നാട്ടാനകളുടെ വിവരങ്ങള്‍ രജിസ്റ്റര്‍ ചെയ്യാത്ത ഉടമസ്ഥര്‍ക്കെതിരെ നടപടി –എ.ഡി.എം

കോട്ടയം: നാട്ടാനകളുടെ വിവരങ്ങള്‍ രജിസ്റ്റര്‍ ചെയ്യാത്ത ഉടമസ്ഥര്‍ക്കെതിരെ നടപടി സ്വീകരിക്കുമെന്ന് എ.ഡി.എം മോന്‍സി പി. അലക്സാണ്ടര്‍ അറിയിച്ചു. നാട്ടാനകളെ പങ്കെടുപ്പിക്കുമ്പോള്‍ ഉത്സവ-ആഘോഷ കമ്മിറ്റികളും രജിസ്റ്റര്‍ ചെയ്യണം. ഇനിയും രജിസ്റ്റര്‍ ചെയ്തിട്ടില്ലാത്ത നാട്ടാനകളും ഉത്സവ-ആഘോഷ കമ്മിറ്റികളും സെപ്റ്റംബര്‍ 28നകം രജിസ്റ്റര്‍ ചെയ്യണമെന്നും നാട്ടാന പരിപാലന ചട്ടം സംബന്ധിച്ച് കലക്ടറുടെ ചേംബറില്‍ നടന്ന ജില്ലാ കമ്മിറ്റി യോഗത്തില്‍ അദ്ദേഹം അറിയിച്ചു. അസി. സോഷ്യല്‍ ഫോറസ്ട്രി ഡിവിഷന്‍ ഓഫിസര്‍ വി.ജി. അനില്‍കുമാര്‍, ജില്ലാ പൊലീസ് ഓഫിസര്‍ പ്രതിനിധി കെ.ആര്‍. ശ്രീവല്ലഭന്‍, കേരള എലിഫന്‍റ് ഓണേഴ്സ് അസോസിയേഷന്‍ സെക്രട്ടറി പി.എസ്. രവീന്ദ്രനാഥ്, തിരുവിതാംകൂര്‍ ദേവസ്വം ബോര്‍ഡ് അഡ്മിനിസ്ട്രേറ്റിവ് ഓഫിസര്‍ ഡോ. ശശീന്ദ്രദേവ്, കേരള ഉത്സവാഘോഷ കമ്മിറ്റി പ്രതിനിധി അഡ്വ. രാജേഷ് പല്ലാട്ട് എന്നിവര്‍ യോഗത്തില്‍ പങ്കെടുത്തു.