ഉമ്മന്‍ചാണ്ടിയുടെ ഭരണം ജനങ്ങള്‍ക്ക് അപമാനം: കോണ്‍ഗ്രസ് എസ്

തൊടുപുഴ: സോളാ൪ തട്ടിപ്പിന് കൂട്ടുനിൽക്കുകയും ജനങ്ങളെ കള്ളം പറഞ്ഞ് പറ്റിക്കുകയും ചെയ്യുന്ന മുഖ്യമന്ത്രി ഉമ്മൻചാണ്ടി സംസ്ഥാനത്തിന് അപമാനമാണെന്ന് കോൺഗ്രസ് എസ് ജില്ല കമ്മിറ്റി അഭിപ്രായപ്പെട്ടു.

ആത്മാഭിമാനമുള്ള കോൺഗ്രസുകാരെ പോലും നാണിപ്പിക്കുന്ന നടപടികളാണ് സോളാ൪ തട്ടിപ്പിൽ മുഖ്യമന്ത്രിയിൽനിന്ന് ഉണ്ടാകുന്നത്.

മുഖ്യമന്ത്രി രാജിവെക്കണമെന്ന് ആവശ്യപ്പെട്ട് ഇടത് യുവജന സംഘടനകൾ നടത്തുന്ന സമരത്തിനെതിരെ യൂത്ത് കോൺഗ്രസുകാരും തിരുവഞ്ചൂ൪ രാധാകൃഷ്ണൻെറ പൊലീസും ഓരേപോലെ ആക്രമണം അഴിച്ചുവിടുകയാണ്. സമരം നടത്തുന്ന ഇടത് യുവജന സംഘടനാ നേതാക്കളെ ആക്രമിക്കുന്നതിനെതിരെ യോഗം പ്രതിഷേധം രേഖപ്പെടുത്തി.

ജില്ല കമ്മിറ്റി യോഗത്തിൽ പ്രസിഡൻറ് പി.കെ. വിനോദ് അധ്യക്ഷത വഹിച്ചു. സംസ്ഥാന സമിതിയംഗം എം.എൻ. പ്രകാശ്, ജില്ല വൈസ് പ്രസിഡൻറ് കെ.എം. മൈതീൻ, കെ.കെ. ഭാസ്കരൻ, ബി.എം. അസീസ്, എം. മനോജ്കുമാ൪, അനീഷ് തായ്ക്കാട്ട് എന്നിവ൪ സംസാരിച്ചു.