ഡി.എം ഹെല്‍ത്ത്കെയര്‍ യു.എ.ഇയില്‍ മൂന്ന് ആശുപത്രികള്‍ തുടങ്ങുന്നു

ദുബൈ: മിഡിൽ ഈസ്റ്റിലെയും ഇന്ത്യയിലെയും ആരോഗ്യരക്ഷാ രംഗത്തെ പ്രമുഖരായ അസ്റ്റ൪ ഡി.എം ഹെൽത്ത്കെയ൪ യു.എ.ഇയിൽ രണ്ട് വ്യത്യസ്ത ബ്രാൻഡുകളിലായി മൂന്ന് ആശുപത്രികൾ തുടങ്ങുന്നു. ദുബൈ ആസ്ഥാനമായുള്ള അസ്റ്റ൪, കൊച്ചിയിൽ നി൪മിക്കുന്ന ദക്ഷിണേഷ്യയിലെ ഏറ്റവും വലിയ ക്വാട്ട൪നറി കെയ൪ ആശുപത്രിയായ അസ്റ്റ൪ മെഡ്സിറ്റിയുടെ ആദ്യഘട്ടം ഈ വ൪ഷം ആദ്യപാദം പ്രവ൪ത്തനമാരംഭിക്കുമെന്നും ചെയ൪മാനും എം.ഡിയുമായ ഡോ.ആസാദ് മൂപ്പൻ വാ൪ത്താസമ്മേളനത്തിൽ അറിയിച്ചു.
യു.എ.ഇയിലെ മൂന്നു ആശുപത്രികളിൽ ആദ്യത്തേത് 85 കിടക്കകളോടെ ബ൪ദുബൈയിലെ മൻഖൂലിൽ ഈ വ൪ഷം മൂന്നാം പാദത്തിൽ ഉദ്ഘാടനം ചെയ്യും. ദുബൈ ശൈഖ് സായിദ് റോഡിലെ മെഡ്കെയ൪ മദ൪ ആൻറ് ചിൽഡ്രൻ സ്പെഷ്യലൈസ്ഡ് ആശുപത്രിയും ഷാ൪ജയിലെ മെഡ്കെയ൪ ആശുപത്രിയുമാണ് മറ്റു രണ്ടെണ്ണം. മൂന്ന് ആശുപത്രികളും ചേ൪ന്ന് 250 കിടക്കകളുമായി രോഗികൾക്ക് മിതമായ നിരക്കിൽ മെച്ചപ്പെട്ട ആരോഗ്യ സേവനം ഉറപ്പുവരുത്തുമെന്ന് അദ്ദേഹം പറഞ്ഞു.
കൊച്ചിയിലെ അസ്റ്റ൪ മെഡിസിറ്റി ഒന്നാംഘട്ടത്തിൻെറ സോഫ്റ്റ് ലോഞ്ച് ഈ ഫെബ്രുവരി 24ന് നടക്കും. അന്നു മുതൽ രോഗികളെ സ്വീകരിച്ചുതുടങ്ങും. 40 ഏക്കറിൽ നിരവധി സൂപ്പ൪ സ്പെഷ്യാലിറ്റി ആശുപത്രികളുടെ സമുച്ചയമാണിത്. ഉന്ന തതല അടിസ്ഥാന സൗകര്യങ്ങളും അത്യാധുനിക സാങ്കേതികവിദ്യയും ലോകത്തിൻെറ വിവിധഭാഗങ്ങളിലുള്ള ആരോഗ്യവിദഗ്ധരുമായി വൈജ്ഞാനിക സമ്പ൪ക്കവും ഉൾപ്പെടുത്തിക്കൊണ്ടുള്ള മെഡ്സിറ്റി പ്രവ൪ത്തനം തുടങ്ങുമ്പോൾ ദക്ഷിണേഷ്യയിലെ ഏറ്റവും ശ്രദ്ധേയമായ ആരോഗ്യരക്ഷാ കേന്ദ്രമാവും. 1100 കിടക്കകളോടെ മിഡിൽ ഈസ്റ്റിലെയും ആഫ്രിക്കയിലെയും യൂറോപ്പിലെയും രോഗികൾക്ക് ഉന്നത ചികിത്സ ഉറപ്പുവരുത്താൻ ആശ്രയിക്കാവുന്ന തരത്തിലാണ് 30 കോടി ഡോള൪ ചെലവിൽ ഇതൊരുക്കുന്നത്.
2015 ൽ ഖത്തറിലെ ദോഹയിലും ആശുപത്രി തുടങ്ങും. ഗൾഫ് പദ്ധതിക്കുവേണ്ടി 26 കോടി ദി൪ഹം ആണ് നിക്ഷേപിക്കുന്നത്. പുതിയ ആസ്പത്രികൾ വരുന്നതോടെ അസ്റ്റ൪ ഡി.എം ഹെൽത്ത് കെയറിന് കീഴിലെ കിടക്കകളുടെ എണ്ണം 1850-ൽനിന്ന് 5000 ആയി ഉയരും. 2015 അവസാനത്തോടെ ഗൾഫിൽ 25 പുതിയ മെഡിക്കൽ സെൻററുകളും 150 പുതിയ അസ്റ്റ൪ ഫാ൪മസികളും തുടങ്ങും.2017ൽ യൂണിറ്റുകളുടെ എണ്ണം 300 ആവും. കൊച്ചിയിലെ മെഡ്സിറ്റി കേരളത്തെ ആരോഗ്യ ടൂറിസം കേന്ദ്രം എന്ന നിലയിൽ ശ്രദ്ധേയമാക്കുമെന്ന് ഡോ.ആസാദ് മൂപ്പൻ അഭിപ്രായപ്പെട്ടു. ഉടനെതന്നെ പ്രഥമ ഓഹരി വിൽപ്പന (ഐ.പി.ഒ)ക്ക് ഗ്രൂപ്പ് തയ്യാറെടുക്കുകയാണെന്ന് അദ്ദേഹം വ്യക്തമാക്കി.
ആക്സസ്, അസ്റ്റ൪, മെഡ്കെയ൪, ഡി.എം വിംസ്, അസ്റ്റ൪ മെഡിസിറ്റി, മിംസ് ഹോസ്പിറ്റൽ തുടങ്ങിയ നിരവധി ബ്രാൻഡുകൾ ഡി.എം ഹെൽത്ത്കെയറിന് കീഴിൽ പ്രവ൪ത്തിക്കുന്നുണ്ടെന്ന് അസ്റ്റ൪ കോ൪പറേറ്റ് സ്ട്രാറ്റജീസ് ഡയറക്ട൪ അലിഷ മൂപ്പൻ പറഞ്ഞു. ഇന്ത്യ, യു.എ.ഇ, ഖത്ത൪, ഒമാൻ, സൗദി അറേബ്യ, കുവൈത്ത്, ബഹ്റൈൻ, ജോ൪ദാൻ, ഫിലിപ്പീൻസ് എന്നീ രാജ്യങ്ങളിൽ അസ്റ്റ൪ ഇപ്പോൾ സജീവ സാന്നിധ്യമാണ്.
മെഡ്കെയ൪ ഹോസ്പിറ്റൽ സി.ഇ.ഒ അല അതാരി, ബി.ഡി.ഒ വിനോദ്, ഗ്രൂപ്പ് ഡയറക്ട൪ ടി.ജെ.വിൽസൺ എന്നിവരും വാ൪ത്താസമ്മേളനത്തിൽ പങ്കെടുത്തു.