ എന്ന ബ്രാൻഡിന്​ തുടക്കമിട്ടു. റോസ്​ ഫ്ലവറിന്‍റെ ചുരുക്കമാണ്​ ആർ.എഫ്​ എന്നത്​. ഇന്നും കമ്പനിയുടെ കരുത്തായ അബ്​ദുല്ല എന്ന ഉപ്പയുടെ ബന്ധു ഈ സമയത്താണ്​​ കമ്പനിയിൽ ചേർന്നുത്​. 1992ൽ എന്‍റെ അമ്മാവൻ ശംസുക്ക എന്ന ശംസുദ്ധീൻ കമ്പനിയിൽ ചേർന്നു. കോളേജ്​ പഠനം കഴിഞ്ഞതിന്​ ശേഷം ഉപ്പ അദ്ദേഹത്തെ കൊണ്ടുവരികയായിരുന്നു. കമ്പനി ആരംഭിച്ച്​ 20വർഷത്തിന്​ ശേഷം 2004ലാണ്​ നെല്ലറ എന്ന കൺസെപ്​റ്റ്​ തുടങ്ങുന്നത്​. അതുവരെ ചെയ്തതിൽ നിന്ന്​ വ്യത്യസ്തമായി റെസിപ്പി പൊടികൾ വിപണിയിൽ എത്തിക്കുന്ന പദ്ധതിയായിരുന്നു അത്​. ബ്രാൻഡ്​ എന്ന നിലക്ക്​ നെല്ലറയെ വികസിപ്പിച്ച്​ വലുതാക്കിയ ആളാണ്​ ഷംസുക്ക. ഇന്ന്​ സ്ഥാപനത്തിന്‍റെ എം.ഡിയായ ശംസുക്കയുടെ ഒരു താൽപര്യത്തിലാണ്​ ഈ പേരും കാറ്റഗറിയും ആരംഭിക്കുന്നത്​.

ഞാൻ കോളേജിൽ പഠിക്കുന്ന കാലത്തൊന്നും ബിസിനസിൽ ചേരാനുള്ള ലക്ഷ്യമൊന്നുമുണ്ടായിരുന്നില്ല. എൻജിനീയറിങിൽ തന്നെ ജോലി എന്ന താൽപര്യമാണുണ്ടായിരുന്നത്​. പിന്നീട്​ പഠനത്തിന്‍റെ അവസാന വർഷമായപ്പോൾ ബിസിനസിൽ ചേരാനുള്ള ഒരു നിർദേശം ഉപ്പയും ഉമ്മയുമൊക്കെ മുന്നോട്ടുവെക്കുകയായിരുന്നു. കമ്പനിയിൽ ചേരുന്ന സമയത്ത്​ ഞങ്ങൾ ഹോൾസെയിൽ ബിസിനസിൽ ശ്രദ്ധിച്ചിരുന്ന കാലമാണ്​​. റീടെയ്​ലിൽ ചെറിയ രീതിയിൽ മാത്രമായിരുന്നു. നെല്ലറയുടെ തുടക്ക കാലവുമായിരുന്നു. ബ്രാൻഡിന്‍റെ തുടക്കകാലത്ത്​ കമ്പനിയോടൊപ്പം ചേരാൻ സാധിച്ചത്​ വളർച്ച നേരിട്ട്​ കാണാൻ സഹായിച്ചിട്ടുണ്ട്​. നേരത്തെ സ്കൂളിൽ പഠിക്കുന്ന കാലത്ത്​ ഇവിടെ വന്നിരുന്നതിനാൽ ​​ഫ്ലോർ മില്ലും മറ്റു സംവിധാനങ്ങളുമൊക്കെ കണ്ടിട്ടുണ്ട്​. കമ്പനിയുടെ രണ്ട്​ ഘട്ടവും കണ്ടിട്ടുണ്ട്​. അന്ന്​ കുറഞ്ഞ ജീവനക്കാരും ചെറിയ ഒഫീസ്​ സംവിധാനങ്ങളുമുള്ള കാലമായിരുന്നു. ഇന്നീകാണുന്ന വലിയ സംവിധാനങ്ങളൊക്കെ ഞാനിവിടെ എത്തിയ ശേഷമാണുണ്ടാകുന്നത്​. അക്കൗണ്ട്​സ്​ ആൻഡ്​ അഡ്​മിനിസ്​ട്രേഷൻ പിന്നീടാണ്​ ഒരു മൾടിനാഷണൽ കമ്പനിക്ക്​ ആവശ്യമായ രീതിയിൽ മാറുന്നത്​. അതിൽ പങ്കുവഹിക്കാൻ കഴിഞ്ഞുവെന്നത്​ സന്തോഷം നൽകുന്ന കാര്യമാണ്​. തുടക്കത്തിൽ കമ്പിനിയിലെ അക്കൗണ്ടന്‍റായും എച്ച്.ആറായും ഒക്കെ പ്രവർത്തിച്ചു. നിലവിൽ അക്കൗണ്ട്​സിൽ മാത്രം നൂറോളം ജീവനക്കാർ സ്ഥാപനത്തിനുണ്ട്​. പുതുതലമുറയുടെ ഒരു പ്രതിനിധി എന്ന നിലയിൽ ഓരോ കാലത്തെയും മാറ്റങ്ങൾ കൊണ്ടുവരാൻ സാധിച്ചുവെന്നതാണ്​ 20വർഷത്തെ ബിസിനസ്​ ജീവിതത്തിന്‍റെ ആഹ്ലാദം.

കഴിഞ്ഞ 20വർഷക്കാലത്ത്​ കമ്പനി നിരവധി നാഴികക്കല്ലുകൾ പിന്നിട്ടു. വളരെ ചുറുചുറുക്കുള്ള പ്രായത്തിൽ സ്ഥാപനത്തിൽ എത്തിയ ആളെന്ന നിലയിൽ ഓരോ ചുവടുവെപ്പിലും സ്വന്തമായ കാഴ്ചപ്പാടുകൾ അവതരിപ്പിച്ചിടുണ്ടാകും. കഴിഞ്ഞ രണ്ട്​ ദശാബ്​ദക്കാലം ഓർത്തെടുക്കുമ്പോൾ എ​ന്തെല്ലാമാണ്​ ഓർമയിൽ നിറയുന്നത്​

കമ്പനിയുടെ നാഴികക്കല്ലുകൾ ഓർത്തെടുത്താൽ തീർച്ചയായും ഫ്ലവർമില്ലിൽ നിന്ന്​ റോസ്​ ഫ്ലവർ എന്ന ബ്രാൻഡ്​ ആരംഭിച്ചതും, 2004ൽ നെല്ലറ എന്ന ബ്രാൻഡ്​ തുടങ്ങുന്നതും ഒരു വലിയ മുന്നേറ്റമുണ്ടാക്കിയ സംഭവങ്ങളാണ്​. നെല്ലറ ബ്രാൻഡ്​ ആരംഭിച്ച ശേഷം മുന്നേറ്റത്തിന്‍റെ കാലമായിരുന്നു. പിന്നീട്​ റസ്റ്ററന്‍റ്​ ഫീൽഡിൽ കയ്യൊപ്പ്​ ചാർത്താൻ സാധിച്ചു. 2010ലാണ്​ റസ്റ്ററന്‍റ്​ രംഗത്തേക്ക്​ കാലെടുത്ത്​ വെക്കുന്നത്​. റസ്റ്ററൻറുകൾ നിലവിൽ നാലെണ്ണമുണ്ട്​. റസ്​റ്റോറന്‍റിലൂടെ ഉണ്ടായിട്ടുള്ള ഒരു സംരംഭമാണ്​ റെഡി ടു കുക്ക്​-ആർ.ടി.സി എന്ന മേഖല. ഇത്​ 2017ലാണ്​ ആരംഭിക്കുന്നത്​. പൊറോട്ട, ചപ്പാത്തി, ബാറ്റർ എന്നിങ്ങനെ വിഭവങ്ങൾ നൽകുന്നുണ്ട്​. നിലവിൽ ആകെ ബിസിനസിന്‍റെ നല്ല ശതമാനം ഈ രംഗത്തുനിന്നാണ്​. ഫിൽഫിൽ ഷോപ്പ്​ എന്നറിയപ്പെടുന്ന കാറ്റഗറി, ഇ-​കൊമേഴ്​സ്​ കാറ്റഗറി എന്നിവയെല്ലാം അടുത്ത കാലത്ത്​ കമ്പനിയുണ്ടാക്കിയ മുന്നേറ്റങ്ങളാണ്​. ഉത്തരേന്ത്യൻ റെസിപ്പി പൗഡർ ‘മൽഹാർ’ എന്ന പേരിൽ വിപണിയിലേക്ക് ഇറക്കാനാനിരിക്കുകയാണ്​. നിലവിൽ ​ആർ.എഫ്​ കമ്പയ്​ൻ ഫൗണ്ടേഷൻ എന്ന ​ബിസിനസ്​ ട്രസ്റ്റ്​ രൂപീകരിച്ച്​​ എല്ലാ ഡിവിഷനുകളും അതിന്​ കീഴിലേക്ക്​ കൊണ്ടുവന്നിട്ടുണ്ട്​. ഒരു ഫാമിലി ബിസിനസ്​ സ്ഥാപനമെന്ന നിലക്കാണ്​ മുന്നോട്ടുപോകുന്നത്​. ഞങ്ങളുടെ നാടായ എടപ്പാളിൽ പ്രൊഡക്ഷൻ യൂനിറ്റുണ്ട്​. അടുത്തായി കോയമ്പത്തൂരിലും പ്രെഡക്ഷൻ യൂനിറ്റ്​ തുറന്നിട്ടുണ്ട്​. ഇ-കെമേഴ്​സിലേക്ക്​ കോവിഡ്​ കാലത്താണ്​ കാലെടുത്തുവെക്കുന്നത്​. ഫിൽഫിൽ മാർക്കറ്റ്​ ഡോട്ട്​ കോം എന്നാണ്​ ഈ പ്ലാറ്റ്​ഫോമിന്‍റെ പേര്​. കൂടുതലും ബി ടു ബി ബിസിനസാണ്​ അതിലൂടെ നടക്കുന്നത്​.

വലിയ ജനകീയത നേടാൻ കഴിഞ്ഞ സ്ഥാപനമാണ്​ താങ്കളുടേത്​. ഓരോ കമ്പനിക്കും സ്വീകാര്യത ലഭിക്കുന്നതിന്​ പിന്നിൽ ചില മൂല്യങ്ങളുണ്ടാകും. എന്തെല്ലാം മൂല്യങ്ങളായിരിക്കും ആർ.എഫ്​ കമ്പെയ്നെ മുന്നോട്ടു നയിക്കുന്നത്​

ഫുഡ്​സ്റ്റഫ്​ മാനുഫാക്​ചറിങ്​ കമ്പനി എന്ന നിലയിൽ ഉൽപന്നങ്ങളുടെ ഗുണനിലവാരം ഉറപ്പാക്കുക എന്നതാണ്​ ഇക്കാലം വരെയും മുറുകെ പിടിച്ചിട്ടുള്ള മൂല്യം​. അതുപോലെ കമ്പനിയിലെ ടീമിനെ കൂടെ നിർത്തുക എന്നത്​ വളരെ പ്രാധാന്യത്തോ​ടെ കാണുന്ന കാര്യമാണ്​. ഗുണനിലവാരം ഉറപ്പാക്കാൻ ക്വാളിറ്റി ഡിപാർട്​മെന്‍റ്​ തന്നെ കമ്പനിയിലുണ്ട്​. പർചേഴ്​സ്​ ടീം ക്വാളിറ്റി ടീമും സഹകരിച്ച്​ പ്രവർത്തിക്കുന്നുണ്ട്​. പർചേസിന്‍റെ സമയത്ത്​ തന്നെ ക്വാളിറ്റി ടീമിന്‍റെ ഇടപെടലുണ്ടാവുകയും ഉൽപന്നങ്ങളുടെ ഗുണനിലവാരം ഉറപ്പുവരുത്തുകയും ചെയ്യാറുണ്ട്​. ഈ ഗുണനിലവാരവും മികച്ച ഉപഭോക്​തൃ സേവനവുമാണ്​ സ്ഥാപനത്തിന്‍റെ ജനപിന്തുണക്ക്​ കാരണമായിട്ടുള്ളത്​. കമ്പനിയുടെ 40വർഷവും ഈ മൂല്യത്തിലാണ്​ മുന്നോട്ടുപോയത്​. ഇനിയും അതിൽ വിട്ടുവീഴ്ചയില്ലാതെ സ്ഥാപനം മുന്നോട്ടുപോകും. ഏറ്റവും പുതിയ ടെക്​നോളജി എല്ലാ കാര്യത്തിലും ഉപയോഗപ്പെടുത്തിയതും കമ്പനിയുടെ വിജയത്തിന്‍റെ കാരണങ്ങളിലൊന്നാണ്​. വേഗതയേറിയ ജീവിതത്തിനിടയിൽ ആരോഗ്യകരമായ ഭക്ഷണം ഉപഭോക്​താക്കൾക്ക്​ നൽകുക എന്നതാണ്​ ലക്ഷ്യംവെക്കുന്നത്​. ആരോഗ്യകരമായ ഭക്ഷണം എന്നത്​ കൊണ്ട്​ ഉദ്ധേശിക്കുന്നത്​ പ്രിസർവേറ്റീവ്​സും മറ്റും ഉപയോഗിക്കാതെ ശുദ്ധമായ ഭക്ഷണം നൽകുക എന്നതാണ്​. നെല്ലറയുടെ ഒരു ആർ.ടി.സി ഉൽപന്നത്തിലും പ്രിസർവേറ്റീവ്​സ്​ ഉപയോഗിക്കുന്നില്ല. അതിനാലാണ്​ ഷെൽഫ്​ ലൈഫ്​ കുറയുന്നത്​. ചില്ലറിൽ സൂക്ഷിക്കുന്ന ഉൽപന്നങ്ങൾക്ക്​ അതിനാൽ തന്നെ മാക്സിമം ഏഴു ദിവസമാണ്​ ഷെൽഫ്​ ലൈഫ്​ ലഭിക്കുന്നത്​.

എന്താണ്​ കമ്പനിയുടെ ഭാവി കാഴ്ചപ്പാട്​? മലയാളികളുടെ ഒരു സംരംഭം എന്ന നിലയിൽ ഇന്ത്യക്കും കേരളത്തിനും എന്തെല്ലാം പ്രതീക്ഷിക്കാം

ആർ.എഫ്​ കമ്പെയ്​ൻ ഗ്രൂപ്പിന്‍റെ കീഴിൽ ധാരാളം ബ്രാൻഡുകൾ രൂപപ്പെടുത്തിയിട്ടുണ്ട്​. ഇതിൽ നെല്ലറ വർഷങ്ങളായി മാർക്കറ്റിൽ സജീവമായ ഒരു ബ്രാൻഡ്​ എന്ന നിലയിൽ​ വലിയ സാധ്യതകളാണുള്ളത്​. ആർ.ടി.സി മേഖലയിലേക്ക്​ കൂടി പ്രവേശിച്ചതോടെ സാധ്യതകൾ വർധിച്ചിട്ടുണ്ട്​. മറ്റുള്ള രാജ്യങ്ങളിലേക്ക്​ കൂടി ഉൽപാദന യൂനിറ്റുകൾ വികസിപ്പിക്കുക എന്നതാണ്​ ഇപ്പോൾ മുന്നിലുള്ളത്​. ഇതിന്‍റെ ഭാഗമായി ഖത്തറിൽ ഒരു യൂനിറ്റിന്‍റെ പ്രവർത്തനം ആരംഭിക്കാനിരിക്കുകയാണ്​. മറ്റു ഗൾഫ്​ രാജ്യങ്ങളിലേക്കും വ്യാപിപ്പിക്കാൻ ഉദ്ദേശിക്കുന്നുണ്ട്​​. നിലവിൽ യു.എ.ഇയിൽ മാത്രമാണ്​ പ്രെഡക്ഷനുള്ളത്​. സ്​പൈസസ്​ ആൻഡ്​ ബ്രേക്​ഫാസ്റ്റ്​ കാറ്റഗറി ജി.സി.സിയിൽ എല്ലായിടത്തും വിതരണം ഉണ്ട്​. ആർ.ടി.സി വിഭവങ്ങളുടെ ഷെൽഫ്​ ലൈഫ്​ പരിമിതമായതിനാൽ ഒരോ രാജ്യത്തും ഉൽപാദക യൂനിറ്റുകൾ ആവശ്യമാണ്​.

ഗൾഫ്​ നാടുകളിൽ വെച്ച് നെല്ലറയെ അനുഭവിച്ചവർ കേരളത്തിൽ എല്ലായിടത്തും ഇത്​ ലഭ്യമാക്കണമെന്ന്​ ആവശ്യപ്പെടുന്നുണ്ട്​. അത്​ പരിഗണിച്ച്​ കേരളത്തിലെ എല്ലാ ജില്ലകളിലും ഇന്ത്യയിലെ എല്ലാ പ്രധാന പട്ടണങ്ങളിലും നെല്ലറ ഉൽപന്നങ്ങളും എത്തിക്കാനുള്ള പദ്ധതിയും രൂപപ്പെടുത്തുന്നുണ്ട്​. ഇന്ത്യയിൽ നിലവിൽ തന്നെ ഉൽപാദക യൂനിറ്റുകളുണ്ട്​. ആർ.ടി.സി ഉൽപാദനം ഇന്ത്യയിൽ കൂടി വ്യാപിക്കാനാണ്​ ഉദ്ദേശിക്കുന്നത്​. യൂറോപ്പിലും കാനഡ, യു.എസ്​ രാജ്യങ്ങളിലും ഉൽപന്നങ്ങൾ വിതരണം ചെയ്യുന്നുണ്ട്​.

ടെക്​നോളജി അപ്​ഡേറ്റ്​സിന്‍റെ കാര്യത്തിൽ എല്ലാ കാലത്തും വളരെ വേഗത്തിലാണ്​ കമ്പനി മുന്നോട്ടുപോയിട്ടുള്ളത്​. നിലവിൽ സോഫ്​റ്റ്​വെയർ രംഗത്ത്​ അടക്കം എ.ഐ എങ്ങനെ ഉപയോഗപ്പെടുത്താം എന്നത്​ സംബന്ധിച്ച്​ ആലോചിക്കുന്നുണ്ട്​. വെയർഹൗസ്​ മാനേജ്​മെന്‍റ്​ അടക്കമുള്ള കാര്യങ്ങൾ സോഫ്​റ്റ്​വെയർ ഉപയോഗപ്പെടുത്തി ഏറ്റവും നല്ല രീതിയിൽ സജ്ജീകരിച്ചിട്ടുണ്ട്​​. ആളുകളുടെ ഭക്ഷണ ശീലങ്ങളിൽ മാറ്റമുണ്ടാകുന്നുണ്ട്​. നേരത്തെ കഴിക്കുന്ന ഭക്ഷണത്തിലെ വൈറ്റമിൻസും പ്രോട്ടീനുമൊന്നും മിക്കവരും ശ്രദ്ധിച്ചിരുന്നില്ല. ഇന്ന്​ അതുണ്ട്​. അതോടൊപ്പം നേരത്തെ പൗഡറുകർ ഉപയോഗിച്ചിരുന്നത്​, ഇന്ന്​ ആർ.ടി.സിയിലേക്ക്​ മാറിയിട്ടുണ്ട്​. ഇതെല്ലാം ഭക്ഷണ ശീലത്തിലെ മാറ്റങ്ങളാണ്​. പരമ്പരാഗത ഭക്ഷണ മേഖലക്കപ്പുറവും ചില മുന്നേറ്റങ്ങൾക്ക്​ ആർ.എഫ്​ കമ്പെയ്​ൻ ആലോചിക്കുന്നുണ്ട്​. കേരളത്തിലെ കാർഷിക ഉൽപന്നങ്ങൾ ഉപയോഗിച്ചുള്ള പ്രെഡക്ടുകൾ ആലോചിക്കുന്നുണ്ട്​. കേരളത്തിലെ കർഷകരെ സഹായിക്കുന്നതിന്​ മിക്ക പ്രൊഡക്ടുകളും അവിടെ നിന്ന്​ തന്നെയാണ്​ പർചേഴ്​സ്​ ചെയ്യുന്നത്​. വയനാടൻ കോഫി അതിലൊന്നാണ്​. അത്​ കമ്പനി മാത്രമാണ്​ മറ്റിടങ്ങളിൽ ലഭ്യമാക്കുന്നത്​. നെല്ലറയുടെ ചുക്കുകാപ്പി അതുപോലെ വളരെ അറിയപ്പെട്ടതാണ്​. ​ദുബൈയിൽ നിന്ന്​ നാട്ടിലേക്ക്​ പോയ കമ്പനിയാണിത്​. നാടിന്​ ഗുണകരമാകുന്നത്​ ചെയ്യാൻ കമ്പനി എപ്പോഴും മുന്നിലുണ്ടാകും.