തൃശൂർ പൂരത്തിന്​ ഇന്ന്​ കൊടിയേറും; മേയ് ആറിന് വർണാഭമായ കുടമാറ്റം

തൃശൂർ: തൃശൂർ പൂരത്തിന്​ ബുധനാഴ്ച കൊടിയേറും. പൂരത്തിലെ പ്രധാന പങ്കാളികളായ പാറമേക്കാവ്​, തിരുവമ്പാടി ക്ഷേത്രങ്ങളിലും എട്ട്​ ഘടക ക്ഷേത്രങ്ങളിലും രാവിലെ മുതൽ രാത്രി വരെ വിവിധ സമയങ്ങളിലാണ്​ ആചാര പ്രകാരം കൊടിയേറ്റം നടക്കുക.

കൊടിയേറ്റം മുതലുള്ള ദിവസങ്ങളിൽ പങ്കാളി ക്ഷേത്രങ്ങളിൽ പൂരവുമായി ബന്ധപ്പെട്ട ചടങ്ങുകൾ നടക്കും. ലാലൂർ, നെയ്തലക്കാവ്​, അയ്യന്തോൾ, ചൂരക്കാട്ടുകര, ​ചെമ്പുക്കാവ്​, പൂക്കാട്ടിക്കര കാരമുക്ക്​, കണിമംഗലം, പനമുക്കുംപിള്ളി എന്നിവയാണ്​ ഘടക ക്ഷേത്രങ്ങൾ.

ലാലൂർ കാർത്യായനി ക്ഷേത്രത്തിലാണ്​ ആദ്യം കൊടിയേറ്റം​. മേയ്​ അഞ്ചിന്​ ഉച്ചക്ക് മുമ്പ്​ നെയ്തലക്കാവ്​ ഭഗവതിയുടെ തിടമ്പുമായി വരുന്ന ആന വടക്കുംനാഥ ക്ഷേത്രത്തിന്‍റെ തെക്കേ ഗോപുരവാതിൽ തുറന്നിടുന്നതോടെ പൂരത്തിന്‍റെ ചടങ്ങുകൾ ആരംഭിക്കും.

പൂരം നാളായ ആറിന്​ രാവിലെ നേര​ത്തേ കണിമംഗലം ശാസ്താവാണ്​ വടക്കുംനാഥനെ വണങ്ങാൻ ആദ്യം എത്തുക. ഏഴിന്​ ഉച്ചയോടെ വടക്കുംനാഥന്‍റെ ശ്രീമൂല സ്ഥാനത്ത്​ പാറമേക്കാവ്​, തിരുവമ്പാടി ഭഗവതിമാർ ഉപചാരം ചൊല്ലുന്നതോടെയാണ്​ പൂരം അവസാനിക്കുന്നത്​.

തിരുവമ്പാടി, പാറമേക്കാവ്​ ദേവസ്വങ്ങളും ഘടക ക്ഷേത്രങ്ങളിലും പൂരത്തിനുള്ള ഒരുക്കങ്ങൾ പുരോഗമിക്കുകയാണ്​. സർക്കാർ സംവിധാനങ്ങളും ജില്ല ഭരണകൂടവും സന്നാഹം ഒരുക്കുന്ന തിരക്കിലാണ്​. ഇത്തവണ സുരക്ഷ ക്രമീകരണം പതിവിലധികം ശക്തമാക്കിയിട്ടുണ്ട്​.

ഡി.ജി.പി നേരിട്ടാണ്​ ഇത്​ വിലയിരുത്തുന്നത്​. കഴിഞ്ഞ വർഷത്തെ പൂരത്തിനിടെ ഉണ്ടായ അനിഷ്ട സംഭവങ്ങളു​ടെ പശ്ചാത്തലത്തിൽ കുറവുകളില്ലാതെ പൂരം പൂർത്തിയാക്കാൻ എല്ലാ വിഭാഗങ്ങളും കടുത്ത പരിശ്രമത്തിലാണ്​.