ഫോര്‍ട്ട്കൊച്ചി ഡയാലിസിസ് സെന്‍റര്‍ പ്രവര്‍ത്തനം ഇന്ന് തുടങ്ങും

മട്ടാഞ്ചേരി: വിവാദങ്ങള്‍ക്കൊടുവില്‍ ഫോര്‍ട്ട്കൊച്ചി ഡയാലിസിസ് സെന്‍ററിന്‍െറ പ്രവര്‍ത്തനം തിങ്കളാഴ്ച ആരംഭിക്കും. രാവിലെ ഒമ്പതിന് ആദ്യ ഡയാലിസിസ് നടക്കുമെന്ന് ആശുപത്രി അധികൃതര്‍ വ്യക്തമാക്കി. ഒരു വര്‍ഷം മുമ്പ് അന്നത്തെ ആരോഗ്യ മന്ത്രി ഉദ്ഘാടനം ചെയ്ത ഡയാലിസിസ് സെന്‍റര്‍ രണ്ടാഴ്ച മുമ്പ് വീണ്ടും ഉദ്ഘാടനം ചെയ്തെങ്കിലും പ്രവര്‍ത്തനം ആരംഭിക്കാത്തത് ഏറെ പ്രതിഷേധത്തിനിടയാക്കിയിരുന്നു. കഴിഞ്ഞ 26ന് രോഗികളെ ബുക്ക് ചെയ്തതാണെങ്കിലും ഡയാലിസിസ് നടന്നില്ല. വാട്ടര്‍ അതോറിറ്റി വിതരണം ചെയ്യുന്ന ശുദ്ധ ജലത്തില്‍ ആല്‍ക്കലൈന്‍ അംശം കൂടുതലുണ്ടെന്നതാണ് പ്രവര്‍ത്തനം ആരംഭിക്കുന്നതിന് തടസ്സമായി പറഞ്ഞിരുന്നത്. ഒരേ സമയം ഏഴുപേര്‍ക്ക് കുറഞ്ഞ നിരക്കില്‍ ഡയാലിസിസ് ചെയ്യാനുള്ള സൗകര്യമാണ് ഇവിടെയുള്ളത്. ഇതിനായി സൊസൈറ്റി രൂപവത്കരിക്കാനും തീരുമാനമുണ്ട്.