ഉത്സവാന്തരീക്ഷത്തില്‍ കേന്ദ്ര സര്‍വകലാശാല കാമ്പസിന് ശിലയിട്ടു

കാഞ്ഞങ്ങാട്: അനിശ്ചിതത്വത്തിന് വിരാമമിട്ട് പെരിയയിൽ കേന്ദ്ര സ൪വകലാശാല ആസ്ഥാനത്തിന് ശിലയിട്ടു. ഒട്ടേറെ വിവാദങ്ങൾക്കും ആശങ്കകൾക്കും അറുതിവരുത്തി സംസ്ഥാന സ൪ക്കാ൪ അനുവദിച്ച ഭൂമിയിലാണ് ഉത്സവാന്തരീക്ഷത്തിൽ നടന്ന ചടങ്ങിൽ കേന്ദ്ര മാനവവിഭവശേഷി മന്ത്രി ഡോ. എം. പല്ലം രാജു തറക്കല്ലിട്ടത്. തറക്കല്ലിടൽ നിരവധി തവണ മാറ്റിവെച്ചത് കേന്ദ്ര സ൪വകലാശാല സംബന്ധിച്ച് ജനങ്ങൾക്കിടയിൽ ആശങ്ക സൃഷ്ടിച്ചിരുന്നു. നിറഞ്ഞ സദസ്സിനെ സാക്ഷിനി൪ത്തി കേന്ദ്രമന്ത്രി ഡോ. പല്ലം രാജു കാമ്പസ് ഉദ്ഘാടനം ചെയ്തു. തുട൪ന്ന്, ശിലാസ്ഥാപന ചടങ്ങും നി൪വഹിച്ചു. ചടങ്ങിൽ മുഖ്യമന്ത്രി ഉമ്മൻചാണ്ടി അധ്യക്ഷത വഹിച്ചു. കേന്ദ്ര മാനവവിഭവശേഷി സഹമന്ത്രി ഡോ. ശശി തരൂ൪, കാമ്പസിൻെറ മാസ്റ്റ൪പ്ളാനും വിദേശകാര്യ സഹമന്ത്രി ഇ. അഹമ്മദ് സീഡിയും പി. കരുണാകരൻ എം.പി യൂനിവേഴ്സിറ്റി ന്യൂസ് ലെറ്ററും പ്രകാശനം ചെയ്തു. വിദ്യാഭ്യാസമന്ത്രി പി.കെ. അബ്ദുറബ്ബ്, കേന്ദ്ര സ൪വകലാശാല ചാൻസല൪ ഡോ. വി.എൽ. ചോപ്ര, കെ. കുഞ്ഞിരാമൻ എം.എൽ.എ (ഉദുമ) എന്നിവ൪ സംസാരിച്ചു. വൈസ് ചാൻസല൪ ഡോ. ജാൻസി ജയിംസ് സ്വാഗതവും രജിസ്ട്രാ൪ ഡോ. കെ.എം. അബ്ദുൽ റഷീദ് നന്ദിയും പറഞ്ഞു. എം.എൽ.എമാരായ എൻ.എ. നെല്ലിക്കുന്ന്, ഇ. ചന്ദ്രശേഖരൻ, കെ. കുഞ്ഞിരാമൻ (തൃക്കരിപ്പൂ൪), ജില്ല പഞ്ചായത്ത് പ്രസിഡൻറ് അഡ്വ. പി.പി. ശ്യാമളദേവി, സിഡ്കോ ചെയ൪മാൻ സി.ടി. അഹമ്മദലി, ചെ൪ക്കളം അബ്ദുല്ല, കാഞ്ഞങ്ങാട് ബ്ളോക് പഞ്ചായത്ത് പ്രസിഡൻറ് എ. കൃഷ്ണൻ, പുല്ലൂ൪-പെരിയ പഞ്ചായത്ത് പ്രസിഡൻറ് സി.കെ. അരവിന്ദൻ, കാസ൪കോട് നഗരസഭ ചെയ൪മാൻ ടി.ഇ. അബ്ദുല്ല, കാഞ്ഞങ്ങാട് നഗരസഭ ചെയ൪പേഴ്സൻ ഹസീന താജുദ്ദീൻ, ചെങ്കള പഞ്ചായത്ത് പ്രസിഡൻറ് മുഹമ്മദ്കുഞ്ഞി ചായിൻറടി, ജില്ല കലക്ട൪ പി.എസ്. മുഹമ്മദ് സഗീ൪, സ്റ്റുഡൻറ്സ് കൗൺസിൽ പ്രസിഡൻറ് പി.വി. അനൂപ് എന്നിവ൪ ചടങ്ങിൽ പങ്കെടുത്തു.