മലയാളി തീർഥാടകർക്ക്​ മദീനയിൽ ഊഷ്മള സ്വീകരണം

മക്ക: ഹജ്ജിന്​ ശേഷം മദീന സന്ദർശനത്തിനായി (സിയാറത്ത്​) പുറപ്പെട്ട മലയാളി തീർഥാടകരിലെ ആദ്യ സംഘത്തിന്​ പ്രവാചക നഗരിയിൽ ഊഷ്​മള വരവേൽപ്​. തിങ്കളാഴ്ച രാത്രിയോടെയാണ് തീർഥാടകർ മദീനയിൽ എത്തിയത്.

വിതൗട്ട് മഹ്റം (ആൺ തുണയില്ലാത്ത) വിഭാഗത്തിലുള്ള തീർഥാടകരടക്കം 900 തീർഥാടകരാണ് ആദ്യദിനം എത്തിയത്. മലയാളി സന്നദ്ധ പ്രവർത്തകർ ഉൾപ്പെടെയുള്ളവരാണ്​ സ്വീകരണം ഒരുക്കിയത്​. കുട്ടികളും കുടുംബങ്ങളുമടക്കമുള്ളവർ എത്തി തീർഥാടകരെ ഹൃദ്യമായി വരവേറ്റു.

ഹജ്ജ് സർവീസ് കമ്പനി ഒരുക്കിയ ബസുകളിൽ തിങ്കളാഴ്ച ഉച്ചയോടെയാണ്​ തീർഥാടകർ മക്കയിൽനിന്ന്​ പുറപ്പെട്ടത്. രാത്രി 10ഓടെ ഇവർ മദീനയിൽ എത്തി. യാത്രയാക്കാൻ മക്കയിൽ വിവിധ സന്നദ്ധപ്രവർത്തകർ എത്തിയിരുന്നു. മദീനയിൽ ഹാജിമാർക്ക് വിപുലമായ സൗകര്യങ്ങളാണ്​ ഇന്ത്യൻ ഹജ്ജ് മിഷൻ ഒരുക്കിയത്.

പ്രവാചക പള്ളിക്കടുത്ത മർക്കസിയ ഭാഗത്താണ് ഇവരുടെ താമസം. അതുകൊണ്ട്​ തന്നെ പ്രാർഥനക്കായി എളുപ്പത്തിൽ പള്ളിയിലെത്താനകും. വിപുലമായ താമസ സൗകര്യമാണുള്ളത്​. ഒപ്പം രണ്ട് ബ്രാഞ്ചുകളിലായി രണ്ട് ഡിസ്പെൻസറികളും 20 കിടക്കകളുള്ള ആശുപത്രിയും സജ്ജീകരിച്ചിട്ടുണ്ട്.

മദീന സന്ദർശനം എട്ടു ദിവസം കൊണ്ടാണ്​ പൂർത്തിയാക്കുക. തീർഥാടകർ പ്രവാചക പള്ളിയിൽ പ്രാർഥനയിൽ പങ്കെടുക്കും. പ്രവാചക​ന്റെ ഖബറിടവും റൗദയും സന്ദർശിക്കും. കൂടാതെ മദീനയിലെ വിവിധ ഭാഗങ്ങളിലുള്ള ചരിത്രപ്രധാന സ്ഥലങ്ങളും പള്ളികളും സന്ദർശിക്കും. ഇവിടങ്ങളിലേക്ക്​ സ്വന്തമായോ ഗ്രൂപ്പുകളായോ ആണ്​ തീർഥാടകർ പോവുക. മദീന സന്ദർശനവും പൂർത്തിയായിക്കഴിഞ്ഞാൽ തീർഥാടകരുടെ സ്വദേശത്തേക്കുള്ള മടക്കയാത്രക്ക്​ തുടക്കമാവും. ഈ മാസം 25 മുതലാണ് യാത്ര ആരംഭിക്കുക. വരും ദിവസങ്ങളിൽ കൂടുതൽ ഹാജിമാർ മദീനയിലേക്കെത്തും.

നിലവിൽ മദീനയിൽ 40 ഡിഗ്രി സെൽഷ്യസിന്​ മുകളിലാണ് ചൂട്. ആവശ്യമായ പ്രതിരോധന മാർഗങ്ങളും പാലിക്കേണ്ട കർശന നിർദേശങ്ങളും ഹജ്ജ് മിഷനും ആരോഗ്യമന്ത്രാലയവും ഹാജിമാർക്ക് നൽകുന്നുണ്ട്. കേരളത്തിലുള്ളവരെ കൂടാതെ ഇന്ത്യൻ ഹജ്ജ്​ മിഷന്​ കീഴിൽ വിവിധ സംസ്ഥാനങ്ങളിൽ നിന്നുള്ള ഹാജിമാരുടെ മദീന സന്ദർശനം ഇക്കഴിഞ്ഞ വ്യാഴാഴ്​ച മുതലാണ്​ ആരംഭിച്ചത്. ഇതുവരെ മലയാളികളടക്കം 3,500ലധികം തീർഥാടകർ മദീനയിൽ എത്തിയിട്ടുണ്ട്.

അതേസമയം മദീന വഴി എത്തിയ ഹാജിമാർ ഹജ്ജിന്​ മുമ്പ്​ തന്നെ സിയാറത്ത്​ പൂർത്തിയാക്കിയതിനാൽ ഹജ്ജ്​ കർമങ്ങൾ കഴിഞ്ഞതോടെ ജിദ്ദ വഴി നാട്ടിലേക്ക്​ മടങ്ങിത്തുടങ്ങിയിരുന്നു. പല സംഘങ്ങളായി ഇപ്പോഴും മടക്കയാത്ര തുടരുകയാണ്. 12,300 പേരാണ് ഇതുവരെ നാട്ടിലേക്ക് മടങ്ങിയത്. 40 ഹാജിമാർ വിവിധ കാരണങ്ങളാൽ മക്കയിലും മദീനയിലുമായി മരിച്ചിരുന്നു.