പന്തളം കെ.എസ്​.ആർ.ടി.സി ബസ്​സ്​റ്റാൻഡിൽ സന്ധ്യകഴിഞ്ഞാൽ സാമൂഹികവിരുദ്ധശല്യം

പന്തളം: പന്തളം കെ.എസ്​.ആർ.ടി.സി ബസ്​സ്​റ്റാൻഡ് സന്ധ്യകഴിഞ്ഞാൽ സാമൂഹികവിരുദ്ധരുടെ താവളമാകുന്നു. സ്​ത്രീകൾക്കുനേരെയും അതിക്രമങ്ങൾ നടക്കുന്നു. പൊലീസിെൻറയോ കെ.എസ്​.ആർ.ടി.സി അധികൃതരുടെയോ ശ്രദ്ധയില്ലെന്ന പരാതി വ്യാപകമാണ്. സ്​ത്രീകൾക്കും കുട്ടികൾക്കും സ്വൈര്യമായി സ്​റ്റാൻഡിൽ ബസ്​ കാത്തുനിൽക്കാൻ കഴിയുന്നില്ലെന്നതാണ് പരാതി. സന്ധ്യയായാൽ ബസ്​സ്​റ്റാൻഡ് പരിസരം വിജനമാണ്. തൊട്ടടുത്ത ബിവറേജ് ഷോപ്പിൽനിന്ന് മദ്യംവാങ്ങി സ്​റ്റാൻഡിലെ വിജനമായ പ്രദേശങ്ങളിലിരുന്ന് സംഘം ചേർന്ന് മദ്യപിക്കുകയാണ് പതിവ്. മദ്യലഹരിയിലാകുന്ന ഇക്കൂട്ടർ സ്​റ്റാൻഡിൽ ബസ്​ കാത്തുനിൽക്കുന്ന സ്​ത്രീകൾക്കുനേരെയും തിരിയുന്നു. കഴിഞ്ഞദിവസം രാത്രി ഏഴിന് ജോലികഴിഞ്ഞ് വീട്ടിൽപോകാനായി ബസ്​സ്​റ്റാൻഡിൽ എത്തിയ യുവതിക്ക് ഇത്തരത്തിൽ ദുരനുഭവം ഉണ്ടായി. ബസ്​ കാത്ത് 20 മിനിറ്റോളം അവിടെ നിൽക്കേണ്ടിവന്ന അവർക്ക് സാമൂഹികവിരുദ്ധരുടെ അസഹ്യമായ നോട്ടവും കമൻറടിയും ഏറെ സഹിക്കേണ്ടിവന്നു. മിക്ക ദിവസങ്ങളിലും ഇതുതന്നെയാണ് അവസ്​ഥ. സർവിസ്​ കഴിഞ്ഞ് സ്​റ്റാൻഡിൽ കിടക്കുന്ന ബസുകളും മദ്യപന്മാരുടെ താവളമാണ്. ശ്രദ്ധയിൽപ്പെട്ടാലും കെ.എസ്​.ആർ.ടി.സിയിലെ രാത്രികാല ഡ്യൂട്ടിക്കാർ കണ്ണടക്കുന്നതായി പരാതിയുണ്ട്. സന്ധ്യകഴിഞ്ഞാൽ കെ.എസ്​.ആർ.ടി.സി പരിസരത്ത് ആവശ്യത്തിന് വെളിച്ചമില്ലാത്തതും ഇക്കൂട്ടർക്ക് അനുഗ്രഹമാണ്. കാടുമൂടിക്കിടക്കുന്ന കെ.എസ്​.ആർ.ടി.സി പരിസരത്തേക്ക് പൊലീസും എക്സൈസും ശ്രദ്ധിക്കാറില്ല. സന്ധ്യകഴിഞ്ഞാൽ ദീർഘദൂര സർവിസുകൾ പലതും സ്​റ്റാൻഡിൽ എത്താറില്ല. ഇതറിയാതെ പലപ്പോഴും സ്​റ്റാൻഡിൽ കാത്തുനിൽക്കുന്നവരാണ് അതിക്രമത്തിന് ഇരയാകുന്നവരേറെയും. പലരും ഇവരെ ഭയന്ന് പരാതിപോലും പറയാൻ തയാറാകുന്നില്ല. തീർഥാടനകാലമായതോടെ സന്ധ്യകഴിഞ്ഞ് എത്തുന്ന അയ്യപ്പന്മാരും സാമൂഹികവിരുദ്ധരുടെ വിളയാട്ടത്തിന് ഇരയാകാറുണ്ട്. പരസ്യമായി അസഭ്യവാക്കുകൾ പരസ്​പരം ഉപയോഗിക്കുന്നതും പതിവാണെന്ന് നാട്ടുകാർ പറയുന്നു. പൊലീസിെൻറ അടിയന്തര ശ്രദ്ധ കെ.എസ്​.ആർ.ടി.സി പരിസരത്ത് ഉണ്ടാകണമെന്നാണ് നാട്ടുകാരുടെ ആവശ്യം.