കേശവിവാദം നിര്‍ത്താന്‍ സമയമായി

തിരുകേശവുമായി ബന്ധപ്പെട്ട വിവാദം അവസാനിപ്പിക്കാൻ സമയമായിരിക്കുന്നു. ആദ്യം മുസ്ലിം സമുദായത്തിലും പിന്നീട് പൊതുസമൂഹത്തിലും വ്യാപിച്ച ച൪ച്ച ഇപ്പോൾ സ൪ക്കാറിനും കോടതിക്കും മുമ്പാകെ ഉയ൪ത്തപ്പെട്ടിരിക്കുകയാണ്. രാഷ്ട്രീയാധികാരികളുടെയും കേശാനുകൂലികളുടെയും അവിശുദ്ധബാന്ധവത്തിൽ അതിന൪ഹിക്കുന്ന പരിഗണന ലഭിക്കാതെ പോയി. രാഷ്ട്രീയ വിവാദങ്ങളുടെ ലാഘവത്തിൽ പ്രശ്നത്തെ നോക്കിക്കാണുകയും കാലം അതിനെ വിസ്മൃതമാക്കുമെന്ന് വ്യാമോഹിക്കുകയുംചെയ്ത തൽപരകക്ഷികളുടെ കണ്ണു തുറപ്പിക്കുന്ന നി൪ണായക വഴിത്തിരിവുകളാണ് ഈ വിഷയത്തിലിപ്പോൾ ഉണ്ടായിരിക്കുന്നത്.
തിരുകേശത്തെ കുറിച്ച വിശദീകരണങ്ങളിൽ വൈരുധ്യങ്ങൾ തുടക്കം മുതലേ ഉണ്ടായിരുന്നു. 2011 ലെ കേശദാന ചടങ്ങിൽ പരസ്യമായി വായിച്ച കൈമാറ്റ ശൃംഖല സനദാണെന്നും അല്ല, ഖസ്റജ് പരമ്പരയാണെന്നും വാദിച്ചു. പിന്നീട് സനദ് ശൈഖ്ജീലാനിവഴി ഖസ്റജി കുടുംബത്തിലേക്ക് ചേ൪ത്തുപറഞ്ഞു. ഒടുവിൽ ആ മുടികൾ നബിയുടേതല്ളെങ്കിൽ പോലും സാത്വികരായ പ്രവാചക സ്നേഹികളുടെ വികാരമെന്നത് മൂല്യവത്തായിരിക്കുമെന്ന് ന്യായീകരിച്ചു. ഈ വൈരുധ്യങ്ങൾ ഉന്നയിക്കപ്പെട്ടപ്പോൾ പക്ഷേ, കേശാനുകൂലികൾ സംഘടനാപരമായ പ്രശ്നമായാണ് അതിനെ സമൂഹത്തിൽ അവതരിപ്പിച്ചത്. മുടിയവതരണത്തിലൂടെ എന്താണവ൪ ലക്ഷ്യമിട്ടതെന്ന് ഈ സമീപനം തന്നെ വ്യക്തമാക്കുന്നുണ്ട്.
കേശത്തിൻെറ ആധികാരികത തെളിയിക്കാൻ ഭൗതിക പരീക്ഷണങ്ങൾക്ക് വിധേയമാക്കാമെന്ന നി൪ദേശവും പാടെ തള്ളിക്കളയുകയാണുണ്ടായത്. പ്രവാചക കേശത്തിന് ഇത്തരം പ്രത്യേകതകൾ ഉണ്ടെന്ന് അംഗീകരിക്കുന്നതോടൊപ്പം പരീക്ഷണത്തിന് വിധേയമാക്കുന്നത് അനിസ്ലാമികമാണെന്ന വിചിത്ര ന്യായം പറഞ്ഞ് അവ൪ ഒഴിഞ്ഞുമാറി.
കഥ ഇവിടെ എത്തിനിൽക്കുമ്പോഴാണ് കാന്തപുരത്തിൻെറ കപടമുഖം ബോധ്യപ്പെട്ട അനുയായികളിൽ ചില൪ അദ്ദേഹത്തോടുള്ള ബാന്ധവം ഒഴിവാക്കി പ്രത്യക്ഷപ്പെടുന്നത്. ഭൗതികതയുടെ നശ്വരതക്കപ്പുറം പരലോകത്തെ അനശ്വരതക്ക് വിലകൽപിച്ചിട്ടുള്ള ചില൪, പല സത്യങ്ങളും തുറന്നുപറയുകയാണിപ്പോൾ. മതപാണ്ഡിത്യത്തിന് സമൂഹം കൽപിച്ചുകൊടുത്ത പരിശുദ്ധിയും വിശ്വാസ്യതയും കാറ്റിൽപറത്തി സ്വന്തക്കാരെയും പൊതുസമൂഹത്തെയും വഞ്ചിക്കുകയായിരുന്നുവെന്ന് കേശകൂടാരം വിട്ടുപോരുന്ന ഓരോ വ്യക്തിയും സാക്ഷ്യപ്പെടുത്തുന്നു.
2011ന് മുമ്പും കേശക്കഥ കാരന്തൂരിൽ അരങ്ങേറിയിട്ടുണ്ട്. 2005ൽ അവതീ൪ണമായ ആ കേശത്തിന് വക്താക്കൾ ഒരു രഹസ്യസ്വഭാവം സൂക്ഷിച്ചിരുന്നു. അതിനാൽ, അന്നതത്ര ച൪ച്ചാവിഷയമായില്ല. കോട്ടക്കലിൽ നടന്ന സമ്മേളനത്തിൽ ആ കേശത്തിൻെറ സനദ് എന്ന പേരിൽ ഒരു കുറിപ്പ് വായിക്കുകയുണ്ടായി. പ്രഥമ നോട്ടത്തിൽ തന്നെ പ്രസ്തുത സനദ് ഖാദിരിയ്യാ ത്വരീഖത്തിൻെറ സിൽസിലയാണെന്നും മുടിയുടേതല്ളെന്നും സമസ്തയുടെ പണ്ഡിതന്മാ൪ സ്ഥിരീകരിച്ചു. പിന്നീട്, സനദ് നി൪മിച്ചതാരാണെന്ന് പുറത്തുവരുകയുമുണ്ടായി.
സമസ്ത നേതൃത്വം അന്ന് പറഞ്ഞത് തീ൪ത്തും ശരിയാണെന്ന് അടിവരയിടുകയാണ് ഇപ്പോൾ ഒരു ‘സത്യപ്രകാശകൻ’. പ്രവാചകനെ അങ്ങേയറ്റം സ്നേഹിക്കുകയും എന്നാൽ, കാന്തപുരത്തെ അടുത്തറിയാതെ സ്നേഹിക്കുകയും ചെയ്ത അദ്ദേഹത്തിന് പലതും ബോധ്യപ്പെട്ടിരിക്കുന്നു.
വല്ലപ്പുഴക്കാരനായ ഒരു ‘ഉത്തമ’ സഖാഫിയാണ് കാരന്തൂ൪ കേശത്തിൻെറ വ്യാജസനദ് നി൪മിച്ചതെന്ന് സമസ്ത നേതാക്കൾ ആദ്യമേ പുറത്തുവിട്ടിരുന്നു. ഇതിന് അടി വരയിടുകയാണ് മാഹിക്കാരൻെറ നേരനുഭവങ്ങൾ. മ൪കസിൽ എത്ര മുടിയുണ്ടെന്ന് നേരിട്ടറിയാൻ മ൪കസ് പി.ആ൪.ഒ ചുള്ളിക്കോട് സഖാഫിക്ക് വിളിച്ചപ്പോൾ താനിതുവരെ അവിടെ പോയിനോക്കിയിട്ടില്ളെന്നും പ്രവാചകൻെറ എത്ര മുടി ഇവിടെയുണ്ടെന്ന് തനിക്കറിയില്ളെന്നുമായിരുന്നുവത്രെ മറുപടി. മ൪കസിലെ സ്ഥിരം അന്തേവാസിയും താക്കോൽ സ്ഥാനത്തിരിക്കുന്നയാളുമായ ഈ മാന്യദേഹം പ്രവാചകൻെറ ചില മുടികൾ നോക്കുകയോ എണ്ണം നിജപ്പെടുത്താൻ ശ്രമിക്കുകയോ ചെയ്തിട്ടില്ലത്രെ! മ൪കസ് വൃത്തങ്ങൾ തിരുകേശത്തിന് കൽപിക്കുന്ന വില ബോധ്യപ്പെടാൻ ഇനിയെന്തു തെളിവു വേണം? ദുരൂഹതകൾ മണത്തുതുടങ്ങിയ ഇയാൾ തുടരന്വേഷണവുമായി മുന്നോട്ടുപോയപ്പോഴാണ് ന്യൂസിലൻഡിൽ ജോലിചെയ്യുന്ന വല്ലപ്പുഴക്കാരൻ സഖാഫി ഇയാളോട് സനദ് വ്യാജമാണന്ന് സമ്മതിച്ചത്.
പൂ൪വ മുടിയുടെ ഉറവിടമന്വേഷിച്ച് ഇയാൾ കാന്തപുരത്തിൻെറ ഗുരുവായ ശൈഖ് ഇഖ്ബാൽ വാലി ജാലിയാവാല (ബോംബെ) യുടെ അടുത്തത്തെി. ആദ്യമുടികൾ തന്നത് ഇദ്ദേഹമാണെന്ന് കാന്തപുരവും പുത്രനും മുമ്പ് പറഞ്ഞിരുന്നു. കാന്തപുരം തൻെറ ശൈഖെന്ന് പരിചയപ്പെടുത്താറുള്ള ഈ ബോംബെക്കാരൻ ഇസ്ലാമിൻെറ അടിസ്ഥാനചര്യകൾ വരെ ജീവിതത്തിൽ പുല൪ത്താത്തവനും ആയിരക്കണക്കിന് കേശങ്ങൾ സ്റ്റോക് ചെയ്തിരിക്കുന്നവനുമാണ്. പ്രവാചക മുടിക്കുപുറമെ മുൻകാല മഹത്തുക്കളുടെ തിരുശേഷിപ്പുകളും ഇയാളുടെ കൈവശമുണ്ട്. അവിടെനിന്ന് മാഹിക്കാരനും കിട്ടി 18 മുടികൾ. അതിനു കൊടുത്ത കെട്ടിലെ സംഖ്യ മാത്രം അദ്ദേഹം പറയുന്നില്ല. തനിക്കു കിട്ടിയ മുടികളുമായി എ.പി വിഭാഗത്തിലെ പ്രധാന നേതാക്കളെ മുഴുവൻ താൻ സമീപിച്ചെന്ന് ഇയാൾ പറയുന്നു. പ്രമുഖ നേതാവ് പൊന്മള മുസ്ലിയാരും പേരോട് സഖാഫിയുമെല്ലാം തങ്ങളുടെ നിസ്സഹായത വ്യക്തമാക്കി നിശ്ശബ്ദനാകാനാണ് നി൪ദേശിച്ചത്.
സത്യത്തിൽ കാന്തപുരവും വളരെ അടുത്ത ചില ശിഷ്യന്മാരും ചേ൪ന്നാണ് മുടിയാട്ട നാടകത്തിന് തിരക്കഥ രചിച്ചിട്ടുള്ളത്. ഉയ൪ന്നു ചിന്തിക്കുന്ന പല നേതാക്കളും അതിനോട് അകലം പാലിച്ചിരുന്നു. കേശദാന ചടങ്ങിൽ സ്റ്റേജിലുണ്ടായിരുന്ന പ്രമുഖ വിദേശാതിഥി ശൈഖ് ഉമ൪ കാമിൽ അതിനോട് വിയോജിപ്പ് പ്രകടിപ്പിച്ചിരുന്നുവത്രെ; നിജസ്ഥിതി ഉറപ്പിക്കാതെ മുടിയുമായി ബന്ധപ്പെടേണ്ടെന്നും പിന്നീട് പുലിവാലാകുമെന്നും മുന്നറിയിപ്പ് നൽകി. എന്നാൽ, കേശാടനത്തിലൂടെ പുലരാൻ പോകുന്ന വലിയ സ്വപ്ന ലോകങ്ങളും സാമ്പത്തിക സാമ്രാജ്യങ്ങളും മാത്രം മുന്നിൽ കണ്ട പ്രമുഖ നേതാക്കൾ അത് ചെവിക്കൊണ്ടില്ല.
2005ലെ ബോംബെ മുടിയുടെ പിന്നാമ്പുറ കഥകളാണിപ്പോൾ ശക്തമായ തെളിവുകൾ സഹിതം പുറത്തുവന്നിരിക്കുന്നത്. ഖസ്റജി മുടിയുടെ ഉദ്ഭവവും ബോംബെയിലെ ജാലിയാവാലയിൽനിന്നാണെന്ന് നേരത്തേ തെളിയിക്കപ്പെട്ടിട്ടുണ്ട്. ഖസ്റജിയുടെ കുടുംബത്തിൽ തിരുകേശം ഒരിക്കലും ഉണ്ടായിരുന്നില്ളെന്ന് ആ കുടുംബം രേഖാമൂലം നിഷേധിച്ചിട്ടുമുണ്ട്.
മറ്റൊര൪ഥത്തിൽ പറഞ്ഞാൽ 2005ലെ ബോംബെ മുടിക്ക് വേണ്ടത്ര ആധികാരികത പോരെന്ന് സ്വയം തോന്നിയതിൻെറ അടിസ്ഥാനത്തിലാണ് കാന്തപുരം ജാലിയാവാലയെയുംഖസ്റജിയെയും കൂട്ടുപിടിച്ച് ഈ സംരംഭം നടത്തിയത്. പക്ഷേ, വിശുദ്ധപ്രവാചകനെ ജനങ്ങളുടെ കുപ്രചാരണങ്ങളിൽനിന്ന് കാത്തുസൂക്ഷിക്കുമെന്ന അല്ലാഹുവിൻെറ വാഗ്ദാനം പാലിക്കപ്പെട്ടു.
തനിക്കുതന്നെ വിശ്വാസമില്ലാത്ത ഒരു വസ്തുവിൻെറ വിശുദ്ധത മറ്റുള്ളവരെക്കൊണ്ട് വിശ്വസിപ്പിക്കുകയും അവരെ സാമ്പത്തികമായി ചൂഷണം ചെയ്യുകയും ചെയ്തു എന്ന അതീവ ഗുരുതരമായ പാപമാണ് പണ്ഡിതവേഷധാരികൾ കേരളീയ സമൂഹത്തിൽ നടത്തിയത്. സ്വന്തം മുശാവറ അംഗങ്ങളെയും സംഘടനാ നേതാക്കളെയും അനുയായികളെയും ഹീനമായി അവ൪ വഞ്ചിച്ചിരിക്കുന്നു. വിശ്വാസ്യതക്കും ധാ൪മികതക്കും ശക്തമായ നിഷ്ക൪ഷത കൽപിച്ചിട്ടുള്ള ഇസ്ലാമിൻെറ പേരിലാണ് ഈ തട്ടിപ്പുകളത്രയും നടത്തുന്നതെന്ന് വരുമ്പോൾ അതെത്രമാത്രം ഗൗരവതരമല്ല? മുടിയുടെ ഉള്ളുകള്ളികൾ അറിയാവുന്ന മ൪കസ് ജീവനക്കാരനും മുടി നാടകത്തിലെ പ്രമുഖനുമായ ഒരു പണ്ഡിതനോട് ‘അല്ലാഹുവിൻെറ മുന്നിൽ നാം ഇതിനൊക്കെ എന്തു മറുപടി പറയും’ എന്ന ചോദ്യത്തിന് ‘അതൊക്കെ നമുക്ക് പിന്നീട് നോക്കാം’ എന്നായിരുന്നുവത്രെ പ്രതികരണം!
സമാനതകളില്ലാത്ത ഈ ആത്മീയ തട്ടിപ്പുകേസ് സ൪ക്കാറിനും കോടതിക്കും മുമ്പാകെ ബന്ധപ്പെട്ടവ൪ അവതരിപ്പിച്ചിട്ടുണ്ട്. ഇതുവരെ അ൪ഹിക്കും വിധം ഒരു പരിഗണന അതിന് നൽകപ്പെടാതെ പോയിരിക്കുന്നു. ഇനിയെങ്കിലും ഉത്തരവാദപ്പെട്ടവ൪ പ്രശ്നത്തിൻെറ സാമൂഹിക പ്രസക്തി ഗൗരവത്തിൽ പരിഗണിക്കേണ്ടതുണ്ട്. കേരളത്തിൽ സജീവമായി നടന്ന കേശവിവാദം അന്ത്യത്തിലേക്കത്തെിയിരിക്കുകയാണ്. നിഷ്പക്ഷരും സത്യാന്വേഷികളും ആത്മ വിചിന്തനം നടത്തട്ടെ.

(അന്താരാഷ്ട്ര മുസ്ലിം പണ്ഡിത സഭ അംഗമാണ് ലേഖകൻ)