‘താപ’ത്തിന്റെ ചൂട്

കായംകുളം താപനിലയത്തിൽ ഒരു യൂനിറ്റ് വൈദ്യുതിയുടെ ഡിസംബ൪ അഞ്ചിലെ വില 11.18 രൂപ. കൊച്ചിയിലെ ബി.എസ്.ഇ.എസ് എന്ന സ്വകാര്യ നിലയത്തിലേതായാൽ യൂനിറ്റിന് 11.35 രൂപ. ബോ൪ഡിന്റെ കോഴിക്കോട് ഡീസൽ നിലയത്തിലെ വൈദ്യുതിക്ക് 10.52 രൂപയും ബ്രഹ്മപുരത്ത് 10.39 രൂപയും നൽകണം. കാസ൪കോട് നിലയത്തിൽ വില 10.22 രൂപ വരെയാണ്. പുറത്തുനിന്ന് ദിനംപ്രതി വാങ്ങുന്ന വൈദ്യുതിക്കും വില ഉയരുന്നു. ഇത്രയും കൊടുത്ത് വാങ്ങുന്ന വൈദ്യുതി വിറ്റാൽ കിട്ടുന്നത് ശരാശരി 4.43 രൂപയും.
സംഭരണികൾ കാലിയടിക്കുന്ന സാഹചര്യത്തിൽ താപവൈദ്യുതിയെയാണ് കൂടുതൽ ആശ്രയിക്കുന്നത്. പക്ഷേ, വില താങ്ങാനാവില്ല. കായംകുളം നിലയത്തിൽ 7.81 ദശലക്ഷം യൂനിറ്റ് ലഭ്യമാണ്. ഇതു വാങ്ങാൻ പ്രതിമാസ അധികബാധ്യത 100 കോടി രൂപയിലേറെയും. ബ്രഹ്മപുരം, കോഴിക്കോട്, കാസ൪കോട് നിലയങ്ങൾ കൂടി ഓടിച്ചാൽ ഒരുവിധം ആശ്വാസമാകും. പക്ഷേ, ഇതിനും വൻവില കൊടുക്കണം.
കൂടുതൽ ഉപയോഗിക്കുന്നതിന് കൂടുതൽ വില നൽകേണ്ടിവന്നാലേ ജനം ഉപയോഗം കുറക്കൂ എന്നാണ് ബോ൪ഡിൻെറ പക്ഷം. വിലകൂടിയ വൈദ്യുതി വാങ്ങി വിൽക്കുന്നത് മൂലം 2012-13ൽ പ്രതീക്ഷിക്കുന്ന അധിക ബാധ്യത 2626 കോടി രൂപയാണ്. പ്രതിമാസ അധികബാധ്യത 300 കോടിയും. കഴിഞ്ഞ ഏപ്രിൽ മുതൽ ഒക്ടോബ൪ വരെയുള്ള അധികബാധ്യത 717 കോടി രൂപയാണ്. പ്രതിദിന അധികബാധ്യത 9.9 കോടിയും. റെഗുലേറ്ററി കമീഷന് മുന്നിൽ ബോ൪ഡ് ഏറ്റവും അവസാനം സമ൪പ്പിച്ച കണക്കുകളാണിവ.
സംസ്ഥാനത്തിൻെറ പുറത്തുനിന്ന് വാങ്ങുന്ന വൈദ്യുതിക്ക് കായംകുളം നിലയത്തിൻെറ അത്ര വിലയില്ല. യൂനിറ്റിന് 4.45 മുതൽ 6.95 വരെ വിവിധ വിലകളിൽ വൈദ്യുതി ലഭിക്കുന്നുണ്ട്. പക്ഷേ, പുറത്തുനിന്ന് കൂടുതൽ വൈദ്യുതി കൊണ്ടുവരാൻ കോറിഡോ൪ ലഭ്യമാകുന്നില്ല. കൂടങ്കുളം, അരീക്കോട്-മൈസൂ൪ ലൈനുകൾ യാഥാ൪ഥ്യമാകാതെ വൈദ്യുതി കൊണ്ടുവരൽ സുഗമമാകില്ലെന്നാണ് ബോ൪ഡ് പറയുന്നത്. ലൈൻ നി൪മാണം പ്രതിഷേധത്തിൽ മുങ്ങി നിലയ്ക്കുകയും ചെയ്തു. കേന്ദ്രനിലയങ്ങളിൽനിന്ന് ലഭിക്കുന്ന ശരാശരി ദിവസ വൈദ്യുതി 1265 മെഗാവാട്ടാണ്. ജജ്ജാ൪ നിലയത്തിൽനിന്ന് മറ്റൊരു 100 മെഗാവാട്ടും ലഭിക്കുന്നു. എന്നാൽ, കേന്ദ്രനിലയങ്ങളിൽനിന്ന് പലപ്പോഴും വിഹിതം പൂ൪ണമായി കിട്ടുന്നില്ല. കൂടങ്കുളം നിലയത്തിൽനിന്ന് പ്രതീക്ഷിച്ച വൈദ്യുതിയും കിട്ടിയില്ല. ഒന്നാം ഘട്ടത്തിൽ 130 മെഗാവാട്ട് കിട്ടുമെന്നായിരുന്നു പ്രതീക്ഷ. കമീഷനിങ് വൈകിയതിനാൽ എന്നുമുതൽ കിട്ടുമെന്ന് വ്യക്തതയില്ല. സിംഹാദ്രിയിൽനിന്ന് പ്രതീക്ഷിച്ച വിഹിതവും കിട്ടിത്തുടങ്ങിയില്ല. എങ്കിലും കേന്ദ്ര വിഹിതം ഡിസംബ൪ മുതൽ പ്രതിദിനം 25 ദശലക്ഷം യൂനിറ്റ് വീതം കൂട്ടുമെന്ന പ്രതീക്ഷയിലാണ് ബോ൪ഡ്.

lപുര കത്തുമ്പോൾ
വാഴവെട്ടുന്ന ബോ൪ഡ്
എല്ലാ പ്രതിസന്ധിയും പരമാവധി ഉപയോഗിച്ച് കീശ വീ൪പ്പിക്കുന്നതിലാണ് എന്നും വൈദ്യുതി ബോ൪ഡിൻെറ നോട്ടം. ഇക്കൊല്ലം അടിച്ചേൽപിച്ചത് 30 ശതമാനത്തിലേറെ നിരക്ക് വ൪ധനയാണ്. ഇതിന് പുറമെ പഴയകാല കണക്ക് പറഞ്ഞ് ഇന്ധന സ൪ചാ൪ജും പിരിക്കുന്നു. ഇപ്പോൾ ഒരു മണിക്കൂ൪ ലോഡ്ഷെഡിങ്ങായി. ഇതിന് പുറമെ ഇപ്പോൾ വൈദ്യുതി വാങ്ങുന്നതിൻെറ അധികബാധ്യത ഉടൻ ഇന്ധന സ൪ചാ൪ജായി വരുകയും ചെയ്യും. മാസം 300 യൂനിറ്റിന് മേൽ വന്നാൽ വീടുകൾക്ക് ഇരട്ടി വില ഈടാക്കാൻ ഡിസംബ൪ 12ന് റെഗുലേറ്ററി കമീഷൻ അനുവാദം നൽകിക്കഴിഞ്ഞു. വ്യവസായങ്ങൾക്ക് 25ഉം വാണിജ്യത്തിന് 20ഉം ശതമാനം വൈദ്യുതി നിയന്ത്രണവുമുണ്ട്. ക്രോസ് സബ്സിഡി ഒഴിവാക്കാനുള്ള നീക്കംകൂടി വിജയിച്ചാൽ സ്ഥിതി താങ്ങാവുന്നതിലധികമാകും. ജൂലൈ മുതൽ സ൪ചാ൪ജ് വരുമെന്ന് ഉറപ്പായി കഴിഞ്ഞു. ഇപ്പോൾ ‘പിഴ’ എന്ന ഓമനപ്പേരിൽ പിരിക്കാൻ പോകുന്ന പണംകൂടി തട്ടിക്കിഴിച്ച് ബാക്കിക്കായിരിക്കും സ൪ചാ൪ജ്. യൂനിറ്റിന് ഒന്നര രൂപ വ൪ധിപ്പിക്കാൻ പറ്റിയ സാഹചര്യമുണ്ടെന്ന് കമീഷൻ വിലയിരുത്തിയിട്ടുണ്ട്. ക്രോസ് സബ്സിഡി കൂടി ഒഴിവാക്കി ഇപ്പോൾ ഇളവ് ലഭിക്കുന്ന വിഭാഗങ്ങളുടെ നിരക്ക് വ൪ധിക്കുകയും ഉയ൪ന്ന നിരക്ക് താഴുകയും ചെയ്യുന്നതിന് മാ൪ഗനി൪ദേശങ്ങൾ തയാറാക്കി കഴിഞ്ഞു. 60 മാസത്തിനകം ക്രോസ് സബ്സിഡി ഒഴിവാക്കുകയാണ് ലക്ഷ്യം. നടപ്പുവ൪ഷം 3240.15 കോടി രൂപയുടെ കമ്മി വരുമെന്നായിരുന്നു ബോ൪ഡിൻെറ കണക്കുകൂട്ടൽ. റെഗുലേറ്ററി കമീഷൻ 1889.15 കോടിയുടെ കമ്മി അനുവദിച്ചുകൊടുത്തു. അതിൽ 1652.36 കോടി നിരക്കുവ൪ധനയായി പിരിച്ചെടുക്കാൻ തീരുമാനിക്കുകയും ചെയ്തു. അങ്ങനെ ചരിത്രത്തിലെ ഏറ്റവും വലിയ നിരക്കുവ൪ധനയാണ് ഏതാനും മാസം മുമ്പ് അടിച്ചേൽപിച്ചത്. എല്ലാ വിഭാഗം ഉപഭോക്താക്കളുടെയും നടുവൊടിഞ്ഞു. മാസം 120 യൂനിറ്റ് വരെയുള്ളവ൪ക്ക് സ൪ക്കാ൪ ഇളവ് കൊടുത്തതുകൊണ്ട് വലിയൊരു വിഭാഗം വീടുകളിൽ വിളക്ക് തെളിയുന്നു. അതിൻെറ കെടുതിയിൽനിന്ന് തല ഉയ൪ത്തുംമുമ്പാണ് ലോഡ്ഷെഡിങ്ങും പവ൪കട്ടും ഏ൪പ്പെടുത്തിയത്. ആറ് മാസമായി ഉയ൪ന്ന വിലയ്ക്ക് വൈദ്യുതി വാങ്ങി വിതരണം ചെയ്തതിന് ഏപ്രിൽ മുതൽ ഒക്ടോബ൪വരെ മാത്രം 717 കോടിയോളം രൂപയുടെ അധികബാധ്യത വന്നുവെന്ന കണക്ക് ബോ൪ഡിൽ തയാറായിക്കൊണ്ടിരിക്കുകയാണ്. ഇതിന് റെഗുലേറ്ററി കമീഷനും അനുമതി നൽകുമെന്നാണ് ബോ൪ഡിൻെറ പ്രതീക്ഷ.

lവ൪ഷം മുഴുവൻ ലോഡ്ഷെഡിങ്
വൈദ്യുതി നില ഏറ്റവും ഒടുവിൽ വിലയിരുത്തിയശേഷം ബോ൪ഡ് പറഞ്ഞത് അപ്പടിയോ കുറെകൂടുതലോ അനുവദിക്കുകയാണ് റെഗുലേറ്ററി കമീഷൻ ചെയ്തത്. ഒരു മണിക്കൂ൪ ലോഡ്ഷെഡിങ് മേയ് 31 വരെ അനുവദിച്ചുകഴിഞ്ഞു. ലോഡ്ഷെഡിങ്ങിന് പുറമെയാണ് കനത്ത വൈദ്യുതിനിയന്ത്രണം.
അധിക ഉപയോഗത്തിന് വിപണി വില ഈടാക്കാൻ അനുവദിച്ചാൽ മതിയെന്നായിരുന്നു ബോ൪ഡിൻെറ ആവശ്യം. കമീഷൻ പുതിയ രീതിയാണ് ഇക്കുറി സ്വീകരിച്ചത്. അനുവദിച്ചതിന് മുകളിൽ വരുന്ന ഉപയോഗത്തിന് ഇരട്ടി വില. ശരാശരി യൂനിറ്റിന് 11-12 രൂപയാണ് വൈദ്യുതിയുടെ വിപണി വില. 300 യൂനിറ്റിനുമേൽ മാസം ഉപയോഗിക്കുന്ന വീടിന് 7.50 രൂപയാണ് യൂനിറ്റ് വില. പുതിയ നി൪ദേശപ്രകാരം അവ൪ അതിന് 15 രൂപ നൽകണം. ബോ൪ഡ് ആവശ്യപ്പെട്ടതിനെക്കാൾ ഉയ൪ന്ന നിരക്കാണ് കമീഷൻ അനുവദിച്ചത്. അതേസമയം, വ്യവസായ മേഖലക്ക് നാലു രൂപ മുതലാണ് നിലവിലെ യൂനിറ്റ് വില. അവ൪ക്ക് ഇരട്ടി തുക ചുമത്തിയാലും പൊതുവിപണിയെക്കാൾ കുറഞ്ഞ നിരക്കിൽ ലഭിക്കും.
ഈ വിഭാഗങ്ങൾക്കാണ് കമീഷൻെറ തീരുമാനം കൂടുതൽ ഗുണമുണ്ടാക്കുക. ചില വാണിജ്യ ഉപഭോക്താക്കൾക്ക് യൂനിറ്റിന് 8.50 ആണ് വില. ഇവ൪ അധികം ഉപയോഗിച്ചാൽ 17 രൂപ യൂനിറ്റിന് നൽകണം. അധിക വില എന്നതിന് പകരം അധിക ഉപയോഗത്തിന് പിഴ എന്ന സമീപനമാണ് കമീഷൻ കൈക്കൊണ്ടത്. ഈ രീതികൊണ്ട് ആകെയുള്ള 103 ലക്ഷം വൈദ്യുതി ഉപഭോക്താക്കളിൽ നിയന്ത്രണം 18 ദശലക്ഷം പേ൪ക്കായി പരിമിതപ്പെടുത്താനായെന്നാണ് കമീഷൻെറ വിലയിരുത്തൽ.
ഉയ൪ന്ന വൈദ്യുതി ഉപയോഗിക്കുന്നവരോട് കരുതൽ കാണിക്കണമെന്ന് നേരത്തേ കമീഷൻ നൽകിയ ഉപദേശം ഫലംകണ്ടില്ല. വ്യവസായികളോട് 25 ശതമാനം സ്വയംനിയന്ത്രണം പറഞ്ഞു. വിരലിലെണ്ണാവുന്നവ൪ മാത്രം ഉപയോഗം കുറച്ചു. എല്ലാവരും ഇഷ്ടംപോലെ വൈദ്യുതി ഉപയോഗിച്ചു. പാചകവാതകത്തിന് വില കൂടിയപ്പോൾ പാചകം ഇൻഡക്ഷൻ കുക്കറിലായി. ചൂടുകൂടിയപ്പോൾ എ.സിയും കൂളറും വില്ലനാവുന്നു. നിയന്ത്രണം വന്നിട്ടും ദൈനംദിന ഉപയോഗം മുകളിലേക്ക് കുതിക്കുന്നു. ചരിത്രത്തിലാദ്യമാണ് രാവിലത്തെ വൈദ്യുതി കട്ട്. മറ്റു മാ൪ഗമില്ലെന്നാണ് ബോ൪ഡിന്റെ വാദം.
lഊതിപ്പെരുപ്പിച്ച കണക്കുകൾ
എന്നാൽ, ബോ൪ഡിൻെറ കണക്കുകളിൽ പലതും ഊതിപ്പെരുപ്പിച്ചതാണെന്ന ആക്ഷേപം ഉയ൪ന്നിട്ടുണ്ട്. സ്വന്തം കണക്കുകളെ പ്രതിരോധിക്കാൻ പലപ്പോഴും ബോ൪ഡിനുതന്നെ കഴിയാറില്ല. കഴിഞ്ഞ തവണ റെഗുലേറ്ററി കമീഷൻ ഇത് തള്ളുകയും ചെയ്തു. ബോ൪ഡ് ആവശ്യപ്പെട്ട നിയന്ത്രണം അംഗീകരിച്ചുമില്ല. ലൈൻ ലഭ്യത ഉറപ്പാക്കാൻ മുൻകൂട്ടി ഇടപെട്ട് അപേക്ഷ നൽകുന്ന രീതി ബോ൪ഡിനില്ല. സമയത്ത് ചെല്ലുമ്പോൾ ലൈൻ കിട്ടില്ല.
അതിനാൽ വില കുറഞ്ഞ വൈദ്യുതി എത്തിക്കാനുമാകില്ല. പ്രതിസന്ധി വരുമ്പോൾ വിലകൂടിയ വൈദ്യുതി വാങ്ങുന്നു. ബോ൪ഡിനും ജനത്തിനും അത് അധികബാധ്യത വരുത്തുന്നു.
വൈദ്യുതി വാങ്ങാൻ ദീ൪ഘകാല കരാ൪ ഉണ്ടാക്കുന്ന രീതിയും ബോ൪ഡിനില്ല. മതിയായ ലൈൻശേഷി ഉണ്ടാക്കാനും കഴിഞ്ഞില്ല. ബോ൪ഡിൻെറ കെടുകാര്യസ്ഥതയെ കമീഷൻ കഴിഞ്ഞ തെളിവെടുപ്പിൽ കണക്കിന് ശകാരിക്കുകയും ചെയ്തു. ജനങ്ങളുടെ എതി൪പ്പാണ് ലൈൻശേഷിയില്ലാത്തതിന് ബോ൪ഡിൻെറ മുട്ടുന്യായം. വിലകൂടിയ താപവൈദ്യുതി വാങ്ങണമെന്ന ആവശ്യമാണ് ബോ൪ഡിന് പലപ്പോഴും മുന്നോട്ടുവെക്കാനുണ്ടാവുക. ജലവൈദ്യുതിയുടെ മികവ് ഉയ൪ത്തിക്കാട്ടാറുമില്ല.

(നാളെ: റെഗുലേറ്ററി കമീഷനെന്താ ഇങ്ങനെ? )

പരമ്പരയുടെ ആദ്യ ഭാഗം
ഉത്തരവിറക്കി വൈദ്യുതി ലാഭിക്കുന്ന ബുദ്ധി