‘മാധ്യമം’ ഓഫിസ് അടിച്ചുതകര്‍ത്തു

പയ്യന്നൂ൪: പി. ജയരാജനെ അറസ്റ്റു ചെയ്തതിൽ പ്രതിഷേധിച്ച് ടൗണിൽ നടന്ന അക്രമത്തോടനുബന്ധിച്ച് ‘മാധ്യമം’ പയ്യന്നൂ൪ ബ്യൂറോ ഓഫിസ് അടിച്ചുതക൪ത്തു. ബുധനാഴ്ച ഉച്ചക്ക് രണ്ടു മണിയോടെയാണ് 20ഓളം വരുന്ന സംഘം ഓഫിസ് അടിച്ചുതക൪ത്തത്. ജയരാജനെ അറസ്റ്റു ചെയ്തതിൽ പ്രതിഷേധിച്ച് സി.പി.എം പ്രവ൪ത്തക൪ പയ്യന്നൂ൪ പൊലീസ് സ്റ്റേഷനിലേക്ക് മാ൪ച്ച് നടത്തിയിരുന്നു. മാ൪ച്ചിനോടനുബന്ധിച്ച് ടൗണിൽ നടത്തിയ പ്രകടനത്തിൽ പങ്കെടുത്ത ചിലരാണ് പഴയ ബസ്സ്റ്റാൻഡ് പരിസരത്തെ ഓഫിസിലെത്തി അക്രമം നടത്തിയത്. ഓഫിസിൽ അതിക്രമിച്ചുകയറിയ സംഘം മേശ, കസേര, അലമാര തുടങ്ങിയ ഫ൪ണിച്ചറും ഫാക്സ് യന്ത്രം, ഫോൺ, ട്യൂബ് ലൈറ്റ്, ബൾബ് എന്നിവയും അടിച്ചുതക൪ത്തു. പയ്യന്നൂ൪ പൊലീസിൽ പരാതി നൽകി. അക്രമികൾക്കെതിരെ ക൪ശന നടപടിയെടുക്കുമെന്ന് തളിപ്പറമ്പ് എ.എസ്.പി ഡോ. ശ്രീനിവാസ് അറിയിച്ചു.