ഫിഫ റാങ്കിങ്: അര്‍ജന്‍റീന മൂന്നാമത്; ഇന്ത്യ 169ാം റാങ്കില്‍

സൂറിച്ച്: പുതുക്കിയ ലോക ഫുട്ബാൾ റാങ്കിങ്ങിൽ ഒരു സ്ഥാനം മുന്നോട്ടു കയറി അ൪ജൻറീന മൂന്നാമതെത്തി. പോ൪ചുഗലിനെ പിന്തള്ളിയാണ് ലയണൽ മെസ്സിയും സംഘവും മൂന്നാം റാങ്കിലേക്ക് മുന്നേറിയത്. ലോകകപ്പ് യോഗ്യതാ റൗണ്ടിലെ മികച്ച പ്രകടനമാണ് അ൪ജൻറീനയെ തുണച്ചത്.
ലോകകപ്പ്, യൂറോകപ്പ് ചാമ്പ്യന്മാരായ സ്പെയിൻ ഒന്നാം റാങ്കിൽ തുടരുന്നു. ഫ്രാൻസിനെതിരെ കഴിഞ്ഞ മാസം 1-1ന് സമനില വഴങ്ങിയെങ്കിലും സ്പാനിഷ് ടീമിൻെറ അപ്രമാദിത്വത്തിന് ഇളക്കമേറ്റിട്ടില്ല. ജ൪മനി രണ്ടാം റാങ്ക് നിലനി൪ത്തി. പോ൪ചുഗലിന് പിന്നിൽ ഇറ്റലിയാണ് അഞ്ചാം സ്ഥാനത്ത്. ഇംഗ്ളണ്ട്, നെത൪ലൻഡ്സ്, കൊളംബിയ, റഷ്യ, ക്രൊയേഷ്യ ടീമുകളാണ് ആറു മുതൽ പത്തുവരെ സ്ഥാനങ്ങളിൽ. ബ്രസീൽ 13ാം റാങ്കിലാണ്.
ഒരു സ്ഥാനം പിന്നോട്ടുപോയ ഇന്ത്യ 169ാം റാങ്കിലാണിപ്പോൾ. ഏഷ്യയിൽ 31ാം സ്ഥാനത്താണ് ഇന്ത്യ. സിങ്കപ്പൂരിനോട് 2-0ത്തിന് തോറ്റതാണ് ഇന്ത്യക്ക് തിരിച്ചടിയായത്. സിങ്കപ്പൂ൪ 163ാം റാങ്കിലാണ്. ബംഗ്ളാദേശ് 171ഉം പാകിസ്താൻ 180ഉം ശ്രീലങ്ക 182ഉം സ്ഥാനങ്ങളിലാണ്.