ബി.പി.എല്‍ കാര്‍ഡ്: അപാകത പരിഹരിക്കാന്‍ പഞ്ചായത്ത് തലത്തില്‍ സ്ക്രീനിങ് കമ്മിറ്റി

മലപ്പുറം: അന൪ഹരായ ബി.പി.എൽ കാ൪ഡുടമകളെ ഒഴിവാക്കാനും അ൪ഹരായവരെ ഉൾപ്പെടുത്താനും പഞ്ചായത്ത് തലത്തിൽ സ്ക്രീനിങ് കമ്മിറ്റി രൂപവത്കരിക്കാൻ തീരുമാനിച്ചു. പഞ്ചായത്ത് പ്രസിഡൻറുമാരുടെയും ഉദ്യോഗസ്ഥരുടെയും യോഗത്തിലാണ് തീരുമാനം. ഗ്രാമപഞ്ചായത്ത് പ്രസിഡൻറ്, ചെയ൪മാൻ, ബന്ധപ്പെട്ട വില്ലേജ് ഓഫിസ൪, റേഷനിങ് ഇൻസ്പെക്ട൪, ഗ്രാമപഞ്ചായത്ത് സെക്രട്ടറി, വില്ലേജ് എക്സ്റ്റൻഷൻ ഓഫിസ൪, ഐ.സി.ഡി.എസ് സൂപ്പ൪വൈസ൪ എന്നിവ൪ അംഗങ്ങളാകും.
തദ്ദേശ സ്വയംഭരണ വകുപ്പ് ഏപ്രിൽ 27ന് പുറപ്പെടുവിച്ച ഉത്തരവ് പ്രകാരമുള്ള നടപടികളാണ് സ്വീകരിക്കുക. ഉത്തരവനുസരിച്ച് സ൪ക്കാ൪ ജീവനക്കാ൪, അധ്യാപക൪, പൊതുമേഖലാ സ്ഥാപനങ്ങളിലെ ജീവനക്കാ൪, ആദായ നികുതി നൽകുന്നവ൪, സ്വന്തമായി ഒരേക്കറിനുമേൽ ഭൂമിയുള്ളവ൪, വാഹനം സ്വന്തമായുള്ളവ൪ എന്നിവരെ പട്ടികയിൽനിന്ന് ഒഴിവാക്കും. പകരം ആശ്രയ പദ്ധതി അംഗങ്ങൾ, മാനസിക-ശാരീരിക വൈകല്യമുള്ളവ൪, ഓട്ടിസം ബാധിച്ചവ൪, നിരാലംബരായ സ്ത്രീകൾ, എയ്ഡ്സ്, കാൻസ൪, കിഡ്നി രോഗികൾ, പരസഹായമില്ലാതെ ജീവിക്കാൻ കഴിയാത്തവ൪ എന്നിവരെ ഉൾപ്പെടുത്തും. പട്ടിക ഗ്രാമസഭ അംഗീകാരത്തിന് വിധേയമായിരിക്കും.
മുഖ്യമന്ത്രിയുടെ ജനസമ്പ൪ക്ക പരിപാടിയിൽ ലഭിച്ച അപേക്ഷകളും കലക്ടറേറ്റിലും ജില്ലാ സപൈ്ള ഓഫിസിലും ലഭിച്ച അപേക്ഷകളും ബന്ധപ്പെട്ട പഞ്ചായത്ത് ഓഫിസുകൾക്ക് കൈമാറും. അപേക്ഷ നൽകാത്തവ൪ക്ക് സെപ്റ്റംബ൪ 15 വരെ അതത് ഗ്രാമപഞ്ചായത്ത് ഓഫിസുകളിൽ അ൪ഹത തെളിയിക്കുന്ന രേഖകൾ സഹിതം അപേക്ഷ സമ൪പ്പിക്കാം. സെപ്റ്റംബ൪ 25നകം സ്ക്രീനിങ് കമ്മിറ്റി ചേ൪ന്ന് തീരുമാനമെടുക്കും. ഒക്ടോബ൪ 15നകം ഗ്രാമസഭ അംഗീകാരത്തോടെ പട്ടിക കലക്ട൪ക്ക് സമ൪പ്പിക്കും.
യോഗം കലക്ട൪ എം.സി. മോഹൻദാസ് ഉദ്ഘാടനം ചെയ്തു. പഞ്ചായത്ത് അസോസിയേഷൻ ജില്ലാ പ്രസിഡൻറ് കെ.എ. റസാഖ് അധ്യക്ഷത വഹിച്ചു. അസോസിയേഷൻ ജില്ലാ സെക്രട്ടറി സി.കെ. ജയദേവൻ, സംസ്ഥാന കമ്മിറ്റിയംഗങ്ങളായ പി.പി. സഫറുല്ല, ഒ.ടി. ജെയിംസ്, ജില്ലാ സപൈ്ള ഓഫിസ൪ കെ. രാധാകൃഷ്ണൻ, ഡി.ആ൪.ഡി.എ പ്രോജക്ട് ഡയറക്ട൪ പി.ആ൪. പ്രവീൺദാസ്, എ.ഡി.സി പി.ജി. വിജയകുമാ൪, പഞ്ചായത്ത് ഡെപ്യൂട്ടി ഡയറക്ട൪ കെ. ബാബു, അസിസ്റ്റൻറ് പ്രോജക്ട് ഓഫിസ൪ പി.ഡി. ഫിലിപ്പ് എന്നിവ൪ പങ്കെടുത്തു.