ബി.ജെ.പി സാമൂഹിക അന്തരീക്ഷം തകര്‍ക്കുന്നു -സോണിയ

ബക്സര്‍: പശുയിറച്ചിയുടെ പേരില്‍ രാജ്യത്ത് കൊലപാതകങ്ങള്‍ നടന്ന പശ്ചാത്തലത്തില്‍ പ്രധാനമന്ത്രി നരേന്ദ്ര മോദിക്കും എന്‍.ഡി.എ സര്‍ക്കാറിനുമെതിരെ രൂക്ഷ വിമര്‍ശവുമായി കോണ്‍ഗ്രസ്. ബി.ജെ.പി രാജ്യത്തിന്‍െറ സാമൂഹിക അന്തരീക്ഷം തകര്‍ക്കുകയാണെന്ന് കോണ്‍ഗ്രസ് അധ്യക്ഷ സോണിയ ഗാന്ധി പറഞ്ഞു. ബിഹാറിലെ ബക്സറില്‍ തെരഞ്ഞെടുപ്പ് റാലിയില്‍ പ്രവര്‍ത്തകരെ അഭിസംബോധന ചെയ്യുകയായിരുന്നു അവര്‍.

ജനാധിപത്യ മൂല്യങ്ങളില്‍ നിന്ന് ബി.ജെ.പി സര്‍ക്കാര്‍ ഏറെ അകന്നു കഴിഞ്ഞു. ബി.ജെ.പിയുടെ ആശയങ്ങള്‍ ജനങ്ങളില്‍ അടിച്ചേല്‍പ്പിക്കുന്നത് ജനാധിപത്യത്തിന് ഭീഷണിയാണ്. വര്‍ഗീയ കലാപങ്ങള്‍ക്കാണ് ഇത് വഴിവെക്കുന്നതെന്നും സോണിയ ചൂണ്ടിക്കാട്ടി.

സാഹിത്യകാരന്മാര്‍ നേരിടുന്ന പ്രതിസന്ധി ജനാധിപത്യത്തിന് നേരെയുള്ള വെല്ലുവിളിയാണ്. കേട്ടുകേള്‍വിയുടെ പേരില്‍ ആളുകളെ ക്രൂരമായി കൊലപ്പെടുത്തുന്ന അവസ്ഥയാണ് രാജ്യത്തുള്ളത്. ജനങ്ങളുടെ പ്രശ്നങ്ങള്‍ വെറുതെ കേള്‍ക്കുന്നതിനല്ല അവ പരിഹരിക്കുന്നതിനാണ് പ്രധാനമന്ത്രി ശ്രമിക്കേണ്ടതെന്നും സോണിയ ആവശ്യപ്പെട്ടു.