അഞ്ച് കിലോ വെള്ളി ആഭരണങ്ങള്‍ പിടികൂടി

മട്ടന്നൂ൪: രേഖകളില്ലാതെ ബസിൽ കടത്തുകയായിരുന്ന അഞ്ച് കിലോ വെള്ളി ആഭരണങ്ങൾ പൊലീസ് പിടികൂടി. തിങ്കളാഴ്ച രാത്രി 10 മണിയോടെ മട്ടന്നൂ൪-ഇരിട്ടി റോഡിൽ ചാവശ്ശേരിയിൽ വെച്ചാണ് ആഭരണങ്ങൾ പിടികൂടിയത്. സംഭവത്തിൽ തലശ്ശേരി സ്വദേശിയായ സാദിഖിനെ (33) കസ്റ്റഡിയിലെടുത്തു. മൈസൂരിൽനിന്നും തലശ്ശേരിയിലേക്ക് പോവുകയായിരുന്ന സ്വകാര്യ ബസിൽ യാത്രക്കാരനായ സാദിഖിൻെറ കൈവശമുണ്ടായിരുന്ന ബാഗിൽനിന്നാണ് രേഖകളില്ലാതെ കടത്തുകയായിരുന്ന ആഭരണങ്ങൾ പിടിച്ചെടുത്തത്. ഇരിട്ടി ഡിവൈ.എസ്.പി പ്രദീപ്കുമാറിന് ലഭിച്ച രഹസ്യ വിവരത്തിൻെറ അടിസ്ഥാനത്തിൽ മട്ടന്നൂ൪ എസ്.ഐ കെ.വി. പ്രമോദും സംഘവും ചാവശ്ശേരിയിൽവെച്ച് ബസിൽ പരിശോധന നടത്തുകയായിരുന്നു. പിടിച്ചെടുത്ത ആഭരണങ്ങൾക്ക് മൂന്നേകാൽ ലക്ഷം രൂപ വരും.