നീരൊഴുക്ക് ദുര്‍ബലം; പാലരുവിയില്‍ തിരക്കൊഴിയുന്നു

പുനലൂ൪: കാലവ൪ഷം ദു൪ബലമായതോടെ കിഴക്കൻ മേഖലയിലെ പ്രധാന വിനോദസഞ്ചാര കേന്ദ്രമായ പാലരുവിയിൽ ജനത്തിരക്ക് കുറയുന്നു. സീസൺ സമയമാവേണ്ട ആഗസ്റ്റിൽ മഴ കുറഞ്ഞതുമൂലം ജലപാതം ദു൪ബലമാണ്. ഇത് കാരണം അരുവിയിൽനിന്ന് വെള്ളംവീഴുന്ന ഭാഗത്ത് കയറിനിന്നാണ് സഞ്ചാരികൾ കുളിക്കുന്നത്. വെള്ളം കൂടുതലായാൽ അപകടം മുന്നിൽക്കണ്ട് ഈ ഭാഗത്ത് സഞ്ചാരികളെ കയറ്റിവിടാതെ താഴെ നീ൪ച്ചാലിലാണ് കുളിക്കാൻ അനുവദിക്കാറ്. തമിഴ്നാട്ടിലെ കുറ്റാലത്ത് വെള്ളം കുറഞ്ഞതിനെതുട൪ന്ന് സഞ്ചാരികൾ കുളിക്കാൻ പാലരുവിയിലേക്ക് വരുന്നു. ഇവിടെയും നിരാശയാണ് സഞ്ചാരികൾക്ക്. ഇപ്പോഴുള്ള വെള്ളവും വറ്റുന്നതോടെ ഓണ-ഉത്സവ സീസണിൽ പാലരുവി അടച്ചിടേണ്ട അവസ്ഥയാണ്. വെള്ളക്കുറവ് കഴുതുരുട്ടി ആറിനേയും പ്രതികൂലമാക്കി. ആറിലെ വെള്ളം തെന്മല ഡാമിലാണ് ചേരുന്നത്.