അലങ്കാരപ്രാവുകളെ മോഷ്ടിച്ച വിമുക്തഭടന്‍ അറസ്റ്റില്‍

മട്ടാഞ്ചേരി: അലങ്കാരപ്രാവുകളെ മോഷ്ടിച്ച വിമുക്തഭടന്‍ അറസ്റ്റിലായി. പുതുവൈപ്പ് സ്വദേശിയുടെ 50,000 രൂപ വിലവരുന്ന ആറ് അലങ്കാരപ്രാവുകളെ മോഷ്ടിച്ച വേങ്ങൂര്‍, ഗോള്‍ഡന്‍ ലീപ് വീട്ടില്‍ ലോറന്‍സാണ് (40) ഹാര്‍ബര്‍ പൊലീസിന്‍െറ പിടിയിലായത്. നാവികസേന ഉദ്യോഗസ്ഥന് വേണമെന്നുപറഞ്ഞ് പുതുവൈപ്പ് സ്വദേശിയുടെ കൊമേറിയന്‍ പൗട്ടര്‍, കിങ് എന്നീ ഇനങ്ങളില്‍പ്പെട്ട ആറ് പ്രാവുകളെ നേവല്‍ ബേസിന് സമീപത്തെ കഠാരിബാഗിലേക്ക് വരുത്തിക്കുകയായിരുന്നു. തുടര്‍ന്ന് പ്രാവിന്‍െറ ഉടമയോട് നേവല്‍ ബേസില്‍ പ്രവേശിക്കുന്നതിന് ഗേറ്റ് പാസ് എടുക്കണമെന്നുപറഞ്ഞ് സമീപത്തുനിന്ന് മാറ്റിയശേഷം പ്രാവുകളുമായി പ്രതി കടന്നുകളയുകയായിരുന്നു. പ്രാവുകളെ പിന്നീട് പ്രതിയുടെ വേങ്ങൂരുള്ള വസതിയില്‍നിന്ന് പൊലീസ് കണ്ടെടുത്തു.