ഉഡ്താ പഞ്ചാബ് പ്രദർശിപ്പിക്കാം -സുപ്രീംകോടതി

ന്യൂഡൽഹി: ബോളിവുഡ് ചിത്രം 'ഉഡ്താ പഞ്ചാബ് റിലീസ് ചെയ്യുന്നതിനെതിരെ സമർപ്പിച്ച ഹരജി സുപ്രീംകോടതി തള്ളി. നാളെ റിലീസ് ചെയ്യാനിരിക്കുന്ന സിനിമയുടെ പ്രദർശനാനുമതി സ്റ്റേ ചെയ്യാൻ വിസമ്മതിച്ച സുപ്രീംകോടതി ഈ ആവശ്യവുമായി പഞ്ചാബ്, ഹരിയാന ഹൈകോടതികളെ സമീപിക്കാൻ ഹരജിക്കാരോട് ആവശ്യപ്പെട്ടു. സിനിമയിലെ ഒരു പരാമർശം മാത്രം ഒഴിവാക്കി പ്രദർശിപ്പിക്കാമെന്ന ബോംബെ​​​ ഹൈകോടതി വിധിക്കെതിരെ ഹ്യൂമൻ റൈറ്റ്സ് അവെയ്ർനെസ് എന്ന സന്നദ്ധസംഘടയാണ് സുപ്രീംകോടതിയെ സമീപിച്ചത്.

ഹൈകോടതി വിധിയുടെ വിശദാംശങ്ങളിലേക്ക് കടക്കാൻ ഉദ്ദേശിക്കുന്നില്ലെന്ന് കേസ് പരിഗ‍ണിക്കുന്ന സുപ്രീംകോടതിയുടെ അവധിക്കാല ബെഞ്ചിലെ ജ‍സ്റ്റിസുമാരായ ആദർശ് കുമാർ, എൽ.ഗംഗേശ്വര റാവു എന്നിവർ വ്യക്തമക്കി. 

പഞ്ചാബിലെ മയക്കുമരുന്നിന്‍റെ  അമിതോപയോഗവും രാഷ്ട്രീയ സാഹചര്യങ്ങളുമാണ് ചിത്രത്തിന്‍റെ  ഇതിവൃത്തം. ചിത്രത്തിലെ 94 ഭാഗങ്ങള്‍ ഒഴിവാക്കാനും ചിത്രത്തിന്‍റെ പേരില്‍ നിന്ന് പഞ്ചാബ് മാറ്റണമെന്നും സെന്‍സര്‍ ബോര്‍ഡ് നിര്‍ദേശിച്ചതിനെതിരെ നിര്‍മാതാക്കളായ വികാസ് ബഹ്ലും അനുരാഗ് കശ്യപും കോടതിയെ സമീപിച്ചിരുന്നു. ബോംബെ കോടതിയാണ് ചിത്രത്തിന് പ്രദർശനാനുമതി നൽകിയത്.