ഫെഡറേഷന്‍ കപ്പ് വോളി: തമിഴ്നാടിനും റെയില്‍വേക്കും ജയം

കിഴക്കമ്പലം (കൊച്ചി): ഫെഡറേഷൻ കപ്പ് വോളിബാൾ ചാമ്പ്യൻഷിപ്പിൽ വ്യാഴാഴ്ച നടന്ന മത്സരത്തിൽ പുരുഷവിഭാഗത്തിൽ തമിഴ്നാടിനും ഉത്തരഖണ്ഡിനും വനിതാ വിഭാഗത്തിൽ റെയിൽവേക്കും ജയം. ഉത്ത൪പ്രദേശിനെതിരെ മൂന്ന് സെറ്റുകളിൽ ഏകപക്ഷീയമായായിരുന്നു തമിഴ്നാടിൻെറ ജയം (25-14, 25-11, 25-19). ദേശീയ താരങ്ങളായ വൈഷ്ണവ്, എം. മുക്രപാണ്ഡ്യൻ എന്നിവ൪ തമിഴ് നിരയിൽ മികച്ച പ്രകടനം പുറത്തെടുത്തു. രാജസ്ഥാനെ ഒന്നിനെതിരെ മൂന്ന് സെറ്റുകൾക്ക് ഉത്തരഖണ്ഡ് പരാജയപ്പെടുത്തി (25-18, 19-25, 25-20, 25-20). ക്യാപ്റ്റൻ നൗജിത് സിങ്ങും ദേശീയതാരം മന്ദീപ് സിങ്ങുമാണ് ഉത്തരാഖണ്ഡിനെ വിജയത്തിലേക്കത്തെിച്ചത്. വനിതകളിൽ നേരിട്ടുള്ള സെറ്റുകളിലായിരുന്നു ഹരിയാനക്കെതിരെ റെയിൽവേസിൻെറ ജയം (25-12, 25-17, 25-18). ദേശീയതാരം പ്രിയങ്ക ബോറക്കൊപ്പം മലയാളികളായ പൂ൪ണിമയും സൗമ്യയും നടത്തിയ മികച്ച പ്രകടനമാണ് റെയിൽവേസിൻെറ ജയം അനായാസമാക്കിയത്. വെള്ളിയാഴ്ച വനിതാ വിഭാഗത്തിൽ കേരളം തമിഴ്നാടിനെതിരെ മത്സരിക്കും. പുരുഷവിഭാഗത്തിൽ ഉത്തരാഖണ്ഡ് പഞ്ചാബിനെയും തമിഴ്നാട് ഹരിയാനയെയും നേരിടും.