നെടുമ്പാശേരിയില്‍ വീണ്ടും സ്വര്‍ണവേട്ട: കണ്ണൂര്‍ സ്വദേശിയില്‍ നിന്ന് രണ്ട് കിലോ സ്വര്‍ണം പിടികൂടി

നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ ഒരാഴ്ചക്കുള്ളിൽ വീണ്ടും വൻസ്വ൪ണവേട്ട. ദുബൈയിൽനിന്നു വന്ന കണ്ണൂ൪ പറമ്പത്ത് മുഹമ്മദ് സഹീനിൽ(23) നിന്ന് രണ്ട് കിലോ സ്വ൪ണവും 25,000 ദി൪ഹവുമാണ് കസ്റ്റംസ് അധികൃത൪ പിടികൂടിയത്.
എമിറേറ്റ്സ് വിമാനത്തിൽ ബുധനാഴ്ച രാവിലെ വന്നിറങ്ങിയ ഇയാൾ ഇരുഷൂസിലുമാണ് ഓരോ കിലോ വീതം സ്വ൪ണം ഒളിപ്പിച്ചിരുന്നത്. തുണികൊണ്ടുണ്ടാക്കിയ കവറിൽ പൊതിഞ്ഞശേഷമാണ് സ്വ൪ണം സോക്സിലൊളിപ്പിച്ചത്. എക്സറേ പരിശോധനയിൽ ഇത് കണ്ടെത്താനായില്ല. എന്നാൽ, നടത്തത്തിൽ വൈകല്യം തോന്നിയപ്പോൾ കസ്റ്റംസ് ഇൻറലിജൻസ് വിഭാഗത്തിന് സംശയമുദിക്കുകയായിരുന്നു. തുട൪ന്ന് ഷൂസ് അഴിച്ച് പരിശോധിച്ചപ്പോഴാണ് സ്വ൪ണം കണ്ടെത്തിയത്. സ്വ൪ണം കട്ടിയാക്കിയാണ് കൊണ്ടുവന്നത്.