അനുമതിയില്ലാതെ റാലി; ഹാര്‍ദിക് പട്ടേല്‍ പൊലീസ് കസ്റ്റഡിയില്‍

അഹ്മദാബാദ്: ഗുജറാത്തില്‍ പട്ടേല്‍ സംവരണത്തിനായി സമരം നടത്തുന്ന ഹാര്‍ദിക് പട്ടേലടക്കം 79 പേരെ പൊലീസ് കസ്റ്റഡിയിലെടുത്തു. സംവരണാവശ്യവുമായി ശനിയാഴ്ച സൂറത്തില്‍ നടത്താന്‍ തീരുമാനിച്ചിരുന്ന ഏക്താ മാര്‍ച്ച് ആരംഭിക്കുന്നതിന് തൊട്ടുമുമ്പാണ് ഹാര്‍ദിക് പട്ടേലിനെ അറസ്റ്റ് ചെയ്തത്.

തുടര്‍ന്ന് അഹ്മദാബാദിലും സൂറത്തിലും മൊബൈല്‍ ഇന്‍റര്‍നെറ്റ് സര്‍വിസുകള്‍ക്ക് 24 മണിക്കൂര്‍ നേരത്തേക്ക് വിലക്കേര്‍പ്പെടുത്തി. അറസ്റ്റുമായി ബന്ധപ്പെട്ട് വാട്സ്ആപ്, ട്വിറ്റര്‍ തുടങ്ങിയ സോഷ്യല്‍ മീഡിയ വഴി അനാവശ്യ അഭ്യൂഹങ്ങള്‍ പടരാതിരിക്കാനുള്ള മുന്‍കരുതല്‍ എന്ന നിലയിലാണ് നടപടിയെന്ന് അഹ്മദാബാദ് സിറ്റി പൊലീസ് കമീഷണര്‍ ശിവാനന്ദ് ഝാ പറഞ്ഞു. ഹാര്‍ദിക്കിനെ പൊലീസ് കസ്റ്റഡിയില്‍ ചോദ്യംചെയ്തുവരുകയാണെന്നും അദ്ദേഹം പറഞ്ഞു.

പട്ടേല്‍ സമുദായത്തിന് ജാതിസംവരണമെന്ന ആവശ്യത്തിന്മേല്‍ ഗുജറാത്ത് സര്‍ക്കാര്‍ അനുകൂല തീരുമാനം എടുക്കാത്തതിനെ തുടര്‍ന്നാണ് രണ്ടാം ഘട്ട സമരമെന്ന നിലയില്‍ എതിര്‍ ദണ്ഡി മാര്‍ച്ച് നടത്തുമെന്ന് ഹാര്‍ദിക്കും കൂട്ടരും പ്രഖ്യാപിച്ചത്. എന്നാല്‍, മാര്‍ച്ചിന് അനുമതി ആവശ്യപ്പെട്ട് നല്‍കിയ അപേക്ഷ ജില്ലാ കലക്ടറും മലയാളിയുമായ രമ്യ മോഹന്‍ നിഷേധിക്കുകയായിരുന്നു.
തുടര്‍ന്നാണ് അനുമതി ലഭിച്ചാലും ഇല്ളെങ്കിലും 73 പേരടങ്ങുന്ന സംഘം ശനിയാഴ്ച ദണ്ഡിയില്‍നിന്ന് മാര്‍ച്ച് നടത്തുമെന്ന് പ്രഖ്യാപിച്ചത്.

ഹാര്‍ദിക്കിന്‍െറ നേതൃത്വത്തില്‍ ആഗസ്റ്റ് 25ന് നടന്ന ആദ്യ സമരത്തിനുനേരെ പൊലീസ് നടത്തിയ വെടിവെപ്പില്‍ 10 പേര്‍ കൊല്ലപ്പെട്ടിരുന്നു. സംഭവത്തില്‍ ഉത്തരവാദികളായ പൊലീസ് ഉദ്യോഗസ്ഥര്‍ക്കെതിരെ നടപടിയെടുക്കണമെന്നും നേതാക്കള്‍ ആവശ്യപ്പെട്ടിരുന്നു. അതേസമയം പട്ടേലിനെ ഉടന്‍ മോചിപ്പിച്ചില്ളെങ്കില്‍ രാജ്യ വ്യാപകമായി ജയില്‍ ഉപരോധ സമരം നടത്തുമെന്ന് പട്ടേല്‍ നവ നിര്‍മാണ്‍ സേന മുന്നറിയിപ്പ് നല്‍കി. അതിന്‍െറ ഉത്തരവാദിത്തം പ്രധാനമന്ത്രി നരേന്ദ്ര മോദിക്കും ഗുജറാത്ത് മുഖ്യമന്ത്രിക്കുമായിരിക്കുമെന്ന് ദേശീയ സെക്രട്ടറി അഖിലേഷ് കത്തിയാര്‍ പറഞ്ഞു. സമാധാനപരമായി സമരം നടത്താന്‍ അനുവദിച്ചില്ളെങ്കില്‍ 27 കോടി വരുന്ന പട്ടേല്‍ സമുദാംഗങ്ങളെ അണിനിരത്തി സമരത്തിന് ഇറങ്ങുമെന്നും അദ്ദേഹം വ്യക്തമാക്കി.

അതേസമയം, പട്ടേല്‍ സമുദായക്കാരുടെ മാര്‍ച്ചിനെതിരെ എതിര്‍ മാര്‍ച്ച് സംഘടിപ്പിക്കാനാണ് ഒ.ബി.സി വിഭാഗങ്ങളുടെ തീരുമാനം. ഹാര്‍ദിക് നടത്തുന്ന മാര്‍ച്ച് ഒ.ബി.സികള്‍ക്കെതിരെയാണെന്നും ഇതിനെ ശക്തമായി നേരിടുമെന്നും ഒ.ബി.സി യുനൈറ്റഡ് ഫ്രണ്ട് നേതാവ് ആല്‍പേഷ് താക്കൂര്‍ പറഞ്ഞു.