ഇന്ന് രാഷ്ട്രീയം വേണ്ട; മറുപടി നാളെ -മോദിയുടെ പ്രസംഗത്തെക്കുറിച്ച് രാഹുല്‍

ന്യൂഡല്‍ഹി:  പ്രധാനമന്ത്രി നരേന്ദ്രമോദിയുടെ സ്വാതന്ത്ര്യദിന പ്രസംഗത്തെക്കുറിച്ച് പ്രതികരിക്കാതെ കോണ്‍ഗ്രസ് അധ്യക്ഷ സോണിയ ഗാന്ധിയും ഉപാധ്യക്ഷന്‍ രാഹുല്‍ ഗാന്ധിയും ഒഴിഞ്ഞുമാറി. പ്രധാനമന്ത്രിയുടെ പ്രസംഗത്തെക്കുറിച്ച് മാധ്യമപ്രവര്‍ത്തകര്‍ പ്രതികരണം തേടിയപ്പോള്‍  ഇന്ന് രാഷ്ട്രീയം പറയാനുള്ള ദിവസമല്ളെന്നും നാളെ സംസാരിക്കാമെന്നുമായിരുന്നു രാഹുല്‍ ഗാന്ധിയുടെ മറുപടി.
എ.ഐ.സി.സി ആസ്ഥാനത്ത് പതാക ഉയര്‍ത്തിയ ശേഷം സോണിയ ഗാന്ധി മാധ്യമപ്രവര്‍ത്തകര്‍ക്ക് ആശംസ അറിയിച്ചെങ്കിലും  പ്രധാനമന്ത്രിയുടെ പ്രസംഗത്തെക്കുറിച്ച്  പ്രതികരിച്ചില്ല.
 അഴിമതിയെക്കുറിച്ച് രാജ്യത്ത് ഇപ്പോള്‍  ഒരുപാട് ചര്‍ച്ചകള്‍ നടക്കുന്നു. ആരോഗ്യവാനായി ഇരിക്കുന്നതിനെക്കുറിച്ച്
രോഗിയായ ഒരാള്‍ നിര്‍ദേശങ്ങള്‍ നല്‍കുന്നത് പോലെയാണ് അഴിമതിക്കാരായവര്‍ ഇപ്പോള്‍ അഴിമതിക്കെതിരെ പറയുന്നതെന്ന് തന്‍െറ പ്രസംഗത്തില്‍ കോണ്‍ഗ്രസിനെ ഉദ്ദേശിച്ച് മോദി പറഞ്ഞിരുന്നു. അഴിമതിക്കേസുകളില്‍ ഉള്‍പ്പെട്ട കേന്ദ്രമന്ത്രിമാരുടെയും  ബി.ജെ.പി മുഖ്യമന്ത്രിമാരുടെയും രാജി ആവശ്യപ്പെട്ട് പാര്‍ലമെന്‍റ് മഴക്കാല സമ്മേളനത്തില്‍ കോണ്‍ഗ്രസും രാഹുല്‍ ഗാന്ധിയും ശക്തമായി രംഗത്തുവന്നിരുന്നു.