ഭൂമിദാനക്കേസ്: എഫ്.ഐ.ആര്‍ റദ്ദാക്കണമെന്നാവശ്യപ്പെട്ട് വി.എസിന്‍െറ ഹരജി

കൊച്ചി: ബന്ധുവിന് അനധികൃതമായി ഭൂമി ദാനം ചെയ്തെന്ന കേസിൽ തന്നെ ഒന്നാം പ്രതിയാക്കി വിജിലൻസ് തയാറാക്കിയ എഫ്.ഐ.ആ൪ റദ്ദാക്കണമെന്നാവശ്യപ്പെട്ട് പ്രതിപക്ഷ നേതാവ് വി.എസ.് അച്യുതാനന്ദൻെറ ഹരജി. നിഷ്പക്ഷവും സുതാര്യവുമായി അന്വേഷണം ഉറപ്പാക്കാൻ ഡി.ജി.പി, എ.ഡി.ജി.പി പദവിയിൽ കുറയാത്ത ഉദ്യോഗസ്ഥരെ കൊണ്ട് കേസ് അന്വേഷിപ്പിക്കണമെന്ന തൻെറ ആവശ്യം വിജിലൻസ് ഡയറക്ട൪ നടപ്പാക്കിയില്ലെന്നും രാഷ്ട്രീയ പ്രേരിതമായി തന്നെ പ്രതി ചേ൪ത്ത നടപടി നിയമവിരുദ്ധവും റദ്ദാക്കണമെന്നുമാണ് വി.എസിൻെറ ആവശ്യം. കാസ൪കോട് വിജിലൻസ് ഡെപ്യൂട്ടി സൂപ്രണ്ടാണ് വി.എസിനെ ഒന്നാം പ്രതിയാക്കി എഫ്.ഐ.ആ൪ രജിസ്റ്റ൪ ചെയ്തിട്ടുള്ളത്.
വിമുക്ത ഭടനും തൻെറ അകന്ന ബന്ധുവുമായ സോമന് ഗൂഢാലോചനയും അധികാര ദു൪വിനിയോഗവും നടത്തി ഭൂമി നൽകിയെന്ന ആരോപണത്തെ തുട൪ന്നാണ് കേസ്. തൻെറ പരാതി പരിഗണിക്കാതെയുള്ള വിജിലൻസ് അന്വേഷണം അംഗീകരിക്കാനാവില്ല. അതിനാൽ എഫ്.ഐ.ആ൪ റദ്ദാക്കി തൻെറ അപേക്ഷ പരിഗണിക്കാൻ നി൪ദേശിക്കണമെന്ന് ഹരജിയിൽ ആവശ്യപ്പെടുന്നു.