കുറുവാദ്വീപിലെ ചെടികടത്തല്‍: നാലു ജീവനക്കാരെ മാറ്റിനിര്‍ത്തി

മാനന്തവാടി: വിനോദസഞ്ചാര കേന്ദ്രമായ കുറുവാദ്വീപിൽനിന്ന് ചെടികൾ കടത്തിയ സംഭവത്തിൽ നാലു ജീവനക്കാരെ മാറ്റിനി൪ത്താൻ തീരുമാനം. മാനേജ൪ ഷിജു, ഡി.എം.സി ജീവനക്കാരായ ജോളി ജോസ്, എ.എസ്. മനീഷ്, അഖിൽ ജോ൪ജ് എന്നിവരെയാണ് മാറ്റിനി൪ത്തിയത്.

ഇതിൽ ഷിജു, ജോളി ജോസ് എന്നിവരെ സസ്പെൻഡ് ചെയ്ത് തിങ്കളാഴ്ച ഉത്തരവിറങ്ങും. മറ്റു രണ്ടുപേരെ അന്വേഷണം കഴിയുംവരെ മാറ്റിനി൪ത്താനാണ് നി൪ദേശം. ടൂറിസം ഡെ. ഡയറക്ട൪ സി.എൻ. അനിതകുമാരിക്കാണ് അന്വേഷണച്ചുമതല. ജീവനക്കാ൪ക്കെതിരെ നടപടിയെടുക്കാത്തതിൽ പ്രതിഷേധിച്ച് വെള്ളിയാഴ്ച രാവിലെ മുതൽ നാട്ടുകാ൪ കുറുവാദ്വീപിലെ മാനേജ൪മാരുടെ ഓഫിസ് ഉപരോധിച്ചു. ഇതോടെ കുറുവ കാണാനെത്തിയ വിനോദ സഞ്ചാരികൾ മടങ്ങിപ്പോയി.

തുട൪ന്ന് സ്ഥലത്തെത്തിയ ഡെ. ഡയറക്ട൪ സി.എൻ അനിതകുമാരി, ബ്ളോക് പഞ്ചായത്ത് പ്രസിഡൻറ് സി. അബ്ദുൽ അശ്റഫ് എന്നിവരുടെ നേതൃത്വത്തിൽ സമരക്കാരുമായി ച൪ച്ച നടത്തി. മന്ത്രി പി.കെ. ജയലക്ഷ്മി, കലക്ട൪ എന്നിവരുമായി ഫോണിൽ ബന്ധപ്പെടുകയും ചെയ്തശേഷമാണ് ജീവനക്കാരെ മാറ്റിനി൪ത്താൻ തീരുമാനമായത്. ഉച്ചക്ക് ഒന്നരയോടെയാണ് ഉപരോധം അവസാനിപ്പിച്ചത്.

ഉച്ചക്കുശേഷം വിനോദസഞ്ചാരികൾക്ക് പ്രവേശം അനുവദിച്ചു. മേയ് 21നാണ് ദ്വീപിലുണ്ടായിരുന്ന 150 ചട്ടി ഡാലിയ ചെടികൾ മാനേജറുടെ ഒത്താശയോടെ ജീവനക്കാരൻ സ്വന്തം നഴ്സറിയിലേക്ക് കടത്തിയത്.

സംഭവം വിവാദമായതിനെ തുട൪ന്ന് 22ന് 50 ചട്ടി ചെടികൾ തിരികെ കൊണ്ടിറക്കാനുള്ള ശ്രമം നാട്ടുകാ൪ തടഞ്ഞിരുന്നു. ഇതോടെ, സ്ഥലത്തെത്തിയ പഞ്ചായത്ത് ആക്ടിങ് പ്രസിഡൻറ് ലേഖ രാജീവൻ, അഡീ. തഹസിൽദാ൪ പ്രഭാകരൻ എന്നിവരുടെ നേതൃത്വത്തിൽ നടത്തിയ ച൪ച്ചയിൽ സംഭവം അന്വേഷിച്ച് സബ് കലക്ട൪ക്ക് റിപ്പോ൪ട്ട് നൽകാൻ തീരുമാനിച്ചിരുന്നു. ഇതിൻെറ അടിസ്ഥാനത്തിൽ രണ്ടുപേരെ സസ്പെൻഡ് ചെയ്യാൻ ജില്ലാ കലക്ട൪ക്ക് ശിപാ൪ശ ചെയ്യുകയും രണ്ടുപേരുടെ കാര്യം ഡി.എം.സിക്ക് ശിപാ൪ശ ചെയ്യുകയുമായിരുന്നു. ഇതിനിടെ, ആരോപണവിധേയ൪ വ്യാഴാഴ്ച ജോലിക്ക് കയറിയതാണ് നാട്ടുകാരെ പ്രകോപിപ്പിച്ചത്.

ബ്ളോക് പഞ്ചായത്തംഗം സണ്ണി ചാലിൽ, ഗ്രാമപഞ്ചായത്തംഗം എ.എം. നിഷാന്ത്, നാട്ടുകാരായ എ. സുഗതൻ, ഇ.സി. രൂപേഷ്, ജോൺസൺ, പ്രദീപ് എന്നിവ൪ ച൪ച്ചയിൽ പങ്കെടുത്തു. മാനന്തവാടി എ.എസ്.ഐ ഒ.കെ. പാപ്പച്ചൻ, പ്രബേഷണറി എസ്.ഐ പി.ബി. സജീവ് എന്നിവരുടെ നേതൃത്വത്തിൽ പൊലീസ് സംഘം സ്ഥലത്തെത്തിയിരുന്നു.