മുല്ലപ്പെരിയാര്‍; തമിഴ്നാടിന്റെ പരാതിയില്‍ ഇടപെടില്ലെന്ന് സമിതി

ന്യൂദൽഹി: മുല്ലപ്പെരിയാ൪ അണക്കെട്ടിൽ അറ്റകുറ്റണി നടത്തുന്നത് സംബന്ധിച്ച തമിഴ്നാടിന്റെ പരാതിയിൽ ഇടപെടില്ലെന്ന് ഉന്നതാധികാര സമിതി. അറ്റകുറ്റപ്പണി നടത്താൻ അനുവാദം നൽകേണ്ടത് കേരളമാണെന്നും ഇക്കാര്യം കേരള ചീഫ് സെക്രട്ടറിയുടെ ശ്രദ്ധയിൽപെടുത്തിയിട്ടുണ്ടെന്നും സമിതി വ്യക്തമാക്കി.

മുല്ലപ്പെരിയാ൪ അണക്കെട്ടിൽ അറ്റകുറ്റപ്പണി നടത്താൻ കേരളം അനുവദിക്കുന്നില്ലന്നെ് കാണിച്ച് തമിഴ്നാട് ഉന്നതാധികാര സമിതിക്ക് പരാതി നൽകിയിരുന്നു.

സുപ്രീം കോടതി നിയോഗിച്ച ഉന്നതാധികാര സമിതിയുടെ അവസാന യോഗമാണ് 22, 23 തിയതികളിൽ ദൽഹിയിൽ നടക്കുന്നത്. സുപ്രിം കോടതിക്കു സമ൪പ്പിക്കാനുള്ള അന്തിമ റിപ്പോ൪ട്ടിന് രൂപം നൽകാനാണ് യോഗം. ഏപ്രിൽ 30നാണ് സമിതിയുടെ കാലാവധി അവസാനിക്കുന്നത്. അതിന് മുമ്പ് മുല്ലപ്പെരിയാ൪ വിഷയത്തിൽ സമിതി സുപ്രീം കോടതിക്ക് റിപ്പോ൪ട്ടു നൽകും.

അഞ്ചംഗ സമിതിയിൽ കേരളത്തിന്റെ പ്രതിനിധിയായി ജസ്റ്റിസ് കെ.ടി. തോമസും തമിഴ്നാടിന്റെ പ്രതിനിധിയായി ജസ്റ്റിസ് എ.ആ൪.ലക്ഷ്മണനുമാണുള്ളത്.