ചങ്ങനാശേരിയിലും പരിസരങ്ങളിലും ജലവിതരണം മുടങ്ങിയിട്ട് രണ്ടുനാള്‍

ചങ്ങനാശേരി: കല്ലിശേരി ജലവിതരണ കേന്ദ്രത്തിലെ സ്റ്റാ൪ട്ട൪ കത്തിനശിച്ചതിനെ തുട൪ന്ന് ചങ്ങനാശേരിയിലും പരിസരങ്ങളിലും ജലവിതരണം മുടങ്ങിയിട്ട് രണ്ട് നാൾ.
മുനിസിപ്പൽ പ്രദേശത്തും തൃക്കൊടിത്താനം, പായിപ്പാട്, മാടപ്പള്ളി, വാഴപ്പള്ളി, കുറിച്ചി പഞ്ചായത്തുകളിലുമാണ് ജലവിതരണം മുടങ്ങിയത്.കല്ലിശേരി, കറ്റോട് പദ്ധതികളിൽനിന്നാണ് ചങ്ങനാശേരി മേഖലയിൽ വെള്ളം എത്തിക്കുന്നത്. പഞ്ചായത്ത് പ്രദേശങ്ങളിൽ കറ്റോട് പദ്ധതിയിൽനിന്നാണ് ജലവിതരണം നടത്തിയിരുന്നത്. പൈപ്പ്ലൈൻ മാറ്റി സ്ഥാപിക്കുന്ന ജോലി നടക്കുന്നതിനാൽ കറ്റോട് പദ്ധതിയിൽനിന്ന് ജലവിതരണം മാസങ്ങളായി നി൪ത്തിവെച്ചിരിക്കുകയാണ്. ഇതുമൂലം കല്ലിശേരി പദ്ധതിയിൽനിന്നുള്ള വെള്ളമാണ് പഞ്ചായത്ത് പ്രദേശങ്ങളിൽ നാമമാത്രമായെങ്കിലും വിതരണം ചെയ്തിരുന്നത്. സ്റ്റാ൪ട്ട൪ കത്തിനശിച്ച് കല്ലിശേരി പദ്ധതിയിൽനിന്നുള്ള വിതരണം കൂടി നിലച്ചതോടെ മേഖലയിൽ കുടിവെള്ളവിതരണം പൂ൪ണമായി നിലക്കുകയായിരുന്നു.