തബല താളവും തയ്യൽ താളവും ഇവിടെ ഒരുപോലെ...

കോട്ടയം: ആറാം വയസ്സിൽ തബലയിൽ കൈപതിപ്പിച്ച്​, 18-ാം വയസ്സിൽ ​തബലവാദ്യത്തിൽ ഗുരുവായി, 63 വയസ്സ്​ പിന്നിടുമ്പോൾ ഒരുപിടി നേട്ടങ്ങളാൽ കലാരംഗത്ത്​ സജീവമാണ്​ ബാബു സെബാസ്റ്റ്യൻ. കാണക്കാരിക്കാർക്ക്​ കാഞ്ഞിരത്തടത്തിൽ ബാബു സെബാസ്റ്റ്യൻ ‘ടെക്​ ബാബു’ആണ്​. കാണക്കാരി സ്കൂളിന്​ സമീപം ബ്രില്ല്യന്‍റ്​ തയ്യൽകട നടത്തുകയാണ്​ ബാബു. 52 വർഷമായി ടെക്​ ബാബു തബലവാദ്യത്തിൽ സ്ഥിരംമുഖമാണ്​. ഉപജീവനത്തേക്കാൾ പ്രധാന്യം വർഷങ്ങളായി തുടർന്നുവരുന്ന തബലവായനക്കാണ്​.

പിതാവ്​ കെ.പി. ദേവസ്യയാണ്​ ആദ്യ ഗുരുനാഥൻ. ഉപജീവനമാർഗമായ മേസ്​തിരി തൊഴിലിനിടയിലും കലാമേഖലയിൽ സമയംകണ്ടെത്തിയ പിതാവിനെ മാതൃകയാക്കിയാണ്​ ഒന്നാംക്ലാസ്​ മുതൽ ബാബു തബലയിൽ താളംപിടിച്ചത്​. തുടർന്ന്​ വിവാഹ സൽകാര വേദികളിലും പള്ളി ക്വയർ സംഘത്തിലും നാടകം, ഗാനമേള, സിനിമാ പിന്നണി ഗാനത്തിനും​ അകമ്പടിയായി ബാബുവിന്‍റെ തബല തുടിച്ചു. പ്രശസ്ത കാഥികൻ വി.ഡി. രാജപ്പന്‍റെ തബലിസ്റ്റ്​ ആയിരുന്ന കോട്ടയം നടേശൻ, സോളമൻ കോട്ടയം, ഈനേടം തമ്പി, സന്തോഷ്​ പാലാ എന്നിവരുടെ കീഴിൽ തബലവാദ്യത്തിൽ ശിക്ഷണം നേടി.

1965-71 കാലഘട്ടത്തിൽ പട്ടിത്താനം യു.പി.സ്കൂളിലെ വിദ്യാർഥിയായിരുന്ന ബാബു, പൂർവവിദ്യാർഥി സംഗമവേളയിൽ സ്കൂളിനും അധ്യാപകർക്കും സഹപാഠികൾക്കുമായി ‘ഓർമയിലെ ഉപ്പുമാവ്​’ എന്ന മിനി ആൽബം സമർപ്പിച്ചിരുന്നു. പട്ടിത്താനം പള്ളിവികാരിയായിരുന്ന ജോബ്​ കുഴിവേലിയാണ്​ ബാബുവിന്​ ‘ടെക്​ ബാബു’എന്ന ചെല്ലപ്പേര്​ ചാർത്തിക്കൊടുത്തത്​. അത്​ പിന്നീട്​ നാട്ടുകാരും വിളിച്ചതോടെ ബാബു സെബാസ്റ്റ്യൻ കാണക്കാരിക്കാർക്ക്​ ‘ടെക്​ ബാബു’ആയി. സുഹൃത്തിന്‍റെ നിർദ്ദേശപ്രകാരമാണ്​ തബലയെ കൂടാതെ തയ്യൽ മെഷീനെ ഉപജീവനമാർഗമാക്കി ഒപ്പംകൂട്ടിയത്​.

പത്താം വയസ്സിൽ സ്വന്തമായൊരു തബല വേണമെന്ന ആഗ്രഹമുണ്ടായി​. 67 കാലഘട്ടത്തിൽ ഒരു സെറ്റ്​ തബലക്ക്​ 500 രൂപയായിരുന്നു. ഇതിനായി ബാബു പരിപാടികളിൽനിന്നും കിട്ടുന്ന സമ്പാദ്യം സ്വരൂപിച്ചു. എന്നാൽ, സ്വരുക്കൂട്ടിയ സമ്പാദ്യം ഒരു പരിപാടിക്കിടെ മോഷണം പോയി. മനസ്സ്​ തകർന്ന ബാബുവിന്​ ദൈവനിയോഗം പോലെ പുതിയൊരു തബല സെറ്റ്​ വാങ്ങാനുള്ള പണം ഒരു മാലാഖയിൽനിന്നും ലഭിച്ചു. ഇപ്പോൾ ബാബുവിന്​ മൂന്ന്​​ സെറ്റ്​ തബലയും നാല്​ ശ്രുതി തബലയും സ്വന്തമായിട്ടുണ്ട്​.

കഴിഞ്ഞ ഓണത്തിനും ക്രിസ്മസിനും യൂട്യൂബിൽ വീഡിയോ ആൽബം പുറത്തിറക്കിയിരുന്നു. എട്ട്​ മാസങ്ങൾക്ക്​ മുമ്പുണ്ടായ സ്​ട്രോക്കാണ്​ കലാജീവിതത്തിന്​ വില്ലനായത്​. അതോടെ വേദികളിൽ നിന്നും വിരമിച്ച്​ ബാബു തയ്യൽജോലി ഉപജീവനമാക്കി.

താൻ ഈവർഷം ചെയ്യുന്ന ആൽബങ്ങളിലൊന്ന് ഗായിക സിത്താര കൃഷ്ണകുമാറിനെ കൊണ്ട്​ പാടിക്കണമെന്നാണ്​ ബാബുവിന്‍റെ ആഗ്രഹം. തബലയിലെ മൂന്നിടങ്ങളി​ലെ 11 സ്വരസ്ഥാനങ്ങൾ ബാബുവിന്‍റെ 52 വർഷത്തെ കലാജീവിതത്തിനൊപ്പമുണ്ട്​, ഒപ്പം ഒരുപിടി ശിഷ്യഗണങ്ങളും.